Yaşlılar məsihçi qardaşlığımızın qiymətli üzvləridir
“Rəbbin evində əkilmişdirlər... çiçəklənəcəklər. Qocalıqda da meyvə verəcəklər” (MƏZMUR 92:13, 14).
1. Bir çox insanlar yaşlılara necə münasibət göstərirlər?
YEHOVA sadiq xidmətçilərinin hamısını, o cümlədən yaşlı olanları da sevir. Lakin hesablamalara əsasən, Birləşmiş Ştatlarda hər il yarım milyona yaxın yaşlı adam kobud və ya e’tinasız münasibətdən əziyyət çəkir. Dünyanın başqa hissələrindən verilən oxşar hesabatlar göstərir ki, yaşlılarla bu cür təhqiredici rəftar qlobal problemdir. Bir təşkilatın fikrinə görə, problemin kökü “yaşlıların artıq heç bir şeyə yaramadıqlarına, səmərəli surətdə işləyə bilmədiklərinə və başqalarından çox asılı olduqlarına dair geniş yayılmış nöqteyi-nəzərlərin olmasındadır”.
2. a) Yehova Özünün yaşlı olan sadiq xidmətçilərinə necə münasibət göstərir? b) Məzmur 92:12-15 ayələrində hansı tə’sirli sözləri tapırıq?
2 Yehova Allah yaşlı olan sadiq xidmətçilərini yüksək qiymətləndirir. O, diqqətini bizim məhdud imkanlarımıza deyil, ruhani vəziyyətimizə — “daxili varlığımıza” yönəldir (2 Korinflilərə 4:16). Onun Kəlamı olan Müqəddəs Kitabda bu cür tə’sirli təsvir tapırıq: “Saleh adam xurma ağacı kimi bitəcəkdir; Libnandakı [Livandakı] sidr ağacı kimi böyüyəcəkdir. Rəbbin evində əkilmişdirlər; Allahımızın həyətlərində çiçəklənəcəklər. Qocalıqda da meyvə verəcəklər; yaş və təzə olacaqlar; ta ki, Rəbbin doğru olduğunu e’lan etsinlər” (Məzmur 92:12-15). Bu ayələrin nəzərdən keçirilməsi, siz yaşlı bacı və qardaşların məsihçi qardaşlığı üçün hansı dəyərli yardımı edə biləcəyinizi göstərəcək.
“Qocalıqda da meyvə verəcəklər”
3. a) Salehlər nəyə görə xurma ağacları ilə müqayisə olunurlar? b) Yaşlı adamlar üçün ‘qocalıqda da meyvə vermək’ necə mümkündür?
3 Məzmurçu salehləri “Rəbbin evində əkilmiş” xurma ağacları ilə müqayisə edir. Onlar “qocalıqda da meyvə verəcəklər”. Məgər bunun ruhlandırıcı fikir olduğu ilə razı deyilsinizmi? Müqəddəs Kitabın yazıldığı dövrlərdə Şərqdə qəşəng, qamətli xurma ağacları həyətlərin adi bəzəyi idi. Bundan başqa, onlar yalnız gözəlliyinə görə deyil, həm də çoxlu meyvə verdiklərinə görə qiymətləndirilirdi. Bə’zi ağaclar yüz ildən artıq meyvə verirdia. Həqiqi ibadətdə möhkəm “əkilmiş” qalaraq, siz də “hər cür xeyirli işdə səmərə” verə bilərsiniz (Koloslulara 1:10).
4, 5. a) Məsihçilərin hansı vacib bəhrəni təqdim etmələri zəruridir? b) “Dodaqların bəhrəsini” təqdim edən yaşlı adamların Müqəddəs Kitab nümunəsini göstərin.
4 Yehova məsihçilərdən “dodaqların bəhrəsini” təqdim etmələrini, yə’ni Onu izzətləndirmələrini və Onun niyyətləri barəsində bəyan etmələrini gözləyir (İbranilərə 13:15). Bu sizə, yaşlı insanlara, aiddirmi? Şübhəsiz.
