Allah Nuha nəyə görə lütf göstərdi? Bu, bizi nə üçün maraqlandırmalıdır?

VACİB xəbər eşitdiyimiz günü yaxşı xatırlayırıq. Biz bütün təfsilatları — həmin vaxt harada və nə işlə məşğul olduğumuzu, həmçinin xəbərə necə reaksiya göstərdiyimizi unutmuruq. Şübhə yoxdur ki, Kainatın Hökmdarı Yehova Allahdan vacib xəbər aldığı gün heç vaxt Nuhun yadından çıxmamışdı. Məgər bundan vacib xəbər ola bilərdimi? Yehova ona ‘bütün canlıları’ məhv etmək niyyətində olduğunu bildirdi. Nuh özünü, ailəsini və cürbəcür heyvanları xilas etmək üçün nəhəng bir gəmi tikməli idi (Yaradılış 6:9-21).

Nuh Allahın dediklərinə necə münasibət göstərdi: sevindi, yoxsa narazılığını bildirdi? O həmin xəbəri arvad-uşağına necə çatdırdı? Müqəddəs Kitabda bu barədə heç nə deyilmir. Orada yalnız bunu oxuyuruq: «Nuh hər şeyi etdi: Allah ona necə əmr etmişdisə, o da hər şeyi eləcə yerinə yetirdi» (Yaradılış 6:22).

Bu sözlər olduqca vacibdir, çünki onlardan Nuhun nəyə görə Allahın gözündə lütf tapdığını öyrənirik; Nuh Allahın hər bir sözünü canla-başla yerinə yetirməyə hazır idi (Yaradılış 6:8). O, daha nəyə görə Allahın lütfünü qazandı? Bu suala cavab tapmaq çox vacibdir, çünki biz, Allah yer üzünü bir daha pisliklərdən təmizləyəndə xilas olmaq üçün Nuh kimi olmalıyıq. İlk növbədə, gəlin görək Daşqından öncə Nuh hansı çətinliklərlə üzləşirdi.

Cinlər yerə enir

Nuh bəşər tarixinin əvvəlində yaşamışdı. O, ilk insanın yaradılmasından təxminən min il sonra anadan olmuşdu. O zamankı adamlar bu gün bir çoxlarının təsəvvür etdiyi kimi — tüklü, kütbeyin, əllərində dəyənək və qabağa əyilmiş halda gəzən mağara adamları deyildilər. Onlar dəmirdən və tuncdan alətlər düzəldirdilər və Nuh, çox ehtimal ki, gəmini tikəndə bunlardan istifadə etmişdi. Artıq musiqi alətləri də mövcud idi. İnsanlar evlənir, uşaqlar böyüdür, əkinçiliklə məşğul olur, mal-qara saxlayır və alış-veriş edirdilər. Bu sahələrdə o dövrdəki yaşayış bizimkinə oxşayır (Yaradılış 4:20-22; Luka 17:26-28).

Amma müəyyən fərqlər də vardı. Məsələn, o zaman insanlar olduqca çox yaşayırdılar. İnsanın 800 ildən çox yaşaması qeyri-adi sayılmırdı. Nuh 950, Adəm 930, Nuhun babası Metuşelah isə 969 il yaşamışdıa (Yaradılış 5:5, 27; 9:29).

Digər fərq Yaradılış 6:1, 2 ayələrində yazılıb: «İnsanlar yer üzündə çoxalmağa başladı və onların qızları doğuldu. O zaman Allah oğulları gördülər ki, insan qızları çox gözəldir və bəyəndikləri hər qızı özlərinə arvad etdilər». «Allah oğulları» göydən enən mələklər idi, onlar insan donuna girərək insanlar arasında məskunlaşdılar. Onlar nə Allah tərəfindən göndərilmişdilər, nə də insanlara xeyir gətirmək üçün yerə etmişdilər. Əksinə, bu mələklər gözəl qadınlarla cinsi əlaqəyə girmək məqsədilə göydəki ‘məskənlərini tərk etdilər’ və cin oldular (Yəhuda 6).

Üsyankar, pozğun və fövqəlbəşəri gücə və zəkaya malik olan bu cin mələklər insanlara çox pis təsir göstərirdilər. Görünür, onlar insan cəmiyyəti üzərində hökmranlıq edirdilər. Cinlər, kimliyini gizlədən və işlərini gizlicə görən cinayətkar kimi fəaliyyət göstərmirdilər. Əksinə, heç bir vicdan əzabı çəkmədən açıq-aşkar Allahın qayda-qanunlarına qarşı çıxırdılar.

