Zindan gözətçisi Məsihə iman gətirir

Filippidə içinə cin girmiş bir qulluqçu qız yaşayır. Cin bu qızdan gələcəyi demək üçün istifadə edir. Bu qız gələcəyi deməklə ağalarına çoxlu pul qazandırır. Bulusla Sila Filippiyə gələndə bu qız günlərlə onların dalınca düşüb qışqırır: «Bunlar Allah-Taalanın qullarıdır». Axırda Bulus cinə deyir: «İsa Məsihin adı ilə əmr edirəm, qızdan çıx!» Elə o andaca cin qızdan çıxır.

Qızın ağaları başa düşəndə ki, daha qızın hesabına pul qazana bilməyəcəklər, çox qəzəblənirlər. Onlar Bulusla Silanı mülki məmurların yanına gətirib deyirlər: «Bu adamlar qanunu pozur və şəhər camaatını narahat edirlər!» Məmurlar Bulusla Silanı döyüb, zindana atmağa qərar verirlər. Gözətçi onları zindanın ən qaranlıq hissəsinə aparıb qandallayır.

Bulusla Sila Yehovaya həmd nəğmələri oxuyurlar. Digər məhbuslar da bunu eşidirlər. Birdən gecə yarısı güclü zəlzələ baş verir, zindanın bünövrəsi titrəyir. Zindanın qapıları taybatay açılır. Bütün dustaqların zəncirləri və qandalları açılıb düşür. Gözətçi zindanın daxili bölməsinə qaçır və qapıların açıq olduğunu görür. Həmin an o düşünür ki, məhbuslar qaçıb. Ona görə də qılıncını çıxarıb özünü öldürmək istəyir.

Bu an Bulus ona səslənir: «Özünə qıyma! Hamımız buradayıq!» Gözətçi içəri qaçıb Bulusla Silanın qabağında diz çökür. O, onlardan soruşur: «Xilas olmaq üçün nə etməliyəm?» Onlar gözətçiyə deyirlər: «Sən və evindəkilər İsaya iman gətirməlisiniz». Sonra Bulusla Sila onlara Yehovanın sözlərini öyrədirlər. Gözətçi və evindəkilər vəftiz olur.