5 Müqəddəs Kitabda Yehovanın ismi və niyyətləri barədə cəsarətlə şahidlik edən yaşlı insanların nümunələri var. Yehova Musanı Öz peyğəmbəri və nümayəndəsi tə’yin edəndə, onun ‘yetmiş ildən’ artıq yaşı vardı (Məzmur 90:10; Çıxış 4:10-17). Yaşının çox olması, Yehovanın hökmranlığı barəsində cəsarətlə şahidlik verməkdə peyğəmbər Danielə mane olmadı. Belşatsar divardakı müəmmalı yazını oxumaq üçün Danieli də’vət edəndə, Danielin, ehtimal ki, 90-dan artıq yaşı vardı (Daniel 5-ci fəsil). Bəs ahıl yaşlı həvari Yəhya haqqında nə demək olar? Sədaqətlə yerinə yetirdiyi xidmətinin sonuna yaxın o, “Allahın kəlamı və İsa Məsihin şəhadəti üçün” Patmos adasında həbsdə idi (Vəhy 1:9). Çox güman ki, siz, yaşlı vaxtında “dodaqların bəhrəsini” təqdim edən digər Müqəddəs Kitab personajlarını da yada salacaqsınız (1 Samuel 8:1, 10; 12:2; 1 Krallar 14:4, 5; Luka 1:7, 67-79; 2:22-32).
6. Bu son günlərdə Yehova peyğəmbərlik edən “qocalardan” necə istifadə edir?
6 Qədim İbrani peyğəmbəri Yoeli sitat gətirərək həvari Peter bəyan etdi: “Allah deyir: Son günlərdə [“qocalarınız” da daxil olmaqla] bütün bəşər üzərinə Ruhumdan tökəcəyəm... və peyğəmbərlik edəcəklər” (Həvarilərin işləri 2:17, 18; Yoel 2:28). Buna müvafiq olaraq bu gün, son günlərdə, Yehova Öz niyyətlərini bəyan etmək üçün məsh edilmişlər sinfinin və “başqa qoyunların” yaşlı üzvlərini istifadə edir (Yəhya 10:16). Onlardan bə’ziləri onilliklərlə Padşahlığın bəhrəsini sədaqətlə təqdim edirlər.
7. Çətinliklərinin olmasına baxmayaraq, Padşahlıq bəhrəsini təqdim etməyə davam edən yaşlı adamların nümunələrini söyləyin.
7 1941-ci ildə Padşahlığın tammüddətli təbliğçisi olan Sonyanın nümunəsini nəzərdən keçirək. Uzun müddət xroniki xəstəliklə mübarizə aparmasına baxmayaraq, o, müntəzəm surətdə öz evində Müqəddəs Kitab öyrənməsi keçirirdi. Sonya bunları deyirdi: “Xoş xəbəri təbliğ etmək mənim həyatımın bir hissəsidir. Daha doğrusu, həyatımın özüdür. Təbliğ etməyi dayandırmaqdan vaz keçirəm”. Bu yaxınlarda Sonya və bacısı Oliv xəstəxananın gözləmə otağında sağalmaz xəstəliyi olan Canet adlı bir qadınla qarşılaşmış və Müqəddəs Kitabın xoş xəbərini bölüşmüşlər. Canetə göstərilən xeyirxahlıq onun mö’min katolik olan anasına o qədər güclü təəssürat bağışlamışdır ki, o, Müqəddəs Kitabı öyrənmək təklifinə razılıq vermişdir və hal-hazırda gözəl nailiyyətlər edir. Padşahlıq bəhrəsini təqdim etmək üçün, siz də buna bənzər hallardan istifadə edə bilərdinizmi?
8. Yaşlı Kaleb Yehovaya bel bağladığını necə göstərdi və yaşlı məsihçilər onu necə təqlid edə bilərlər?
8 Qocalıqla əlaqədar məhdudiyyətlərinin olmasına baxmayaraq, Padşahlıq haqqındakı təbliğ işində qətiyyət və cəsarətlə iştirak etməklə yaşlı məsihçilər, 40 il müddətində səhrada Musanı müşayiət edən sadiq Kalebin izləri ilə gedirlər. İordan çayını keçib, Və’d edilmiş diyara daxil olanda Kalebin 79 yaşı vardı. İsrailin yenilməz ordusunda altı il vuruşduqdan sonra, Kaleb rahat yaşaya bilərdi. Lakin yox, o, Yəhudeyanın dağlıq ərazisində olan “böyük və divarlı şəhərlərin” alınması kimi çətin tapşırığı yerinə yetirməyi cəsarətlə öz üzərinə götürdü. Həmin ərazi, ucaboylu Anakların məskəni idi. Yehovanın köməyi ilə Kaleb həqiqətən də ‘Rəbbin söylədiyi kimi onları qovdu’ (Yeşu 14:9-14; 15:13, 14). Əmin olun ki, siz yaşlı vaxtınızda Padşahlığın bəhrəsini təqdim etməyə davam edəndə, Kaleblə olduğu kimi, Yehova sizinlədir. Və əgər siz sadiq qalarsınızsa, O, və’d edilmiş yeni dünyada sizə yer verəcəkdir (İşaya 40:29-31; 2 Peter 3:13).
