Qohumunuz ünsiyyətdən məhrum olunan zaman Allaha sədaqətli qalın
1. Məsihçinin Allaha sədaqəti hansı səbəbdən sınağa mə’ruz qala bilər?
1 Ailə üzvlərini bir-birinə bağlayan tellər çox möhkəm olur. Buna görə də, məsihçinin həyat yoldaşı, uşağı, valideynlərindən biri və ya başqa yaxın qohumu yığıncaqdan kənar olunanda, ya da ünsiyyətdən imtina edəndə, onun Allaha sədaqəti sınağa mə’ruz qalır (Mat. 10:37). Sadiq məsihçilər bu cür qohuma necə münasibət bəsləyəcəklər? Həmin şəxsin məsihçilərlə bir evdə yaşaması əhəmiyyət kəsb edirmi? Gəlin əvvəlcə bu barədə Müqəddəs Kitabda deyilənləri nəzərdən keçirək. Müqəddəs Kitabın prinsipləri yığıncaqdan məhrum olunan və ünsiyyətdən imtina edənlərə eyni tərzdə tətbiq ediləndir.
2. Müqəddəs Kitaba əsasən, məsihçilər yığıncaqdan kənar edilənlərə necə münasibət bəsləməlidirlər?
2 Yığıncaqdan kənar edilənlərə necə münasibət bəsləməli. Allahın Kəlamı məsihçilərə, yığıncaqdan kənar edilən heç bir kəslə ünsiyyətdə olmamaq göstərişi verir: “Özünü qardaş adlandırıb, əxlaqsızlıq, tamahkarlıq, bütpərəstlik, acıdillik, sərxoşluq və yaxud qəsbkarlıq edənlə oturub-durmayasınız. [...] Pis adamı sıranızdan kənara atın” (1 Kor. 5:11, 13). İsanın Matta 18:17 ayəsində yazılan sözlərin də həmən məsələyə aidiyyatı var: “Qoy o [məhrum olunan] sənin üçün bir bütpərəst və vergiyığan kimi olsun”. İsanı dinləyən insanlar bilirdilər ki, o zamanlar yəhudilər bütpərəstlərdən kənar gəzirdilər və rədd edilmiş adamlar kimi vergiyığanlardan qaçırdılar. Bu yolla, İsa davamçılarına yığıncaqdan kənar edilənlərlə ünsiyyətdə olmamağa dair göstəriş verdi (“Gözətçi Qülləsi”nin 1982-ci il 1 mart sayına, 10-12-ci səh. bax, rus.)
3, 4. Ünsiyyətdən məhrum olunan və ya imtina edən şəxslə hansı növ ünsiyyət qadağandır?
3 Bütün bunlar o deməkdir ki, Allaha sədaqətlərini qoruyan məsihçilər, yığıncaqdan kənar edilənlərlə ruhani mövzulara dair söhbət etmirlər. Lakin daha artıq şey tələb olunur. Allahın Kəlamında yazılıb ki, biz “hətta belələri ilə bir yerdə çörək belə” yeməməliyik (1 Kor. 5:11). Beləliklə biz, yığıncaqdan kənar edilənlə dostcasına ünsiyyətdən də qaçınırıq. Onunla seyrə, axşam qonaqlığına, mağazaya və ya teatra getməyəcəyik və onunla hər-hansı bir idman oyunları oynamayacaq, yaxud da ki, evdə və ya restoranda birlikdə yemək yeməyəcəyik.
4 Ünsiyyətdən məhrum olunan şəxslə danışmaq olarmı? Baş verə biləcək bütün hallar Müqəddəs Kitabda nəzərdən keçirilməsə də, Yəhyanın 2-ci məktubunun 10-cu ayəsi, bu sahədə Yehovanın fikrini başa düşməkdə bizə kömək edir: “Əgər bir kimsə yanınıza gəlib bu tə’limi gətirməzsə, onu evə buraxmayın və ona salam verməyin”. Bu ayəni şərh edərək, “Gözətçi Qülləsi”nin 1982-ci il 1 mart sayının 17-ci səhifəsində (rus.) qeyd olunurdu: “Adicə salamlamaq ünsiyyətə, hətta kiminləsə dostluq əlaqəsinin yaranmasına ilk addım ola bilər. Biz, ünsiyyətdən məhrum olunan insana münasibətdə bu ilk addımı atmaq istəyirikmi?”
