«Allahın Yeremya vasitəsilə bizə çatdırdığı xəbər»

1. 2010-cu ilin vilayət konqresində hansı nəşr işıq üzü görmüşdü və biz ondan necə istifadə edəcəyik?

¹ 2010-cu ildə «Yehova ilə yaxın münasibətlərinizi qoruyun!» adlı vilayət konqresində yeni kitabın işıq üzü görməsi bizi necə də sevindirdi! Bu nəşrdə «Yeremya» və «Mərsiyələr» kitablarından gündəlik həyatımız üçün faydalı olacaq diqqətəlayiq dərslər araşdırılır (Rom 15:4). Yığıncağın Müqəddəs Kitab öyrənməsində araşdırmaq üçün nəzərdə tutulan bu nəşr 2012-ci il noyabrın 5-dən başlanan həftədən etibarən yığıncaqlarda müzakirə olunacaq.

2. «Yeremya» və «Mərsiyələr» kitablarını nəzərdən keçirmək nəyə görə bizim üçün faydalıdır?

² Bizim üçün faydası. Yeremya Yəhuda tarixinin ən keşməkeşli dövründə peyğəmbər kimi xidmət etmişdi. İlk əvvəl o, bu tapşırıq üçün özünü yararsız hiss edirdi (Yer. 1:6). O həmçinin Anatot şəhərində yaşayan tanışları və ola bilsin, qohumları tərəfindən təqiblərə məruz qalmışdı (Yer. 11:21, 22). Bu səbəbdən bəzən onun ruhdan düşməsi təəccüblü deyil (Yer. 20:14). Bütün millətlərin içində şagird hazırlamaq tapşırığımızı yerinə yetirəndə biz tez-tez bu kimi çətinliklərlə üzləşir və eyni hissləri keçiririk (Mat. 28:19). Onun Allahdan ilham alaraq yazdığı fikirləri nəzərdən keçirmək xidmətimizi səylə və cəsarətlə yerinə yetirməyə kömək edəcək.

3. «Allahın Yeremya vasitəsilə bizə çatdırdığı xəbər» kitabının səciyyəvi cəhətlərindən biz necə istifadə edəcəyik?

³ Kitabın səciyyəvi cəhətləri. Müzakirə zamanı oxunmalı olan əsas ayələr kursivlə göstərilib. Hər həftə üçün ayrılmış hissənin sonunda qalın hərflərlə yazılmış və müzakirə olunan hissənin əsas fikirlərini vurğulayan bir və ya iki sual var. Bu suallar materialı təkrarlamaq məqsədilə verilməlidir. Kitabda çoxlu gözəl şəkillər yer alıb və şübhə yoxdur ki, bacı-qardaşlar bu şəkillərə şərh vermək istəyəcəklər.

4. «Allahın Yeremya vasitəsilə bizə çatdırdığı xəbər» kitabının müzakirəsindən tam faydalanmaq üçün biz nə etməliyik?

⁴ Müzakirədən tam fayda əldə etmək üçün qabaqcadan hazırlaşın. Həyatınızda və xidmətinizdə tətbiq edə biləcəyiniz fikirləri axtarın. Şərh verməkdə fəal olun. Yehovanın xeyir-duası sayəsində Yeremya öz tapşırığını sevinclə yerinə yetirdi (Yer. 15:16). Qoy bu yeni nəşrin müzakirəsi bizə xidmətimizi eyni əhval-ruhiyyə ilə icra etməkdə kömək etsin!