Fəsil 133

İsa Məsih Allahın niyyətini həyata keçirir

DÜNYA sevincə qərq olub! Cəngavər-Padşah İsa Məsih Şeytanı və onun haqsız dünyasını yox edir! İsa Məsihin əmin-amanlıq dolu Minillik Padşahlığı başlanır!

Har-Magedondan sağ çıxanlar İsa Məsih və onunla padşahlıq edənlərin rəhbərliyi altında bu ədalətli müharibədən qalmış dağıntıları təmizləyəcəklər. Ehtimal ki, Har-Magedondan sağ çıxanlar bir müddət dünyaya övlad gətirəcəklər və bu uşaqlar valideynləri ilə birlikdə yer üzünü gözəl Cənnət bağına çevirəcəklər. Bu iş onlara həzz verəcək.

Tədricən İsa milyonlarla insanı dirildəcək və onlar da bu gözəl Cənnətdə firavan həyat sürəcəklər. İsa o zaman: «Elə bir saat gəlir ki, qəbirlərdə olanların hamısı... diriləcək», — vədini yerinə yetirəcək.

Dirilənlər arasında İsa ilə birgə işgəncə dirəyində edam olunmuş cinayətkar da olacaq. Yəqin, xatırlayırsınız ki, İsa ona söz vermişdi: «Bunu bil: sən mənimlə Cənnətdə olacaqsan!» Amma nə həmin adam göydə İsa ilə padşahlıq sürəcək, nə də İsa yenidən insan kimi yer üzünə gəlib onunla birlikdə Cənnətdə yaşayacaq. İsa bu keçmiş cinayətkarla o mənada bir yerdə olacaq ki, onu yer üzündə yaşamaq üçün dirildəcək və növbəti səhifədə təsvir edildiyi kimi onun həm fiziki, həm də ruhani firavanlığının qayğısına qalacaq.

Bir təsəvvür edin: Har-Magedonda sağ qalmış adamlar, onların uşaqları və İsanın diriltdiyi milyardlarla itaətkar insanlardan ibarət bəşər ailəsi onun qayğısı sayəsində tədricən kamilliyə yetişəcək! Yehova Allah padşahlıq edən İsa Məsih vasitəsilə ruhani mənada insanlarla olacaq. Həvari Yəhya göydən gələn səsin bu sözlərini eşidir: «Allah insanların gözlərindən bütün yaşları siləcək. Artıq nə ölüm, nə dərd, nə fəryad, nə də ağrı olacaq». Bəli, yer üzünün heç bir sakini nə ağrı-acı, nə də xəstəlik görəcək.

İsa Məsihin Minillik hakimiyyətinin sonunda hər şey Allahın əzəldən niyyət etdiyi kimi olacaq. Allah Adəmlə Həvvaya törəyib çoxalmaq və bütün yer üzünü doldurmaq tapşırığı vermişdi. Bütün yer üzü kamil və saleh adamlarla dolacaq. İsanın fidyə qurbanlığı hər bir adama fayda gətirəcək. Adəmin günahından törənən ölüm artıq olmayacaq!

Beləcə, İsa Allahın niyyətini bütövlüklə yerinə yetirəcək. Buna görə də min il tamam olanda İsa Padşahlığı və kamilliyə yetişmiş bəşər ailəsini Atasına təhvil verəcək. O vaxt Allah Şeytanı və onun cinlərini ümmandan azad edəcək. Hansı məqsədlə?

Minilliyin sonunda Cənnətdə yaşayanların əksəriyyətini dirilmiş adamlar təşkil edəcək. Həmin adamlar öləndə Allahın vədlərindən xəbərləri yox idi və onlar bu vədlərə iman etdiklərini göstərə bilməyiblər. Bu səbəbdən onların imanı heç vaxt sınanmayıb. Diriləndən və Müqəddəs Kitab həqiqətlərini öyrənəndən sonra Cənnətdə heç bir çətinliyə rast gəlmədikləri üçün asanlıqla Allaha xidmət ediblər. Bəs Şeytana onları Allaha xidmətdən yayındırmaq üçün fürsət verilsə, onlar sadiq qalacaqlar? Bu məsələni həll etmək üçün Şeytan azad ediləcək.

Həvari Yəhyaya verilmiş vəhy göstərir ki, İsanın Minillik hakimiyyəti başa çatandan sonra Şeytan qeyri-müəyyən sayda insanları Allaha xidmətdən çəkindirə biləcək. Lakin axırıncı sınaq qurtarandan sonra Şeytan, onun cinləri və öz tərəfinə çəkə bildiyi adamlar birdəfəlik məhv ediləcəklər. Sınaqdan alnıaçıq çıxan Allaha sadiq insanlar isə Yaradanlarından xeyir-dua alaraq əbədi yaşayacaqlar.

Heç şübhəsiz, Allahın möhtəşəm niyyətində İsa Məsihin bundan sonra da vacib rolu olacaq. Allahın təyin etdiyi əzəmətli Padşah İsanın hakimiyyəti altında bizi gözəl bir gələcək gözləyir. Lakin onun yerdə insan olarkən etdiklərini də heç vaxt unutmamalıyıq.

İsa öz xoşu ilə yer üzünə gəlib insanlara Ulu Yaradan haqqında danışırdı. Bundan əlavə, o, Allahın ecazkar keyfiyyətlərini nümayiş etdirirdi. İsa şücaətli rəhbər və ustad müəllim idi. Onun cəsarəti, mərdliyi, misilsiz hikməti və bol mərhəməti ürəyimizi riqqətə gətirir. Əbədi yaşamağımız üçün yeganə qurtuluş yolu olan fidyə qurbanlığını verərkən İsanın nə qədər zülmə, işgəncəyə qatlaşdığını düşünəndə, şübhəsiz ki, qəlbimiz ona qarşı minnətdarlıqla dolub-daşır!

İsanın həyatı barədə öyrəndikcə gözümüzün önündə, doğrudan da, qeyri-adi bir insan canlanır. O, bütün əzəməti ilə qarşımızda durur və biz də Roma valisi Ponti Pilat kimi bəyan etmək istəyirik: «Budur o adam!» Bəli, o adam tarixdə ən dahi insandır!

İsanın verdiyi fidyə qurbanlığını qəbul etdiyimiz təqdirdə, Adəmdən miras aldığımız günah və ölümün pəncəsindən qurtulacağıq və İsa bizə əbədi həyat verəcək. Kim əbədi yaşamaq istəyirsə, həm Allah, həm də Onun Oğlu İsa Məsih haqqında öyrənməlidir. Arzu edirik ki, bu kitab əbədi həyata aparan biliyi qazanmaqda sizə kömək etsin! 1 Yəhya 2:17; 1:7; Yəhya 5:28, 29; 3:16; 17:3; 19:5; Luka 23:43; Yaradılış 1:28; 1 Korinflilərə 15:24—28; Vəhy 20:1—3, 6—10; 21:3, 4; Yeşaya 9:6.

▪ Har-Magedondan sağ çıxanlar və onların uşaqları hansı gözəl işlə məşğul olacaqlar?

▪ Cənnətdə onlardan başqa daha kimlər yaşayacaq və İsa hansı mənada onlarla olacaq?

▪ Minilliyin sonunda yer üzündə vəziyyət necə olacaq və onda İsa nə edəcək?

▪ Şeytan ümmandan nə üçün azad ediləcək? Onu və onun ardınca gedənləri axırda nə gözləyir?

▪ İsa Məsih bizə necə əbədi həyat verə biləcək?