Məsihin gəlişinə dair Danielin peyğəmbərliyi

DANİEL peyğəmbər İsanın doğulmasından 500 ildən bir qədər əvvəl yaşamışdır. Yehova bu peyğəmbərə İsanın məsh ediləcəyi, yə’ni Məsih tə’yin ediləcəyi vaxtı dəqiq müəyyən etmək üçün mə’lumat vermişdi. Danielə deyilmişdi: «Bunu bil və anla: Yerusəlimi bərpa edib tikmək üçün verilən fərmanın çıxmasından məsh olunmuş hökmdara qədər yeddi yeddiillik dövr» və «altmış iki yeddiillik dövr» keçəcək (Daniel 9:25).

Məsihin gələcəyi vaxtı hesablamaq üçün ayədə xatırlanan dövrün nə vaxt başladığını müəyyən etmək lazımdır. Peyğəmbərlikdə deyilir ki, hesablamanı «Yerusəlimi bərpa edib tikmək üçün verilən fərmanın» çıxdığı vaxtdan aparmaq lazımdır. Bu fərman nə vaxt çıxdı? «Nehemya» kitabında deyildiyi kimi, Yerusəlimin divarlarının bərpa olunması haqqında fərman «Padşah Artaxşastanın hakimiyyətinin iyirminci ili»ndə çıxdı (Nehemya 2:1, 5-8). Tarixi mə’lumatlara əsasən, Artaxşasta padşahın hakimiyyətinin birinci ili b. e. ə. 474-cü ilə düşür. Nəticə e’tibarilə, onun hakimiyyətinin iyirminci ili b. e. ə. 455-ci ilə düşür. Bu, Danielin peyğəmbərliyində xatırlanan və Məsihin ­gələcəyi vaxtı hesablamağa kömək edən başlanğıc tarixdir.

Daniel «məsh olunmuş hökmdara» kimi nə qədər vaxt keçməli olduğunu göstərdi. Peyğəmbərlikdə «yeddi yeddiillik» və «altmış iki yeddiillik dövr»dən, yə’ni cəmi 69 yeddiillik dövrdən, yə’ni həftədən danışılır. Bu dövr, yə’ni həftə nə qədər davam etməli idi? Müqəddəs Kitabın bə’zi tərcümələrindən görünür ki, söhbət adi həftədən yox, illik həftədən gedir. İllik həftə yeddi ilə bərabərdir. Zaman vahidi kimi illik həftə anlayışı qədim yəhudilərə yaxşı tanış idi. Məsələn, hər yeddinci il İsraildə şənbə ili hesab edilirdi (Çıxış 23:10, 11). Beləliklə, peyğəmbərlikdə qeyd olunan 69 «yeddiillik» — hər biri yeddi ilə bərabər olan 69 dövrdür. Deməli, 69 «yeddiillik dövr» 483 ilə bərabərdir.

İndi gəlin vaxtı hesablayaq. Əgər b. e. ə. 455-ci ildən 483 ili hesablasaq, b. e. 29-cu ilinə gəlib çıxarıq. Məhz həmin il İsa vəftiz olundu və Məsih oldu!a (Luka 3:1, 2, 21, 22). Danielin peyğəmbərliyi necə də qeyri-adi şəkildə yerinə yetdi!