5. Yığıncaqdan kənar edilən şəxs nədən məhrum olur?
5 Həmin “Gözətçi Qülləsi”nin 23-cü səhifəsində deyilirdi: “E’tiraf etmək lazımdır ki, günaha təslim olan və ünsiyyətdən məhrum olunacaq vəziyyətə düşən məsihçi çox şeydən — Allahın lütfündən... qardaşlarla xoş ünsiyyətdən, həmçinin məsihçi olan qohumlarla geniş ünsiyyətdən məhrum olur”.
6. Məsihçidən tələb olunurmu ki, ailənin daxilində yaşayan yığıncaqdan kənar edilmiş qohumu ilə hər cür ünsiyyəti kəssin? İzah edin.
6 Ailədə yaşayan qohum. Yuxarıda deyilənlər o deməkdirmi ki, yığıncaqdan kənar edilmiş şəxslə bir evdə yaşayanlar onunla danışmamalı, birlikdə çörək yeməməli və gündəlik məşğuliyyətlər zamanı ünsiyyətdə olmamalıdırlar? “Gözətçi Qülləsi”nin 1991-ci il 15 aprel sayında, 22-ci səhifədəki (rus.) haşiyədə qeyd olunurdu: “Yığıncaqdan kənar edilən şəxs məsihçi ailəsində yaşayırsa, o, ailənin işlərində və evə dair gündəlik məşğuliyyətlərdə iştirak edir”. Beləliklə ailənin üzvləri, ünsiyyətdən məhrum olunan şəxslə istər yemək zamanı, istərsə də gündəlik başqa işlərdə onlarla bir yerdə olmaq qərarını qəbul etmək ixtiyarındadırlar. Buna baxmayaraq, qardaşlarda elə təəssürat yaranmamalıdır ki, hər şey ünsiyyətdən məhrum olunmazdan əvvəl olduğu kimidir.
7. Ailənin üzvü yığıncaqdan kənar edildikdə, ailədəki ruhani ünsiyyət necə dəyişilir?
7 “Gözətçi Qülləsi”nin 1982-ci il 1 mart sayında, 20-ci səhifədə (rus.) yığıncaqdan kənar edilən və ya ünsiyyətdən imtina edən şəxs haqqında sonra bunlar qeyd olunurdu: “Əvvəlki ruhani bağlar tamamilə qırılmışdır. Bu, hətta onun qohumlarına, o cümlədən onunla bir evdə yaşayan qohumlarına da aiddir. [...] Bu o deməkdir ki, bu vaxta qədər mövcud olan ruhani münasibətlərdə dəyişiklik baş verəcək. Misal üçün, əgər ər ünsiyyətdən məhrum edilibsə, onda onun ailəvi öyrənməyə rəhbərlik etməsi və ya Müqəddəs Kitabı birgə oxuması, ya da ailəni duada təqdim etməsi həyat yoldaşının və uşaqlarının xoşuna gəlməyəcək. Əgər o, məsələn, yemək yeməzdən əvvəl ucadan dua etmək istəyirsə, onda bunu öz evində etmək ixtiyarına malikdir. Amma bu zaman başqaları Allaha özləri sakitcə dua edə bilərlər (Sül. məs. 28:9; Məz. 119:145, 146). Əgər ailənin ünsiyyətdən məhrum olunmuş üzvlərindən biri, digərləri Müqəddəs Kitabı birlikdə oxuyarkən və ya öyrənərkən onların yanında olmaq istəyərsə nə etməli? Əgər həmin şəxs ailənin qalan üzvlərini öyrətməyə və ya öz dini baxışlarını onlarla bölüşməyə çalışmayacaqsa, qalanları onun iştirak etməsinə icazə verə bilərlər”.
