Hakimlər

21 İsraillilər: «Heç birimiz binyaminlilərə qız verməyəcəyik», — deyə Mispahda+ and içmişdilər.+ 2 Xalq Beytelə gəlib+ axşamadək Allahın qarşısında oturdu, ağlayıb ah-vay elədi. 3 Onlar deyirdilər: «Ey İsrailin Allahı Yehova, niyə İsraildə belə bir şey baş verdi? Nə üçün bu gün İsrailin bir qəbiləsi əskildi?» 4 Ertəsi gün camaat tezdən durub yandırma qurbanı və ünsiyyət qurbanı+ gətirmək üçün orada qurbangah tikdi.

5 Sonra İsrail xalqı dedi: «İsrail qəbilələrindən Yehovanın önündəki toplantımıza kim gəlməmişdi?» Onlar and içmişdilər ki, Mispaha, Yehovanın önünə kim gəlməsə, hökmən öldürüləcək. 6 İsraillilər öz soydaşları binyaminlilərlə baş verənlərə görə heyifsilənirdilər. Onlar deyirdilər: «Bu gün İsraildən bir qəbilə qoparıldı. 7 Bəs onlardan sağ qalanlar üçün haradan arvad tapaq? Axı onlara qız verməmək üçün Yehovaya and içmişik».+

8 Onlar soruşdular: «İsrail qəbilələrindən Mispaha, Yehovanın önünə kim gəlməmişdi?»+ Məlum oldu ki, toplantı düşərgəsinə Yabeş-Giladdan heç kim gəlməmişdi. 9 Xalqı sayarkən gördülər ki, Yabeş-Giladdan heç kəs yoxdur. 10 İcma 12 000 ən igid adamı göndərib əmr etdi: «Gedin, Yabeş-Gilad əhlini qadınlı-uşaqlı qılıncdan keçirin.+ 11 Belə edərsiniz: bütün kişiləri və kişi əli dəymiş qadınların hamısını məhv edin». 12 Yabeş-Gilad əhli arasında kişi əli dəyməmiş 400 qız tapdılar. Onları Kənan torpağına, Şilodakı+ düşərgəyə gətirdilər.

13 Bütün icma Rimmun qayasındakı binyaminlilərə xəbər göndərib+ onları barışığa çağırdı. 14 Onda binyaminlilər geri qayıtdılar. İsraillilər Yabeş-Giladdan sağ qalmış qızları onlara verdilər,+ lakin hamısına qız çatmadı. 15 Xalq binyaminlilərdən ötrü məyus oldu,+ çünki Yehova İsrail qəbilələri arasında parçalanma salmışdı. 16 İcma ağsaqqalları dedi: «Bəs qalan binyaminlilər üçün necə arvad tapaq? Axı Binyamindəki bütün qadınlar həlak olub». 17 Onlar dedilər: «Binyamindən sağ qalanlara irs verilməlidir ki, İsrailin bütöv bir qəbiləsi itib-batmasın. 18 Ancaq biz onlara qız verə bilmərik, çünki İsrail xalqı: “Binyaminə qız verənə lənət olsun”, — deyə and içib».+

19 Sonra onlar dedilər: «Beyteldən şimalda, Beyteldən Sihama gedən yolun şərqində, Ləbnadan cənubda yerləşən Şiloda+ hər il Yehovaya bayram keçirilir». 20 Onlar binyaminlilərə tapşırdılar: «Gedin üzüm bağlarında gizlənin. 21 Şilo qızları rəqs etməyə gələndə bağlardan çıxın. Qoy hər kəs Şilo qızlarından birini tutub Binyamin torpağına qayıtsın və özünə arvad etsin. 22 Əgər onların ataları, yaxud qardaşları üstümüzə şikayətə gəlsələr, biz deyəcəyik: “Bizim xatirimizə onları bağışlayın. Çünki müharibədə əsir aldığımız qızlar hamısına çatmadı.+ Siz də onlara qız verə bilməzdiniz, çünki günaha batardınız”».+

23 Binyaminlilər elə də etdilər. Hər biri rəqs edən qızların arasından özünə bir qız qaçırtdı. Sonra onlar öz torpaqlarına qayıtdılar, şəhərləri bərpa edib+ orada yaşadılar.

24 Onda israillilər dağılışdılar, hər kəs öz qəbiləsinə, öz ailəsinə qayıtdı. Hər biri öz yurduna döndü.

25 O dövrdə İsraildə padşah yox idi.+ Hər kəs öz bildiyini edirdi.