Allahın xalqı kimi “həmahəng” şəkildə birləşiblər
1 Məgər insan bədəninin quruluşu sizi heyran etmirmi? (Məz. 139:14). Bədənin hər bir hissəsi digərləri ilə həmahəng surətdə fəaliyyət göstərir. Müqəddəs Kitab məsihçi yığıncağını bu cür gözəl quruluşa malik olan bədənlə müqayisə edir. Məsihin başçılığı altında yığıncağın bütün üzvləri “hər bir buğumun yardımı ilə həmahəng olub, təşkil olunur” (Efes. 4:16a). Yehova özünün birləşmiş xalqını məharətlə istifadə edərək, valehedici işlər görür.
2 Birinci əsrdə yığıncağın üzvləri bir-birlərinin ruhani və maddi tələbatları üçün birlikdə qayğı göstərirdilər (Həv. iş. 2:44-47). Onlar güclü tə’qiblərlə qarşılaşırdılar, lakin Yehovanın köməyi və öz birlikləri sayəsində hər şeyi dəf edirdilər (Həv. iş. 4:24-31). Onlar getdikləri hər yerdə Padşahlıq haqqında xəbəri təbliğ edir, xoş xəbəri o zaman mə’lum olan bütün dünyaya yayırdılar (Kolos. 1:23). Bizim günlərdə məsihçi yığıncağı həmin işləri böyük miqyasda mütəşəkkil tərzdə həyata keçirirlər. Birliyimizə kömək edən nədir?
3 Allahın tə’limi ilə birləşiblər. Biz bütün dünyada ibadətimizdə mütəşəkkillik təşkil edirik. Nəyə görə? Çünki Yehovanın bizi ruhani cəhətdən “vaxtlı-vaxtında... yemək” ilə tə’min etdiyi kanalı e’tiraf edirik (Mat. 24:45). Biz, həmçinin Onun yığıncaqlara müəllimlər kimi verdiyi “insanlar timsalında hədiyyələri” də yüksək qiymətləndiririk. Əgər Yehovanın verdiyi ruhani qidanı həlimliklə qəbul ediriksə, Allahın Kəlamını anlamaq qabiliyyətimiz artacaqdır, bunun sayəsində isə birlikdə İsanı təqlid etmək və onun şagirdləri olmaq istəyimiz olacaqdır. Biz, səmimi qəlbdən “imanda... birliyə” çatmaq üçün, bundan sonra da Allahın Kəlamını öyrənməyə davam etməliyik (Efes. 4:8, YD, 11-13). Sən Müqəddəs Kitabı hər gün oxuyaraq ruhani birliyimizə kömək edirsənmi?
4 Məsihçi qardaşlığında birləşmişik. Məhəbbət bizi, məsihçi yığıncaqlarında qardaşlarımızla daha da sıx bağlayır. Bu görüşlərdə bir-birimizi ürəkləndirmək imkanımız var (İbr. 10:24, 25). Bunun üçün həmimanlılarımızla həqiqi mə’nada maraqlanmalı, yaxından tanış olmalı və onları dəyərli şeylər kimi qəbul edərək, onlara Yehovanın gözü ilə baxmalıyıq (Haq. 2:7). Qardaşlarımızın öz imanlarını necə təzahür etdiklərini eşidəndə, onlara olan məhəbbətimiz daha dərin olur və birlik bağlarımız möhkəmlənir. Özünü görüşlərə müntəzəm gələn adam kimi tanıtmısanmı?
5 Xidmətdə əməkdaşlar. Həmimanlılarımızla birlikdə xoş xəbəri təbliğ etmək bizi, Allahın iradəsini yerinə yetirməkdə birləşdirir. Həvari Pavel, “Allahın Padşahlığı üçün” onun əməkdaşları olanları çox qiymətləndirirdi (Kolos. 4:11, İ-93). Xidmətdə olduğumuz zaman başımıza gələn əhvalatları danışaraq bir-birimizə kömək edəndə, məsihçi işini yerinə yetirmək asan olur və birliyimiz möhkəmlənir (Kolos. 3:14).
6 Müqəddəs ruhun birləşdirici tə’siri. Diqqətimizi Yehovanın iradəsini yerinə yetirməyə cəmləşdirəndə, O bizə müqəddəs ruhunu verir. Bu isə bizə narazılıqları aradan qaldırmağa və qardaşlar kimi bir yerdə yaşamağa kömək edir (Məz. 133:1). Biz, həmçinin “ruhun vəhdətini sülh bağı ilə saxlamağa sə’y” göstəririk (Efes. 4:3). Hər kəs başqaları ilə ünsiyyətdə olarkən ruhun səmərəsini təzahür etdirməklə, Allahın xalqı arasında olan birliyə öz köməyini göstərə bilər (Qalat. 5:22, 23).
7 Məsihin başçılığı altında həmahəng xidmətimiz sayəsində “bədən qamətini artırır ki, məhəbbətlə inkişaf etsin” (Efes. 4:16b). Bundan əlavə, bu cür xidmət, “sülh verən Allah” Yehovanı izzətləndirir (Rom. 16:20).