Əşiya
21 Dəniz səhrasına qarşı hökm:+
Səhradan, dəhşətli ölkədən elə bir fəlakət gəlir ki,
Sanki, cənubu süpürən tufandır.+
2 Mənə dəhşətli vəhy nazil oldu:
Xain xainlik edir,
Virançı virançılıq.
Haydı, Elam, irəli! Haydı, Mada*, hücuma!+
Onun bais olduğu fəryadlara son qoyacağam.+
3 Odur ki, güclü ağrı içindəyəm.+
Tamam qıc olmuşam,
Doğan qadına bənzəyirəm.
Dərd əlindən heç nə eşitmirəm,
Həyəcandan heç nə görmürəm.
4 Ürəyim çırpınır, qorxudan əsim-əsim əsirəm.
Könlümü oxşayan alaqaranlıq indi məni qorxudur.
5 Süfrəni açın, yerləri hazırlayın!
Yeyin, için!+
Ey bəylər, durun, qalxanlara yağ çəkin!
6 Yehova mənə belə dedi:
«Get, gözətçi qoy. Qoy gördüklərini xəbər versin».
7 O, cəng arabaları gördü; birini atlar çəkirdi,
Birini eşşəklər,
Birini dəvələr.
O, gözünü zilləyib diqqətlə baxırdı.
8 Sonra aslan kimi, bağırdı:
«Ey Yehova, gündüzlər gözətçi qülləsində dururam,
Gecələri yerimdən tərpənmirəm.+
9 Bax gəlir:
Atlar qoşulmuş cəng arabasında adamlar!»+
Sonra o car çəkdi:
«Yıxıldı! Babil yıxıldı!+
Allahlarının bütün oyma bütləri düşüb parça-parça oldu!»+
10 Ey taxıl kimi döyülmüş xalqım!
Ey xırmanımın övladları!+
İsrailin Allahı, ordular Allahı Yehovadan eşitdiklərimi sizə bildirdim.
11 Dumaha* qarşı hökm:
Bir nəfər Sairdən+ məni səsləyir:
«Ay gözətçi, bu gecə nə oldu?
Ay gözətçi, bu gecə nə oldu?»
12 Gözətçi söylədi:
«Səhərin açılmağına az qalıb, yenə gecə olacaq.
Nəsə soruşmaq istəsəniz, soruşun.
Yenə gəlin!»
13 Səhraya qarşı hökm:
Ey Didan+ karvanları,
Biyabandakı meşəlikdə gecələyəcəksiniz.
14 Susayanları qarşılayın, onlara su gətirin.
Ey Təma+ sakinləri,
Qaçqınlara çörək gətirin.
15 Çünki onlar qılıncdan, sıyrılmış qılıncdan,
Gərilmiş yay-kamandan, qızğın döyüşdən qaçıblar.
16 Yehova mənə belə dedi: «Muzdurun illəri ilə saysaq, bir ilin içində Qədarın+ ehtişamı yox olacaq. 17 Qədar oxçularından, cəngavərlərdən az adam qalacaq. Bunu İsrailin Allahı Yehova dedi».