Audioyazılardan necə istifadə etməli?
1. Veb-saytımızda yazılı nəşrlərdən başqa daha nə var?
1 Bir çoxları lətif kəlmələr və həqiqət sözlərini sevə-sevə jw.org saytından oxuyurlar (Vaiz 12:10). Bəs sən oradakı audioyazılardan istifadə edirsən? Audioyazıların sayəsində veb-saytımızdakı məlumatın çoxuna qulaq asmaq mümkündür. Bu yazıların bizə hansı faydası var?
2. Şəxsi mütaliə və ailəvi ibadət zamanı audioyazılardan necə istifadə edə bilərik?
2 Şəxsi mütaliə və ailəvi ibadət üçün. Yol gedəndə, yaxud gündəlik işlərlə məşğul olanda jurnalların və digər nəşrlərin audioyazısına qulaq asaraq vaxtdan səmərəli istifadə etmək olar (Efes. 5:15, 16). Həmçinin ailəvi ibadət zamanı öz nüsxəmizdən izləyə-izləyə hər hansı bir nəşrə qulaq asa bilərik. Bu da ailəvi ibadətə rəng qatacaq. Şəxsi mütaliə zamanı da audioyazıya qulaq asa bilərsiniz, xüsusən də oxumağı yaxşılaşdırmaqda, yaxud da yeni dil öyrənməkdə bunun lap çox xeyri dəyəcək.
3. Ərazimizdə kimlər audioyazılardan bəhrələnə bilərlər?
3 Xidmət üçün. Sahəmizdə başları işdən açılmayan, oxumağa vaxt tapmayan insanlar, ola bilsin, audioyazılara qulaq asmağa etiraz etməyəcəklər. Yaxud başqa dildə danışan insanlar Padşahlıq xəbərini öz ana dillərində eşitsələr, çox güman ki, bu xəbərə hay verərlər (Həv. 2:6—8). Bəzi yerlərdə dinləmək xalqın mədəniyyətinin ayrılmaz hissəsidir. Məsələn, xmonq xalqı öz tarixini gənc nəslə şifahi ötürür, gənc nəsil isə eşitdiyini qoruyub-saxlayır. Bir çox Afrika ölkələrində rəvayətlərə qulaq asıb öyrənməyi sevirlər.
4. Audioyazılar vasitəsilə sahəmizdəki insanlara necə kömək edə bilərik?
4 Sahənizdə sakin üçün onun öz dilində audioyazı səsləndirmək faydalı olardı. Kiminsə elektron ünvanına audionəşr göndərə bilərik. Audionəşri CD diskə köçürüb, çap olunmuş versiyası ilə birlikdə maraqlanan insana vermək olar. Xidmət zamanı elektron formatda verdiyimiz kitabı, broşürü, jurnalı, yaxud bukleti payladığımız nəşr kimi hesabata daxil edə bilərik. Audioyazılar bizim şəxsi mütaliə zamanı, həmçinin Padşahlıq toxumlarını səpərkən istifadə etməyimiz üçün hazırlanıb (1 Kor. 3:6)