Müqəddəs Kitabın əxlaq normaları ən yaxşı normalardırmı?

“CƏMİYYƏTİN, insanlara təhlükəsizlik hissi və rəhbərlik verən, dəyərli əsası olan sistemə ehtiyacı var”. Bu fikri, təcrübəli alman yazıçısı və telereportyoru qeyd etmişdir. Şübhəsiz, bu sözlər məntiqə uyğundur. Cəmiyyətin rifahı və sabit inkişafı üçün, möhkəm təməl - doğrunu yanlışdan, yaxşını pisdən ayırd edən ümumbəşəri normalar gərəkdir. Məsələ, cəmiyyət və onun üzvləri üçün hansı normaları ən yaxşı normalar hesab edilməsindədir.

Müqəddəs Kitabın əxlaq normaları hamı tərəfindən qəbul olunarsa, onlar rahat və xoşbəxt həyat sürməkdə insanlara kömək edəcəkdir. Nəticədə, bu normalara riayət edən insan cəmiyyəti daha sabit və xoşbəxt olacaqdır. Bu həqiqətən də belədirmi? Gəlin, Müqəddəs Kitabın iki vacib şey haqqında - nikahda sədaqət və gündəlik həyatda düzlük barədə dediklərini nəzərdən keçirək.

Həyat yoldaşınıza “bağlanın”

Yaradanımız əvvəlcə Adəmi, sonra isə ona köməkçi olaraq Həvvanı yaratdı. Bu, tarixdə möhkəm bağlılığı olacaq, ilk nikah idi. Allah dedi: “İnsan anasını və atasını buraxacaq və arvadına bağlanacaqdır və bir bədən olacaqlar”. Təxminən 4 000 il sonra, İsa Məsih nikahla əlaqədar bu əmri bütün davamçılarına təkrar etdi. O, həmçinin nikahdan kənar cinsi əlaqəni mühakimə etdi (Təkvin 1:27, 28; 2:24; Matta 5:27—30; 19:5).

Müqəddəs Kitaba əsasən, xoşbəxt nikahın iki vacib açarı, ərlə arvadın bir-birlərinə göstərdikləri məhəbbət və hörmətdir. Ailənin başı olan ər, arvadının qeydinə qalmaq üçün əlindən gələni edərək, təmənnasız məhəbbət təzahür etdirməlidir. Onunla “ağıllı” [“biliyə əsasən”, YD] rəftar etməli və “sərt davranmamalıdır”. Arvad isə ərinə dərin hörmət etməlidir. Əgər ərlə arvad bu prinsiplərə riayət edirlərsə, nikahda yaranan problemlərin çoxunu həll edər və ya onlara yol verməyə bilərlər. Beləliklə də ər arvadına, arvad isə ərinə “bağlanmağa” çalışacaqdır (1 Peter 3:1—7, İ—93; Koloslulara 3:18, 19; Efeslilərə 5:22—33).

Müqəddəs Kitabın həyat yoldaşına sədaqətli olmaq əmri, həqiqətənmi nikahın xoşbəxt olmasına kömək edir? Almaniyada keçirilən araşdırmanın nəticələrinə nəzər salaq. İnsanlardan, xoşbəxt nikah üçün hansı amillərin vacib olduğu soruşuldu. Onların əksəriyyəti qarşılıqlı sədaqətliliyi qeyd etdilər. Siz də razı deyilsinizmi ki, həyat yoldaşının sadiqliyinə əmin olanda, ərlə arvad özlərini daha xoşbəxt hiss edilər?

Əgər problemlər yaranarsa

Əgər ərlə arvad arasında ciddi fikir ayrılığı yaranarsa, onda necə? Bəs məhəbbət tədricən zəifləyərsə? Belə olduqda, boşanmaq daha yaxşı olmazdımı? Yoxsa Müqəddəs Kitabın, həyat yoldaşına sadiq qalmaq əmrinə tabe olmaq daha müdrik olardı?

Müqəddəs Kitabda, yazılmışdır ki, insanların qeyri-kamilliyi nəticəsində evli olanların hamısının çətinlikləri olacadır (1 Korinflilərə 7:28). Bununla belə, Müqəddəs Kitabın əxlaq normalarına riayət edən ər-arvadlar bir-birlərinin səhvlərini bağışlamağa və çətinlikləri birgə həll etməyə çalışırlar. Əlbəttə, zinakarlıq və ya ailədə zorakılıq kimi hallar mövcuddur ki, bu zaman məsihçi haqlı olaraq boşanmaq və ya ayrı yaşamaq barədə düşünə bilər (Matta 5:32; 19:9). Ancaq heç bir ciddi səbəb olmadan, yaxud bir başqası ilə evlənmək üçün tez-tələsik boşanmaq, eqoistliyi və başqalarına qarşı e’tinasızlığı göstərir. Şübhəsiz ki, bu cür əhval-ruhiyyə insanın həyatına sabitlik və xoşbəxtlik gətirmir. Bir nümunəni nəzərdən keçirək.

