Fəsil 33

Yeşaya peyğəmbərin sözləri yerinə yetir

FƏRİSEYLƏRİN və hirodçuların onu öldürmək üçün plan qurduqlarını biləndə İsa şagirdləri ilə Qalileya gölünə gedir. Bütün Fələstindən və digər bölgələrdən camaat buraya, İsanın yanına axışır. O, xeyli xəstəni sağaldır və buna görə də ağır xəstəlikdən əzab çəkənlər ona toxunmağa can atır.

Adam əlindən tərpənmək olmur. İsa şagirdlərinə bir qayığı hazır vəziyyətdə saxlamağı tapşırır ki, izdiham onu sıxışdırmağa başlasa, qayığa minib sahildən bir qədər aralansın və oradan təlim verə bilsin. Bundan əlavə, o, qayıqla digər sahilboyu yerlərə gedib oradakı adamlara da kömək edə bilər.

İsanın şagirdi Matta İncildə qeyd edir ki, Məsihin fəaliyyəti nəticəsində «Yeşaya peyğəmbər vasitəsilə deyilmiş» peyğəmbərlik yerinə yetir və həmin sözləri sitat gətirir:

«Budur, Mənim seçdiyim, ürəyimcə olan əziz qulum! Mən ona müqəddəs ruhumdan verəcəyəm və o, millətlərə ədalətin nə olduğunu izah edəcək. O mübahisə etməyəcək, səsini qaldırmayacaq, küçələrdə səsi çıxmayacaq. Haqq-ədaləti zəfərə çatdırmayınca sınmış qamışı əzməyəcək, közərən piltəni söndürməyəcək. Millətlər onun adına ümid bağlayacaq».

Şübhəsiz ki, Allaha əziz və Onun ürəyincə olan şəxs İsadır. O, saxta dini ənənələrlə üstünə örtük salınmış həqiqi ədaləti insanlar üçün aşkar edir. Fəriseylər Allahın qanununu təhrif etdiklərindən şənbədə hətta xəstə adama kömək etmirlər! İsa Allahın ədalətini insanlara aydınlatmaqla onları bu ənənələrin buxovundan azad edir. Məhz buna görə din rəhbərləri onu öldürməyə çalışırlar.

Bəs hansı mənada o «mübahisə etməyəcək, səsini qaldırmayacaq» və küçələrdə onun «səsi çıxmayacaq»dı? Adamlara şəfa verəndə İsa onlara bərk-bərk tapşırır ki, «onun kim olduğunu heç kəsə deməsinlər». O istəmir ki, camaat küçə və meydanlarda car çəkib ondan danışsın, ya da onun haqqında müxtəlif şayiələr yayıb onu dildən dilə salsın.

İsa həmçinin sındırılmış, ayaqlar altında tapdanmış qamışa bənzəyən insanlara təsəlliverici xəbər gətirib. Bu adamlar sönüb qurtarmaq üzrə olan közərən piltəni xatırladırlar. Bəli, İsa sınmış qamışı əzmir, közərən piltəni söndürmür. Əksinə, o, həlim insanlara şəfqət və məhəbbət göstərir, onları dirçəldir. Həqiqətən də, İsa Məsih bütün millətlər üçün ümid qaynağıdır! Matta 12:15—21; Mark 3:7—12; Yeşaya 42:1—4.

▪ İsa mübahisə etmədən və küçələrdə səsini çıxarmadan ədaləti necə bəyan edir?

▪ Kimlər sınmış qamışı və közərən piltəni xatırladır? İsa onlarla necə rəftar edir?