“Sapsağlam, təravətli olacaqlar”
9, 10. Yaşlı məsihçilər imanda necə sağlam qalırlar və ruhani fəallıqlarını necə qoruyub saxlayırlar? (11-ci səhifədə olan çərçivəyə baxın.)
9 Yehovanın yaşlı xidmətçilərinin səmərəli olduqlarına diqqət yetirərək, məzmurçu oxuyurdu: “Salehlər xurma ağacıtək çiçəklənəcək, Livandakı sidr ağacıtək uca olacaq... Saçları ağaranda da bar verəcəklər, sapsağlam, təravətli olacaqlar” (Məzmur 92:12, 14).
10 Ahıl yaşınıza baxmayaraq, siz ruhani gümrahlığınızı necə qoruyub saxlaya bilərsiniz? Xurma ağacının tükənməz gözəlliyinin sirri ondadır ki, daima şirin suyun mənbəyinə yaxın bitir. Eyni surətdə, siz Allahın Kəlamını öyrənərək və Allahın təşkilatı ilə ünsiyyətdə olaraq, ruhani qüvvəni Müqəddəs Kitabın həqiqət sularından əldə edə bilərsiniz (Məzmur 1:1-3; Yeremya 17:7, 8). Sizin ruhani fəallığınız, sizi həmimanlılarınız üçün çox qiymətli edir. Bunun yaşa dolmuş baş kahin Yehoyada ilə necə baş verdiyini nəzərdən keçirək.
11, 12. a) Yəhuda padşahlığının tarixində Yehoyada hansı vacib rolu oynamışdır? b) Həqiqi ibadətin maraqları üçün Yehoyada öz nüfuzundan necə istifadə edirdi?
11 Şöhrətpərəst şahzadə Atalya öz nəvələrini öldürüb, Yəhudeyada hakimiyyəti ələ keçirəndə, Yehoyadanın, ehtimal ki, yüzdən artıq yaşı vardı. Yaşa dolmuş Yehoyada nə edə bildi? O və arvadı taxtın yeganə sağ qalmış varisi Yehoaşı altı il mə’bəddə gizlətdilər. Bundan sonra Yehoyada qəti bir addım atdı — yeddi yaşlı Yehoaşı padşah e’lan etdi, Atalyanı isə öldürməyi əmr etdi (2 Tarixlər 22:10-12; 23:1-3, 15, 21).
12 Padşahın himayəçisi kimi, Yehoyada öz nüfuzundan həqiqi ibadətin maraqları üçün istifadə edirdi. “Yehoyada, özü və bütün xalqla padşah arasında, Rəbbin xalqı olsunlar deyə, əhd kəsdi”. Yehoyadanın əmrinə görə xalq yalançı allah olan Baalın evini uçurtdu və onun qurbangahlarını, bütlərini və kahinlərini məhv etdi. Həm də Yehoyadanın rəhbərliyi altında Yehoaş mə’bəd xidmətlərini bərpa etdi və mə’bəd üçün olduqca zəruri olan tə’miri elətdirdi. “Yehoaş, bütün günlərində kahin Yehoyada ona öyrətdiyi müddətdə Rəbbin gözündə doğru olanı etdi” (2 Tarixlər 23:11, 16-19; 24:11-14; 2 Krallar 12:2). Yehoyada 130 yaşında öləndə, “İsraildə və Allahla evi uğrunda yaxşılıq” etdiyi üçün, ona xüsusi şərəf verərək padşahların yanında basdırdılar (2 Tarixlər 24:15, 16).