8. Məsihçi valideynlər, onlarla yaşayan həddi-büluğa çatmamış oğul və ya qızlarına münasibətdə hansı məs’uliyyəti daşıyırlar?
8 Əgər valideynləri ilə birlikdə yaşayan həddi-büluğa çatmamış oğul və ya qız ünsiyyətdən məhrum olunursa, onda valideynləri əvvəlki kimi onun tərbiyəsinə cavabdehdirlər. “Gözətçi Qülləsi”nin 1989-cu il 15 sentyabr sayında, 17-ci səhifədə (rus.) deyilirdi: “Onlar öz uşaqlarını qida, geyim və sığınacaqla tə’min etməyə necə davam edirlərsə, eyni tərzdə də Allahın Kəlamına müvafiq tə’lim verməli və tərbiyəvi ölçülər götürməlidirlər (Sül. məs. 6:20-22; 29:17). Deməli, sevən valideynlər, hətta uşaq ünsiyyətdən məhrum olunsa da, onunla Müqəddəs Kitab öyrənməsi keçirə bilərlər. Əgər öyrənmə yalnız onunla keçirilirsə, ola bilər ki, Müqəddəs Kitab öyrənməsindən daha çox fayda əldə edəcək və düzələcək. Ya da valideynlər belə qərara gələ bilərlər ki, uşaq onlarla birlikdə Müqəddəs Kitabın ailəvi öyrənilməsində iştirak edə bilər”. (Həmçinin “Gözətçi Qülləsi”nin 2001-ci il 1 dekabr sayında 27, 28-ci səhifələrə də bax.)
9. Məsihçi ayrı yaşayan ünsiyyətdən məhrum olunmuş qohumu ilə nə dərəcədə ünsiyyətdə olmalıdır?
9 Ayrı yaşayan qohumlar. “Gözətçi Qülləsi”nin 1988-ci il 15 sentyabr sayında, 21-ci səhifədə (rus.) yazılırdı: “Yığıncaqdan kənar edilən və ya ünsiyyətdən məhrum olunan qohum həmin mənzildə ailə ilə birgə yaşamırsa, vəziyyət tamam başqa cürdür. Çox ehtimal, həmin qohumla, demək olar ki, ünsiyyətdə olmamaq mümkündür. Əgər ailə işlərindən hansılarsa təmasda olmaq ehtiyacı yaradarsa, bu imkan çox məhdud olmalıdır”, bu isə Allahın bilərəkdən günah işlədənlə “oturub-durmayasınız” göstərişinə müvafiqdir (1 Kor. 5:11). Sadiq məsihçilər, hətta işgüzar əlaqələri belə məhdudlaşdıraraq, bu cür qohumla yersiz ünsiyyətdən qaçınacaqlar. (Həmçinin “Gözətçi Qülləsi”nin 1982-ci il 1 mart sayının 21-22-cü səhifələrinə də bax, rus.)
10, 11. Məsihçi, ünsiyyətdən məhrum olunan yaxın qohumuna onun evinə köçməyə izin verməzdən əvvəl nəyi nəzərə alacaqdır?
10 “Gözətçi Qülləsi”ndə, mümkün olan daha bir vəziyyət haqqında deyilirdi: “Bəs ünsiyyətdən məhrum edilən doğmalardan kim isə, məsələn, bir evdə yaşamayan, sonradan isə evə qayıtmaq istəyən oğul və ya valideynlərdən biridirsə, onda nə etməli? Vəziyyətdən asılı olaraq, nə etməyi ailənin özü qərara ala bilər. Misal üçün, ünsiyyətdən məhrum olunan ata və ya ana xəstələnib, yaxud da maddi və ya fiziki cəhətdən öz qayğısına qala bilmir. İmanda olan uşaqlar, Müqəddəs Kitaba və əxlaq prinsiplərinə əsasən, yardım etməyə borcludurlar (1 Tim. 5:8). [...] Onların nə edəcəyi, ehtimal ki, çox amillərdən, məsələn, ata və ya ananın əsl tələbatlarından, onların düşüncə tərzindən və ailə başçısının ailəsinin ruhani rifahına dair göstərdiyi qayğıdan asılı olacaq” (“Gözətçi Qülləsi”nin 1982-ci il 1 mart sayı, 19-21-ci səhifələr, rus.).
