Peyğəmbərlərdən nümunə götürün — Yunus
1. Yunus peyğəmbər hansı gözəl keyfiyyətlərə malik idi?
1 Yunus peyğəmbər dedikdə ilk ağlınıza gələn nə olur? Bəziləri onun qorxaq və ya daşürəkli olduğunu düşünə bilər. Əslində isə, o, çox təvazökar, cəsarətli və fədakar insan olub. Bəs biz Yunusun gözəl xüsusiyyətlərindən özümüzə hansı nümunəni götürə bilərik? (Yaq. 5:10).
2. Yunus peyğəmbərin təvazökarlığını necə təqlid edə bilərik?
2 Təvazökarlıq. Əvvəlcə Yunus peyğəmbər təyin olunduğu ərazidən əks istiqamətə qaçmağa cəhd göstərmişdi. Bu heç də təəccüblü deyil, çünki assuriyalılar zorakılıqda ad çıxartmış, Nineva isə qanlı şəhər kimi tanınmışdı (Nah. 3:1—3). Yunus ona həvalə olunan işdən əvvəlcə boyun qaçırsa da, sonradan Yehovanın iradəsini yerinə yetirdi (Sül. məs. 24:32; Mat. 21:28—31). Töhmət almağımıza və ya çətin əraziyə təyin olunmağımıza baxmayaraq, biz də, onun kimi, xoş xəbəri təbliğ etmək qətiyyətindəyikmi?
3. Xidmətimizin hansı sahələrində cəsarət və fədakarlıq tələb olunur?
3 Cəsarət və fədakarlıq. Yunus peyğəmbər yanlış qərar verərək Tarşişə qaçdığı üçün gəmiçilərin həyatını təhlükəyə atmışdı; həmin vaxt o, həyatını onlar üçün qurban verməyə hazır idi (Yun. 1:3, 4, 12). Sonra ona həvalə olunan işi Ninevada həyata keçirərkən Yehovanın hökm xəbərini insanlara çatdırmaq üçün Yunus düz şəhərin mərkəzinə gedib çıxmışdı. Allahın peyğəmbərinin bu cür davranışı onun qorxaq yox, cəsarətli olduğunu göstərirdi! (Yun. 3:3, 4). Bəs bizim haqqımızda nə demək olar? Təqiblərlə üzləşərkən qorxmadan şahidlik vermək üçün biz də Allahın verdiyi cəsarətə ehtiyac duyuruq (Həv. iş. 4:29, 31). Fədakarlıq göstərmək üçün bizdən vaxtımızı və vəsaitlərimizi xidmətə sərf etmək tələb olunur (Həv. iş. 20:24).
4. Nəyə görə Yehovanın peyğəmbərlərinin yaxşı nümunələri üzərində düşünməyə vaxt ayırmalıyıq?
4 Hər dəfə Yehovanın peyğəmbərləri barədə oxuduqca onların vəziyyətini gözünüzün önündə canlandırmaqla fayda əldə edəcəksiniz. Özünüzdən soruşun: «Mən necə davranardım? Bu gözəl xüsusiyyətləri həyatımda necə əks etdirə bilərəm?» (İbr. 6:11, 12). «Bizim Padşahlıq Xidmətimiz» vərəqəsinin növbəti saylarında Yehovanın digər sadiq peyğəmbərlərindən öyrənə biləcəyimiz ibrətamiz nümunələr araşdırılacaq.