13. Yaşlı məsihçilər ‘Allahla evi uğrunda yaxşılığı’ necə edə bilərlər?
13 Ola bilər ki, pis sağlamlıq və ya digər şəraitlər ucbatından sən həqiqi ibadətin maraqları üçün çox çalışmaq qüvvəsində deyilsən. Buna baxmayaraq, sən “Allahla evi uğrunda yaxşılıq” edə bilərsən. Sən yığıncaq görüşlərinə gəlməklə və onlarda iştirak etməklə, həmçinin gücün çatdığı qədər təbliğ xidməti ilə məşğul olmaqla Yehovanın ruhani evi üçün sə’y göstərə bilərsən. Əgər sən Müqəddəs Kitabın nəsihətlərini hazırlıqla qəbul edirsənsə, həmçinin “sadiq və ağıllı qulu” və yığıncağı sədaqətlə dəstəkləyirsənsə, bu, məsihçi qardaşlığını möhkəmləndirəcəkdir (Matta 24:45-47). Sən həm də həmimanlılarını “məhəbbətə və xeyirli işlərə” təşviq edə bilərsən (İbranilərə 10:24, 25; Filimona 8, 9). Əgər həvari Pavelin növbəti məsləhətinə müvafiq davranırsansa, başqaları üçün xeyir-dua olacaqsan: “Qoca kişilər ayıq, vüqarlı, təmkinli, imanda, məhəbbətdə və dözümdə sağlam olsunlar; qadınlar da eyni şəkildə müqəddəslərə layiq tərzdə davransınlar, iftiraçı, şərab düşkünü olmasınlar və xeyirxahlıq tə’lim etsinlər” (Titusa 2:2-4).
14. Uzun müddət ağsaqqal kimi xidmət edən qardaşlar həqiqi ibadətin maraqları üçün nə edə bilərlər?
14 Sən yığıncaqda uzun illər ərzində ağsaqqal kimi xidmət edirsənmi? Yığıncaqda artıq uzun müddət ağsaqqal kimi xidmət edən qardaş məsləhət edir: “İllərlə əldə edilən müdriklikdən başqalarının rifahı üçün istifadə et. Məs’uliyyəti başqalarına ötür və təcrübəni hazırlıq ruhu əks etdirənlərlə bölüş... Başqalarında olan gizli qabiliyyətləri görməyə çalış. Onları inkişaf etdir və yetişdir. Gələcək üçün təməl qoy” (Təsniyə 3:27, 28). Padşahlığın genişlənməkdə olan işinə sənin səmimi marağın, məsihçi qardaşlığımızın digər üzvlərinə çoxlu xeyir-dualar gətirəcək.
“Rəbbin doğru olduğunu e’lan etsinlər”
15. Yaşlı məsihçilər “Rəbbin doğru olduğunu” necə e’lan edirlər?
15 Allahın yaşlı xidmətçiləri ‘Rəbbin doğru olduğunu e’lan etmək’ vəzifələrini sevinclə yerinə yetirirlər. Əgər sən ahıl yaşdasansa, sənin sözlərin və əməllərin, Yehovanın sənin ‘qayan’ olduğunu və Onda ‘haqsızlıq olmadığını’ göstərə bilər (Məzmur 92:15). Xurma ağacları öz Yaradanının gözəl xüsusiyyətləri barədə səssiz olaraq şahidlik edir. Sənə isə Yehova, hal-hazırda həqiqi ibadəti qəbul edən insanlara təbliğ etməyi e’tibar edib (Təsniyə 32:7; Məzmur 71:17, 18; Yoel 1:2, 3). Bu nəyə görə vacibdir?
16. Müqəddəs Kitabın hansı nümunəsi ‘Rəbbin doğru olduğunu e’lan etməyin’ vacibliyini göstərir?
16 İsrailin rəhbəri Yeşu ‘qocaldığı və yaşda irəlilədiyi zaman’, “bütün İsrail ixtiyarlarını və başlarını və hakimlərini və rəislərini çağırdı” və onlara Allahın saleh işləri barəsində xatırlatdı. O dedi: “Allahınız Rəbbin haqqınızda söylədiyi bütün yaxşı şeylərdən heç bir şey boşa çıxmadı; sizin üçün hamısı oldu” (Yeşu 23:1, 2, 14). Müəyyən bir müddət ərzində bu sözlər israillilərin sadiq qalmaq əzmini möhkəmlətdi. Lakin Yeşunun ölümündən sonra, “Rəbbi və İsrail üçün etmiş olduğu işi bilməyən başqa bir nəsil törədi. Və İsrail oğulları Rəbbin gözündə pis olanı etdilər və Baallara qulluq etdilər” (Hakimlər 2:8-11).
