Müqəddəs Kitabı öyrənənlərə Yehovanın misilsiz keyfiyyətlərini dərk etməyə kömək et
1 Təbliğ xidmətində biz insanlara sadəcə Müqəddəs Kitabın əsas prinsiplərini öyrətmirik. Biz onlara Yehovanı bir şəxsiyyət kimi tanımağa və Onun misilsiz keyfiyyətlərini layiqincə qiymətləndirməyə kömək edirik. Səmimi insan Allah haqqında həqiqəti öyrənəndə o laqeyd qalmır, ‘Rəbbə layiq şəkildə hərəkət etmək’ üçün həyatında dəyişikliklər etməyə başlayır (Kolos. 1:9, 10; 3:9, 10).
2 Öyrətmə üçün yeni vəsait. «Müqəddəs Kitab öyrədir» kitabı artıq ilk səhifələrindən Yehovanın keyfiyyətlərinə diqqət yetirir. Birinci fəsil «Allah sənin qayğına qalırmı? Allah kimdir? Allaha yaxınlaşmaq mümkündürmü?» kimi suallara cavab verir. Bu fəsildə, həmçinin Yehovanın müqəddəsliyi (abz. 10), ədaləti və qayğıkeşliyi (abz. 11), məhəbbəti (abz. 13), gücü (abz. 16), rəhmi, lütfkarlığı, sədaqəti, səbri və bağışlamağa hazır olması (abz. 19) haqda danışılır. 20-ci abzasa belə yekun vurulur: «Yehova haqqında nə qədər çox öyrənsəniz, O, sizin üçün bir o qədər də real olacaq. Allaha olan məhəbbətiniz artacaq və siz Ona yaxınlaşa biləcəksiniz».
3 Müqəddəs Kitabı öyrənənlərə Yehovaya yaxınlaşmağa «Müqəddəs Kitab öyrədir» vəsaitinin vasitəsilə necə kömək edə bilərik? Öyrənən adamla Allahın hər hansı bir keyfiyyətindən bəhs olunan abzası müzakirə etdikdən sonra, belə sual vermək olar: «Yehovanın Şəxsiyyəti haqqında nə öyrəndiniz?» və ya «Bu, Allahın sizin şəxsən qayğınızı çəkdiyini necə göstərir?» Öyrənmə zamanı bunlara bənzər suallar verməklə biz adamı öyrəndikləri üzərində düşünməyi öyrədir və Yehovanın misilsiz keyfiyyətləri üçün ürəkdən minnətdar olmağa kömək edirik.
4 Təkrar üçün çərçivə. Hər fəsli müzakirə edib qurtarandan sonra şagirddən «Müqəddəs Kitabın öyrətdikləri» çərçivəsinin bütün bəndlərinə öz sözləri ilə cavab verməyi xahiş et. Gətirilən ayələrə diqqət yetir. Şagirdin ürəyindəkiləri öyrənmək üçün arabir ondan soruşmaq olar: «Müqəddəs Kitabda bu haqda nə dediyinə sən necə baxırsan?» Bu cür suallar həm əsas bəndləri qeyd etməyə imkan verir, həm də çox vacib bir şeyi — insanın həqiqi əqidəsini aşkara çıxarmağa kömək edir. Bunun sayəsində Müqəddəs Kitabı öyrənən insan Yehovaya yaxınlaşmağa başlayacaq.