1. Əzablar Allahdandır?

Bunu bilmək nəyə görə vacibdir?

Bəzi insanlar əzabların səbəbkarının Allah olduğunu düşünüb Ondan üz döndərir.

Düşünün

Bir çox din xadimləri birbaşa və ya dolayısıyla öyrədirlər ki, əzabların səbəbkarı Allahdır. Məsələn, deyirlər:

• Təbii fəlakətlər Allahın cəzasıdır.

• Allah yaxşı adamları yanına tez aparır.

• Böyük iztirablara səbəb olan müharibələrdə Allah tərəf tutur.

Bəs ola bilərmi ki, din xadimləri Allah haqqında yanlış məlumat verir? Bəlkə, Allah elə buna görə onlardan üz döndərib?

Müqəddəs Kitabda deyilir

Əzabların səbəbkarı Allah deyil.

Əzabların Allahdan olması fikri Müqəddəs Kitabda Onun xüsusiyyətləri ilə bağlı deyilənlərə ziddir. Kəlamda yazılıb:

«Qayadır O, hər işi mükəmməl... Adildir, haqdır O» (QANUNUN TƏKRARI 32:4).

«Allah qətiyyən pislik etməz, Qüdrət Sahibi haqsızlıq etməz!» (ƏYYUB 34:10).

«Qüdrət Sahibi ədaləti təhrif etmir» (ƏYYUB 34:12).

Allah Onun haqda yanlış təlimlər yayan dinləri rədd edir.

Əzabların səbəbkarının Allah olduğunu öyrədən, həmçinin müharibələrdə, zorakılıqda əli olan dinlər Allahda ikrah doğurur.

«Peyğəmbərlər Mənim adımla yalandan peyğəmbərlik edir. Onları Mən göndərməmişəm, onlara heç nə buyurmamışam, onlarla danışmamışam. Sizə söylədikləri şeylər yalan vəhylərdir,.. öz uydurmalarıdır» (ƏRƏMYA 14:14).

İsa peyğəmbər dini riyakarlığı ifşa edirdi.

«Mənə “Ağa, Ağa” deyən hər kəs səmavi Padşahlığa girməyəcək, yalnız göydəki Atamın iradəsini yerinə yetirən ora girəcək. O gün çoxları mənə deyəcək: “Ağa, Ağa, məgər biz sənin adınla peyğəmbərlik etmirdik? Məgər sənin adınla cinləri qovmurduq? Məgər sənin adınla çoxlu möcüzələr göstərmirdik?” O zaman onlara deyəcəyəm: “Mən sizi tanımıram! Rədd olun, qanunsuzluğun qulluğunda duranlar!”» (MƏTTA 7:21—23).