17. Yehova Öz xalqının rifahı üçün keçmişdə və bizim günlərdə hansı işləri görmüşdür?
17 Bugünkü məsihçi yığıncağının sadiqliyi Allahın yaşlı xidmətçilərinin öyüdlərindən asılı deyil. Buna baxmayaraq, Allahın Öz xalqı üçün keçmişdə və bu son günlərdə etdiyi ‘bütün böyük işləri’ barəsində şahidlərin dilindən eşidəndə, Yehovaya və Onun və’dlərinə olan imanımız möhkəmlənir (Hakimlər 2:7; 2 Peter 1:16-19). Əgər sən artıq çoxdan Yehovanın təşkilatının üzvüsənsə, yaşadığın ərazidə və ya ölkədə Padşahlığın təbliğçilərinin az olduğu və ya təbliğ işinə güclü müqavimət göstərildiyi vaxtları yadına sala bilərsən. İllər ötdükcə Yehovanın bu və ya digər maneələri aradan necə qaldırdığını və Padşahlıq işinin artımını ‘tezləndirdiyini’ görürsən (İşaya 54:17; 60:22). Müqəddəs Kitab həqiqətlərinə necə aydınlıq gətirildiyinə və Allahın təşkilatının görünən hissəsinin tədricən necə təmizləndiyinə diqqət yetirmisən (Süleymanın məsəlləri 4:18; İşaya 60:17). Yehovanın saleh işlərinə dair təcrübəni başqaları ilə bölüşərək, onları inkişaf etdirməyə çalışırsanmı? Bu, məsihçi qardaşlığını nə qədər ruhlandıracaq və möhkəmləndirəcək!
18. a) ‘Rəbbin doğru olduğunu e’lan edən’ adamın sözlərinin uzunsürən tə’sirə malik olduğuna dair nümunə söyləyin. b) Yehovanın salehliyinə şəxsi təcrübənizdə necə əmin olmusunuz?
18 Bəs şəxsən sən özün Yehovanın sevən qayğısını və rəhbərliyini hiss etdiyin anlar olubmu? (Məzmur 37:25; Matta 6:33; 1 Peter 5:7). Marta adında yaşlı bir bacı, başqalarını bu sözlərlə ruhlandırmağı xoşlayırdı: “Hər nə olsa da, Yehovanı heç zaman tərk etmə. O sənə dayaq olacaq”. Bu məsləhət, Müqəddəs Kitabı Marta ilə öyrənərək 1960-cı illərin əvvəllərində vəftiz olunan Tolminaya güclü təəssürat bağışlamışdır. Tolmina xatırlayır: “Ərim vəfat edəndə, mən tamamilə ruhdan düşdüm. Lakin həmin sözlər mənə, heç bir məsihçi görüşünü buraxmamaq qətiyyətini verdi. Xidməti davam etdirmək üçün Yehova həqiqətən də mənə güc verdi”. Tolmina həmin məsləhəti, növbəti illər ərzində Müqəddəs Kitabı öyrənməkdə kömək etdiyi bir çox adamlara təkrar edirdi. Şübhəsiz ki, həmimanlıları ruhlandırmaqla və Yehovanın doğru işləri barəsində onlara danışmaqla, sən onların imanını çox möhkəmləndirə bilərsən.
Yehova sadiq olan yaşlı xidmətçilərini yüksək qiymətləndirir
19, 20. a) Yehova Özünün yaşlı xidmətçilərinin fəaliyyətinə hansı nöqteyi-nəzərlə yanaşır? b) Növbəti məqalədə nə müzakirə olunacaq?
