İsa Məsih. Onun çatdırdığı xəbərin gücü
«Kefernahumlu müdrik insanın dahiliyinə ən tutarlı sübut onun hələ də insanların ürəyinə və ağlına hakim kəsilməsidir»a (YAZIÇI QREQ İSTERBRUK).
SÖZLƏR böyük qüvvəyə malikdir. Hikmətli, düzgün seçilmiş sözlər ürəkləri isitməyə, insana ümid verməyə və həyatları dəyişməyə qadirdir. Dünyada İsa Məsih kimi sözlərdən məharətlə istifadə edən ikinci şəxs olmamışdır. İsanın məşhur nitqini dinləyən bir nəfər sonralar yazmışdı: «İsa bu sözləri bitirdikdən sonra, xalq Onun təliminə təəccübləndi» (Matta 7:28).
Bizim günlərdə də İsanın bir çox kəlamları dünyanın istənilən guşəsindən olan insanlara tanışdır. Gəlin onun dərin mənalı kəlamlarından bəzilərinə nəzər yetirək.
«Siz həm Allaha, həm də sərvətə qulluq edə bilməzsiniz» (Matta 6:24, Müqəddəs Kitab—09).
«Buna görə, insanların sizinlə necə rəftar etməsini istəyirsinizsə, siz də onlarla elə rəftar edin» (Matta 7:12).
«Nə üçün qardaşının gözündə tükü görürsən, öz gözündə isə tiri seçmirsən?» (Matta 7:3).
«Vermək almaqdan daha böyük bəxtiyarlıq gətirir» (Həvarilərin işləri 20:35).
Amma İsa yaddaşlardan silinməyən kəlamlar söyləməklə kifayətlənməmişdi. Onun təbliğ etdiyi xəbər böyük gücə malik idi. Çünki bu xəbər Allah haqqında həqiqəti çatdırır, insanlara həyatın mənasını tapmağa kömək edir, o cümlədən, insanların bütün dərdlərinin əlacını göstərir, yəni Allahın Padşahlığını təbliğ edirdi. Növbəti səhifələrdə bu xəbərin nədən ibarət olduğunu araşdırdıqca İsanın nəyə görə hələ də milyonlarla ‘insanın ürəyinə və ağlına hakim kəsildiyini’ görəcəyik.
[Haşiyə]