Allahın bu səmavi oğullarının qadınlarla cinsi əlaqəsi nəticəsində doğulan uşaqlar böyüyüb qeyri-adi gücə malik olurdular. Onlar ibrani sözü olan «Nefilim» adı ilə tanınırdılar. Biz oxuyuruq: «Həmin dövrdə və Allah oğulları insan qızlarını arvad alıb övladları doğulan dövrdə də yer üzündə böyük adamlar [‘Nefilimlər’, KM] yaşayırdı. Bunlar qədim dövrün qəhrəman və adlı-sanlı adamları idi» (Yaradılış 6:4). Nefilimlər çox qorxulu idilər. Bu sözün mənası «yıxanlar», yəni başqalarının yıxılmasına səbəb olanlar deməkdir. Onlar, qəddar əməlləri qədim əfsanə və nağıllarda əks olunan qatillər idi.

Saleh insanın əzabı

Müqəddəs Kitab göstərir ki, həmin nəslin pozğunluğu dərin kök salmış və geniş yayılmışdı. Orada yazılıb: «Yer üzündəki insanların şər əməlləri çoxdur və hər zaman onların ürəyindəki fikirlər və niyyətlər pisliyə doğru yönəlir... Dünya zorakılıqla dolmuşdu... Bütün bəşər yolunu azmışdı» (Yaradılış 6:5, 11, 12).

Nuh belə dünyada yaşayırdı. Ətrafındakı insanlardan fərqli olaraq, «Nuh saleh... bir adam idi. O, Allaha yaxın idi» (Yaradılış 6:9). Saleh insana saleh olmayan cəmiyyətdə yaşamaq asan deyil. İnsanların sözləri və əməlləri Nuhu necə də mütəəssir etməli idi! Çox ehtimal ki, o, Daşqından sonra yaşamış saleh Lutun keçirdiyi hissləri keçirirdi. Sodomun əxlaqsız sakinləri arasında yaşayan Lut ‘pozğun adamların səfahətə düşkün həyat tərzindən əziyyət çəkirdi’ və «onların haqsız işləri barəsində eşidib, onları görürdü və öz saleh canına gündən-günə əzab verirdi» (2 Peter 2:7, 8). Bu hissləri Nuh da keçirməmiş olmazdı.

Xəbərlərdə eşitdiyiniz dəhşətli hadisələr və ya allahsız insanların iyrənc hərəkətləri sizi narahat edirmi? Əgər belədirsə, Nuhun keçirdiyi hissləri başa düşə bilərsiniz. Daşqın baş verəndə Nuh 600 yaşında idi. Bu qədər vaxt qeyri-salehlərin arasında yaşamağın nə qədər çətin olduğunu bir təsəvvürünüzə gətirin! Nuh bütün pisliklərdən azad olmağın həsrətini çəkirdi (Yaradılış 7:6).

Nuh başqalarından fərqlənməyə qorxmurdu

Nuh «öz nəsli arasında qüsursuz bir adam idi» (Yaradılış 6:9). Fikir verin ki, Müqəddəs Kitab Nuhun öz müasirlərinin gözündə yox, onların arasında qüsursuz olduğunu deyir. Başqa sözlərlə desək, o, Allahın gözündə qüsursuz idi, lakin Daşqından öncə yaşamış insanlar onu qəribə hesab edirdilər. Biz əmin ola bilərik ki, o, nə müasirlərinin düşüncə tərzini mənimsəmiş, nə də ki əxlaqsız əyləncələrə və işlərə baş qoşmuşdu. Təsəvvür edin, Nuh gəmi tikməyə başlayanda insanlar ona necə baxırdılar! Çox ehtimal ki, onu lağa qoyub, rişxənd edirdilər. Onlar Nuhu ciddi qəbul etmirdilər.

Bundan əlavə, Nuh Allaha iman gətirir və bildiklərini özündə saxlamırdı. Müqəddəs Kitab onu «salehlik təbliğçisi» adlandırır (2 Peter 2:5). Şübhə yoxdur ki, Nuh müqavimətlərlə qarşılaşacağını bilirdi. Allahın pislərə qarşı çıxartdığı hökmləri bəyan edən ulu babası Xanok da saleh adam idi. Görünür, məhz buna görə pislər onu təqib etməyə başladılar, amma Allah yol vermədi ki, düşmənləri Xanoku öldürsünlər (Yaradılış 5:18, 21-24; İbranilərə 11:5; 12:1; Yəhuda 14, 15). Şeytan, cinlər, Nefilimlər və insanların əksəriyyəti Nuhun təbliğ etdiyi xəbərə laqeyd yanaşırdılar, yaxud ona müqavimət göstərirdilər. Buna görə də Nuhdan cəsarət və Yehovanın onu qoruyacağına inam tələb olunurdu.

Allaha xidmət etməyən insanlar hər zaman Onun xidmətçilərinə müqavimət göstəriblər. Hətta İsa Məsih və onun davamçıları da nifrətlə qarşılanmışdılar (Matta 10:22; Yəhya 15:18). Çoxlarının xoşuna gəlməsə də, Nuh Allaha xidmət etmək üçün kifayət qədər cəsarətli idi. O anlayırdı ki, Allahın lütfünü qazanmaq, Onun düşmənlərini razı salmaqdan daha vacibdir. Buna görə də Allah Nuha lütf göstərirdi.