Piterə elə gəlirdi ki, onun nikahı əvvəlki təravətini itiriba. Buna görə də, arvadını tərk etdi və ərindən ayrılmış Monikanın yanına köçdü. Sonra nə oldu? Bir neçə aydan sonra Piter anladı ki, Monika ilə yaşamaq “heç də düşündüyü kimi asan deyil”. Nə üçün? İnsana xas olan çatışmazlıqlar, arvadı ilə münasibətlərində olduğu kimi, yeni rəfiqəsilə münasibətlərində də aydın görünürdü. Daha dəhşətlisi də odur ki, bu cür tələsik və eqoist bir qərar nəticəsində Piterin ciddi maliyyə çətinlikləri yarandı. Üstəlik, ailədə baş verən böyük dəyişikliklər üzündən Monikanın uşaqlarına güclü mə’nəvi zərbə vurulmuşdu.

Bu nümunədən köründüyü kimi, nikah gəmisi fırtına ilə qarşılaşanda, onu tərk etmək heç də problemlərin həlli demək deyil. Lakin Allahın Kəlamının əxlaq prinsiplərinə riayət etmək, ər-arvada çox vaxt həyati fırtınaları keçməyə və sakit limana gedən yolu tapmağa kömək edir. Tomas və Doris ilə də belə oldu.

Tomas həddindən artıq içməyə başlayanda, artıq 30 il idi ki, Dorislə evli idi. Dorisdə ruh düşkünlüyü yarandı və onların hər ikisi boşanma haqqında düşünürdülər. Doris dərdini Yeqovanın Şahidlərindən birinə açdı. Şahid, Müqəddəs Kitabın nikah haqqında dediklərini göstərərək, ayrılmağa tələsməməsini və əvvəlcə oturub əri ilə birlikdə çıxış yolu axtarmasını məsləhət gördü. Doris belə də etdi. Bir neçə aydan sonra, artıq boşanma haqqında heç söhbət belə edilmirdi. Tomas və Doris problemlərini birgə həll etməyə çalışırdılar. Müqəddəs Kitabın məsləhətlərini tətbiq etmək, onların nikahını möhkəmləndirdi və çətinliklərin öhdəsindən gəlməyə imkan verdi.

Hər şeydə dürüstlük

Həyat yoldaşına sədaqətli qalmaq üçün, mə’nəvi güc və ədalətli prinsiplərə qarşı məhəbbət tələb olunur. Düzlük olmayan bir dünyada təmiz qalmaq üçün də eyni xüsusiyyətlər gərəkdir. Müqəddəs Kitabda dürüstlük haqqında çox söhbət edilir. Həvari Pavel, Yəhudeyada yaşayan birinci əsrin məsihçilərinə yazırdı: “Hər cəhətcə özümüzü yaxşı aparmağa can atırıq” (İbranilərə 13:18). Bu nə deməkdir?

Dürüst insan həqiqəti söyləyir və saxtakarlıqdan uzaqdır. Başqalarına qarşı ədalətlidir: səmimidir, nəcibdir, yalan danışmır və hiylə işlətmir. Dürüst insan vicdanlıdır və dostlarını aldatmır. O, insanlar arasında e’tibarlı mühit yaradır və sağlam, möhkəm qarşılıqlı münasibətlərin inkişafına kömək edir.

Dürüst insanlar xoşbəxtdirlərmi? Onların xoşbəxt olmaları üçün səbəbləri var. Rüşvətxorluğun və yalanın geniş yayılmasına baxmayaraq - bəlkə də elə bu səbəbdən - dürüst insanlar başqalarını həmişə valeh edirlər. Gənclər arasında keçirilən sorğuda iştirak edənlərin 70 faizi, dürüstlüyü çox yaxşı xüsusiyyət adlandırıblar. Üstəlik, yaşımızdan asılı olmayaraq, hamımız dostlarımızda hər şeydən əvvəl dürüstlüyü qiymətləndiririk.

Kristina 12 yaşından oğurluğa öyrədilib. İllər keçdikcə o, peşəkar cib oğrusu oldu. Kristina deyir: “Elə gün olub ki, evə nağd 5 000 alman markası [2 200 ABŞ dolları] gətirmişəm”. Onu bir neçə dəfə həbs ediblər və o, həmişə həbsə düşmək təhlükəsi altında yaşayıbdır. Yeqovanın Şahidləri ona Müqəddəs Kitabın dürüstlük haqqında söylədiklərini açıqlayanda, Kristinanı Müqəddəs Kitabın əxlaq normaları cəlb etdi. O, “oğurluq edən artıq oğurlamasın” əmrinə tabe olmağı öyrəndi (Efeslilərə 4:28).