11 Həmin məqalədə uşaqlar barəsində deyilirdi: “Bə’zən məsihçi valideynlər ünsiyyətdən məhrum olunmuş, sonradan isə fiziki və ya mə’nəvi cəhətdən xəstələnən uşağı müvəqqəti olaraq yenidən evlərinə qəbul edirlər. Lakin hər bir vəziyyətdə valideynlər fərdi olaraq şəraiti götür-qoy etməlidirlər. Məsələn, vəziyyət o yerdədirmi ki, məhrum olunmuş oğul artıq müstəqil yaşaya bilməyə? Yoxsa o, evdə yaşamaq rahat olacaq deyəmi qayıtmaq istəyir? Onun əxlaqı və düşüncə tərzi hansı vəziyyətdədir? Ailəyə “maya” daxil etməyəcək ki? (Qalat. 5:9)”.
12. Günah işlədən şəxslərin ünsiyyətdən məhrum olunmaları nəyə kömək edir?
12 Yehovaya göstərilən sədaqət mükafatlandırılır. Müqəddəs Kitabın ünsiyyətdən məhrum edilməyə dair prinsiplərinə riayət etmək və tövbə etməyən günahkarlardan uzaqlaşmaq faydalıdır. Bu, yığıncağın təmizliyini qoruyur və bizi Müqəddəs Kitabın yüksək əxlaq normalarının tərəfdarları kimi fərqləndirir (1 Pet. 1:14-16). Bu bizi, parçalayıcı tə’sirlərdən qoruyur (Qalat. 5:7-9). Bu, həmçinin günah işlədən şəxsə, “salehliyin dinclik səmərəsini” hasil edən məzəmmətdən tam fayda əldə etməyə imkan verəcəkdir (İbr. 12:11).
13. Bir ailə hansı dəyişiklikləri etdi və nəticəsi necə oldu?
13 Rayon konqresində mə’ruzəni dinlədikdən sonra, bir qardaş və onun bacısı başa düşdülər ki, artıq altı ildir ki, ünsiyyətdən məhrum olunan analarına qarşı münasibətlərini dəyişməlidirlər. Konqresdən dərhal sonra qardaş başqa yerdə yaşayan anasına zəng vurub, onu sevdiklərini bildirdi və izah etdi ki, vacib ailə məsələlərini şəxsən müzakirə etmək tələb olunan hallardan başqa onunla ünsiyyətdə olmayacaqlar. Tezliklə ana görüşlərə gəlməyə başladı və nəhayətdə yenidən yığıncağın üzvü oldu. Bundan əlavə, onun bu yolda olmayan əri Müqəddəs Kitabı öyrənməyə başladı və vaxtilə vəftiz olundu.
14. Ünsiyyətdən məhrum olunma tədbirlərinə nəyə görə sədaqətlə riayət etməliyik?
14 Ünsiyyətdən məhrum olunmaq məsələsində Müqəddəs Yazılarda təsvir edilmiş tədbirlərə sədaqətlə riayət etməklə, Yehovaya məhəbbətimizi sübut etmiş olacaq və Onun adına ləkə gətirənə cavab verəcəyik (Sül. məs. 27:11). Öz növbəsində isə əmin ola bilərik ki, Allah bizi mükafatlandıracaqdır. Davud padşah Yehova haqqında yazırdı: “Qanunları isə, onlardan mən ayrılmadım. İnayətli [“sədaqətli”, YD] ilə inayətli [“sədaqətli”, YD] olursan” (2 Sam. 22:23, 26).