Nuh fikir verdi

Gördüyümüz kimi, Nuh insanlara cəsarətlə təbliğ edirdi. Bəs onlar buna necə hay verirdilər? Müqəddəs Kitabda deyilir ki, Daşqından qabaq insanlar ‘yeyib, içib, evlənib, ərə gedirdilər və tufan gəlib hamısını aparıncaya qədər bixəbər idilər’, yəni Nuhun xəbərdarlığına fikir vermirdilər (Matta 24:38, 39).

İsa bizim günlərdə də vəziyyətin belə olacağını söyləmişdi. Artıq yüz ildən çoxdur ki, Yehovanın Şahidləri insanlara salehliyin ömür sürəcəyi yeni dünya qurmaq vədini yerinə yetirmək üçün Yehovanın tezliklə qəti tədbirlər görəcəyi barədə xəbərdarlıq edirlər. Milyonlarla insanlar bu xəbərə müsbət hay versələr də, milyardlarla insanlar ona fikir vermirlər. Onlar Daşqının yer üzündə həqiqətən də baş verdiyinə və onun hansı məna kəsb etdiyinə «qəsdən» (İ–93) məhəl qoymurlar (2 Peter 3:5, 13).

Nuh isə Yehova Allahın dediklərinə fikir verir və inanırdı. İtaətkarlıq Nuhu xilas etdi. Həvari Pavel yazmışdı: «Nuh iman vasitəsilə, hələ zahir olmayan şeylər haqqında Allah tərəfindən xəbərdar edilib, öz ailəsini xilas etmək üçün ixlaskarlıqla gəmi hazırladı» (İbranilərə 11:7).

Təqlid edilməli nümunə

Nuhun tikdiyi gəmi nəhəng idi — futbol meydançasından uzun, hündürlüyü isə təxminən beşmərtəbəli bina qədər idi. O, ən böyük yelkənli taxta gəmi hesab edilən «Vayominq» şxunasından 30 metr uzun olmuşdu. Əlbəttə, Nuhun tikdiyini tam mənada gəmi adlandırmaq olmaz, o, yalnız suyun üzərində qalmaq üçün düzəldilmişdi. Lakin onun tikintisində o dövrün qabaqcıl tikinti üsullarından istifadə edilməli idi. Ona içəridən və bayırdan qatran vurmaq lazım idi. Ehtimal ki, gəminin tikintisi 50 ildən çox çəkdi (Yaradılış 6:14-16).

Hələ görüləsi çox iş vardı. Daşqından əvvəl Nuh ailəsi və heyvanlar üçün birillik azuqə toplamalı, heyvanları gəmiyə yığmalı idi. «Rəbb Nuha necə əmr etmişdisə, o da hər şeyi eləcə yerinə yetirdi». Hər şey hazır olanda və Yehova gəminin qapısını örtəndə onlar necə də rahatlandılar! (Yaradılış 6:19-21; 7:5, 16).

Nəhayət Daşqın başladı. 40 gün, 40 gecə yağış yağdı. Gəmidə olanların hamısı sular çəkilənədək bir il orada qalmalı idilər (Yaradılış 7:11, 12; 8:13-16). Bütün pis insanlar məhv oldu. Pisliklərdən təmizlənmiş yer üzündə yalnız Nuh və ailəsi sağ qaldı.

Müqəddəs Kitabda deyilir ki, Nuhun günlərində baş vermiş Ümumdünya daşqını «gələcək şeyləri göstərən bir ibrət»dir. Hansı mənada? Biz oxuyuruq: «İndiki göylər və yer isə oda verilmək üçün eyni kəlam ilə saxlanıb, allahsız adamların məhkəmə və həlak gününə qədər hifz olunurlar». Nuhun günlərində olduğu kimi, yenə də sağ qalanlar olacaq. Əmin olun ki, Yehova «Ona ixlas edənləri [yəni sədaqətli olanları] imtahandan necə xilas etməyi... bilir» (2 Peter 2:5, 6, 9; 3:7).

Nuh pis müasirlərindən fərqli olaraq, sədaqətli və saleh insan idi. O, hər şeydə Allaha itaət edirdi. Nuh Allaha xidmət etmək istəməyən insanların qəzəbinə düçar olacağını bildiyinə baxmayaraq, düzgün olanı etmək üçün kifayət qədər cəsarətə malik idi. Biz Nuhu təqlid etməklə Allahın lütfünü qazanacağıq, həmçinin xilas olmağa və tezliklə gələcək yeni dünyada yaşamağa ümidimiz olacaq (Məzmur 37:9, 10).

[Haşiyə]

[5-ci səhifədəki çərçivə]

Nefilimlərin qəddarlığı qədim əfsanələrdə öz əksini tapıb

[7-ci səhifədəki şəkil]

Nuhun imanını təqlid etməklə Allahın lütfünü qazana bilərik

[İcazə ilə]

Alinari/Art Resource, NY