İsa qışdamı anadan olub?

MÜQƏDDƏS KİTABDA İsanın nə vaxt anadan olduğu deyilmir. Ancaq orada yazılanlardan görünür ki, o, qışda doğulmayıb.

İsanın doğulduğu Bet-Lexem şəhərində qışda hansı hava şəraiti müşahidə olunurdu? İbrani təqviminə əsasən, kislev ayında (noyabr-dekabr aylarına müvafiqdir) adətən soyuq və yağışlı hava olurdu. Ondan sonra tevet ayı (dekabr-yanvar) gəlirdi. Bu, ilin ən soyuq ayı idi və bə’zən bu vaxt Yəhudi yaylasında hətta qar yağırdı. Gəlin görək Müqəddəs Kitabda həmin ərazidə havanın necə keçdiyi haqda nə deyilir.

«Ezra» kitabından öyrənirik ki, kislev ayında hava həqiqətən də soyuq və yağmurlu keçirdi. Ezra yazır ki, «doqquzuncu ayın [kislev] iyirmisində» xalq Yerusəlimə toplaşmışdı. İnsanlar meydanda oturaraq, «yağışdan... əsə-əsə» deyirdi: «Yağış vaxtıdır, bayırda dayanmağa taqətimiz yoxdur» (Ezra 10:9, 13; Yeremya 36:22). O vaxt həmin ərazidə yaşayan çobanların öz sürüləri ilə qışda açıq səma altında gecələməmələrinin səbəbi aydındır.

Lakin Müqəddəs Kitabda deyilir ki, İsa doğulan gecə çobanlar çöldə qoyunlarını güdürdülər. Müjdəçi Luka yazır ki, çobanlar Bet-Lexem yaxınlığında «gecə çöldə öz sürülərinin keşiyini çəkirdilər» (Luka 2:8-12). Diqqət yetirin ki, çobanlar yalnız gündüzlər deyil, gecələr də çöldə qalırdılar. Onların sürüləri də bütün gecəni çöldə olurdu. Çobanlar qışda, soyuq və yağmurlu havada açıq səma altında yaşayardılarmı? Əlbəttə, yox! İsanın doğulması haqqında Müqəddəs Kitabda verilən mə’lumat göstərir ki, o, qışda doğulmayıba.

Müqəddəs Kitabda İsanın ölümünün dəqiq tarixi verilir, amma nə vaxt doğulduğuna işarə edən mə’lumat çox azdır. Süleyman padşahın sözləri yada düşür: «Yaxşı ad ətirli yağdan, ölüm günü isə doğum günündən yaxşıdır» (Vaiz 7:1). Buna görə də təəccüblü deyil ki, Müqəddəs Kitabda İsanın xidməti və ölümü haqqında təfsilatı ilə mə’lumat verildiyi halda, nə vaxt doğulduğu haqda, demək olar ki, heç nə deyilmir.