19 Minnətdarlıq hissi çatışmayan bugünkü dünyanın yaşlı adamlar üçün vaxtı tamam azdır (2 Timoteyə 3:1, 2). Əgər onları xatırlayırlarsa da, çox vaxt onların qabaqkı nailiyyətlərinə — onların indi yox, əvvəllər kim olduqlarına görə xatırlayırlar. Bunun əksinə olaraq, Müqəddəs Kitabda deyilir: “Allah haqsız deyildir ki, sizin işinizi, müqəddəslərə xidmət etmiş və edərək Onun adı naminə göstərdiyiniz məhəbbəti unutsun” (İbranilərə 6:10). Əlbəttə ki, Yehova Allah sizin keçmiş sadiq işlərinizi xatırlayır. Lakin O həm də, xidmətdə indi etdikləriniz üçün sizi qiymətləndirir. Onun üçün sadiq yaşlı məsihçilər bəhrəli, imanda sağlam və gümrahdırlar; onlar Allahın qüvvəsinə canlı şəhadətdirlər (Filipililərə 4:13).
20 Yehovanın bizim məsihçi qardaşlığımızın yaşlı üzvlərinə olan nöqteyi-nəzərinə sən də şəriksənmi? Əgər belədirsə, səndə onlara məhəbbət təzahür etdirmək arzusu olacaq (1 Yəhya 3:18). Növbəti məqalədə, yaşlı insanların tələbatlarına qayğı göstərərək onlara məhəbbət təzahür etdirməyin bə’zi praktiki üsullarını nəzərdən keçirəcəyik.
[Haşiyə]
a Xurmanın hər budağında minə yaxın ayrıca meyvə ola bilər və çəkisi 8 kiloqram və ya daha artıq gələ bilər. Bir yazıçı hesablamışdır ki, “meyvə verən hər bir [xurma] ağac ömrü ərzində sahibinə iki-üç ton xurma verir”.
Necə cavab verərdiniz?
• Yaşlılar hansı tərzdə “meyvə verirlər”?
• Yaşlı məsihçilərin ruhani fəallığı nəyə görə çox qiymətləndirilir?
• Yaşlı adamlar “Rəbbin doğru olduğunu” necə e’lan edə bilərlər?
• Nəyə görə Yehova, Ona uzun müddət xidmət edənləri yüksək qiymətləndirir?
[11-ci səhifədəki çərçivə]
Onlar imanda necə sağlam qalırlar?
Xidmətdə çoxillik təcrübəsi olan məsihçilərə imanda sağlam qalmaqda və ruhani gümrahlıqlarını qoruyub saxlamaqda nə kömək edir? Aşağıda onlarda bə’zilərinin sözləri gətirilir:
“Bizim Yehova ilə münasibətlərimiz haqqında bəhs edən Müqəddəs Kitab ayələrini oxumaq çox vacibdir. Demək olar ki, hər axşam mən Məzmur 23 və 91-ci fəsilləri əzbər təkrarlayıram” (Oliv, 1930-cu ildə vəftiz olunub).
“Mən qarşıma məqsəd qoymuşam ki, vəftiz olunanlar üçün söylənilən hər mə’ruzədə iştirak edim və diqqətlə qulaq asım; sanki mən də vəftiz olunacağam. Sadiq qalmaq üçün Allaha həsr olunmamızı yaddaşımızda təzələmək çox vacibdir” (Harri, 1946-cı ildə vəftiz olunub).
“Hər gün dua etmək, Yehovadan həmişə kömək, müdafiə, xeyir-dua diləmək və ‘bütün yollarında Onu tanımaq’ olduqca vacibdir” (Süleymanın məsəlləri 3:5, 6) (Antonio, 1951-ci ildə vəftiz olunub).
“Yehovaya uzun illər xidmət etdikdən sonra da sədaqətlə xidmət edən adamların söhbətlərinə qulaq asaraq, mən Ona sadiq qalmaq əzmində möhkəmlənirəm” (Joan, 1954-cü ildə vəftiz olunub).
“Vacibdir ki, biz özümüz haqqında çox düşünməyək. Malik olduğumuz hər şeyi Allahın xeyirxahlığı sayəsində almışıq. Bu cür nöqteyi-nəzərə malik olaraq, biz ruhani qidanı düzgün mənbədən axtaracağıq, ruhani qida isə, sona qədər tab gətirmək üçün zəruridir” (Arlin, 1954-cü ildə vəftiz olunub).
[9-cu səhifədəki şəkil]
Yaşlılar Padşahlığın qiymətli bəhrəsini təqdim edirlər.
[10-cu səhifədəki şəkil]
Yaşlıların ruhani fəallığı çox qiymətləndirilir.