Keçmişdən nümunə. Timotey

Timotey doğma evini tərk etdi, ancaq onun məqsədi ailəsindən qaçmaq yox, xüsusi təyinatlı müjdəçi olan Pavellə əməkdaşlıq etmək idi. Çox güman ki, 20 yaşlarında olan Timotey artıq məsuliyyətli bir gənc idi. «Listra və Konya şəhərlərindəki qardaşlar [onun] haqqında ağızdolusu danışırdılar» (Həvarilərin işləri 16:2). Pavel Timoteyin Allaha xidmətdə böyük şeylərin öhdəsindən gələ biləcəyinə əmin idi. O yanılmadı! Növbəti illər ərzində Timotey bir çox yerlərə səyahət edərək yığıncaqlar təşkil edir və bacı-qardaşları ruhlandırırdı. Timoteyi Pavelə sevdirən onun gözəl xüsusiyyətləri idi. Hətta üstündən 11 il keçəndən sonra belə Pavel onun haqqında Filipililərə yazmışdı: «Sizin rifahınız üçün belə can yandıran başqa heç kimim yoxdur» (Filipililərə 2:20).

Sən də Allaha xidmətə can yandırırsanmı? Əgər belədirsə, əmin ol ki, səni böyük xeyir-dualar gözləyir! Yehova Allah «könüllü olaraq» özlərini Ona xidmətə həsr edən gəncləri çox qiymətləndirir (Məzmur 110:3). Üstəlik, O, ədalətsiz deyil və çəkdiyin zəhməti heç vaxt unutmaz! (İbranilərə 6:10).