Kristina, vəftiz olaraq Yeqovanın Şahidi olanda, artıq oğru deyildi. Yeqovanın Şahidləri dürüstlüyə və başqa məsihçi xüsusiyyətlərinə üstünlük verdikləri üçün, o, hər şeydə özünü dürüst aparmağa çalışırdı. Bir qəzetdə belə yazılmışdı: “Dürüstlük, mülayimlik və qonşusuna məhəbbət kimi əxlaq normaları, Şahidlərin dinində olduqca çox qiymətləndirilir” (“Lausitzer Rundschau”). Həyatında baş verən dəyişikliklər haqqında Kristinanın özü nə fikirdədir? “Oğurluqdan əl çəkdiyim üçün indi daha çox xoşbəxtəm. Özümü cəmiyyətin ləyaqətli üzvü hesab edirəm”.

Bütün cəmiyyət üçün fayda

Həyat yoldaşına qarşı sədaqətli və dürüst olan insanlar, özləri xoşbəxt olmaqla bərabər, həm də ümumiyyətlə cəmiyyətə fayda gətirirlər. İş sahibləri, fırıldaqçılıqla məşğul olmayan insanları işə götürməyi üstün tuturlar. Biz hamımız qonşularımızın e’tibarlı olmasını istəyirik və dürüst insanların mağazalarından alış-veriş etməyi xoşlayırıq. Məgər rüşvətxorluq etməyən siyasətçilərə, polis və hakimlərə hörmət etmirikmi? Dürüstlük, cəmiyyətin üzvləri üçün mənfəət yox, prinsip məsələsi olduqda, cəmiyyətə daha çox fayda gətirir.

Bundan əlavə, həyat yoldaşına sədaqətli olmaq - möhkəm ailələrin təməlidir. Bir çox insanlar avropalı siyasətçinin sözləri ilə razılaşacaqlar: “[Ən’ənəvi] ailə, bu günə qədər də insanın təhlükəsizlik və həyatın mə’nasını əldə edə biləcəyi əsas liman olaraq qalır”. Böyüklərin və uşaqların, özlərini psixoloji cəhətdən təhlükəsiz hiss etmək imkanları olanda, ailədə sülh hökm sürür. Buna görə də, həyat yoldaşına sadiq olanlar, cəmiyyətin sabitliyinə kömək edirlər.

Düşünün! Tərk edilmiş həyat yoldaşları, boşanma üçün müraciət edilən məhkəmələr və uşaqları qəyyumluğa götürmək üçün məhkəmə işləri olmasaydı, hamı üçün necə də yaxşı olardı. Bəs cib oğruları, fırıldaqçılar, mağaza oğruları, həmçinin satqın mə’murlar və saxtakar elm adamları olmasa necə? Bu sadəcə bir arzudurmu? Müqəddəs Kitabla və orada gələcək haqqında deyilənlərlə dərindən maraqlanan insanlar belə düşünmürlər. Allahın Kəlamı və’d edir ki, Yeqovanın Xilaskar Padşahlığı tezliklə bütün yer üzünü idarə edəcək. Bu Padşahlığın hökmranlığı altında onun vətəndaşları, Müqəddəs Kitabın əxlaq normalarına uyğun yaşamağa öyrədiləcəklər. O zaman, “salehlər yeri miras alar və onda əbədiyyən yaşayarlar” sözləri yerinə yetəcək (Məzmur 37:29).

Müqəddəs Kitabın əxlaq normaları ən yaxşısıdır

Müqəddəs Yazılarla yaxından tanış olan milyonlarla insanlar, Müqəddəs Kitabın məsləhətlərinin, insan düşüncəsindən qat-qat üstün olan Allahın müdrikliyinə əsaslandığını dərk etdilər. Bu insanlar, Müqəddəs Kitabın e’tibara layiq və onun prinsiplərinin bizim günlərimizdə həyat üçün vacib olduğuna əmindirlər. Onlar bilirlər ki, Allahın Kəlamındakı məsləhətləri dinləmək çox faydalıdır.

Buna görə də, onlar Müqəddəs Kitabın məsləhətlərinə diqqət yetirirlər: “Bütün ürəyinlə RƏBBƏ güvən və öz anlayışına arxalanma; bütün yollarında onu tanı, O da sənin yollarını doğruldar” (Süleymanın məsəlləri 3:5, 6). Belə davranaraq, bu insanlar daha da xoşbəxt olur və başqalarına da xoşbəxtlik bəxş edirlər. Onlar, bütün bəşəriyyətin Müqəddəs Kitabın əxlaq normalarına əsasən yaşayacağı “gələcək həyata” möhkəm əminlik inkişaf etdirirlər (1 Timoteyə 4:8).

[Haşiyə]

[5-ci səhifədəki şərh]

Müqəddəs Kitabın əxlaq prinsiplərinə riayət etmək, çox vaxt ər-arvada həyati fırtınaları keçməyə və sakit limana gedən yolu tapmağa kömək edir.

[6-cı səhifədəki şərh]

Rüşvətxorluğun və yalanın geniş yayılmasına baxmayaraq - bəlkə də elə bu səbəbdən - dürüst insanlar başqalarını həmişə valeh edirlər.