Nəyə görə Allah İbrahim peyğəmbərdən oğlunu qurban gətirməyi xahiş etdi?

▪ Müqəddəs Yazıların «Yaradılış» kitabında deyildiyi kimi, Yehova Allah İbrahimdən oğlu İshaqı qurban gətirməyi xahiş edir (Yaradılış 22:2). Müqəddəs Kitabı oxuyanların bəziləri bu hissəni başa düşməkdə çətinlik çəkir. «Uşaqlıqda birinci dəfə bu hekayəni eşidəndə hiddət içindəydim. Axı Allah belə şeyi necə buyura bilər?» — deyə professor Kerol Delaney etiraf edir. Belə hissləri başa düşmək olar. Bu hekayəyə aydınlıq gətirmək üçün gəlin bir neçə amili nəzərdən keçirək.

Birincisi, Yehovanın nəyi etmədiyini nəzərdən keçirək. İbrahim oğlunu qurban gətirməyə hazır olsa da, Allah buna yol vermədi və bunu bir daha heç kimdən xahiş etmədi. Yehova istəyir ki, Onun bütün xidmətçiləri, eləcə də uşaqlar uzunömürlü olub xoşbəxt həyatdan zövq alsınlar.

İkincisi, Müqəddəs Kitabda yazılanlara əsasən, Yehovanın İbrahimdən oğlunu qurban gətirməsini xahiş etməsinin xüsusi səbəbi var idi. Allah əsrlər sonra Öz Oğlua İsanı qurban vermək niyyətində idi (Matta 20:28). Bununla Yehova sadəcə bu qurbanın Ona nəyin bahasına başa gələcəyini göstərmək istəyirdi. İbrahimdən oğlunu qurban gətirməyi xahiş etməklə Yehova gələcəkdə Özünün gətirəcəyi qurbanı möhtəşəm şəkildə nümayiş etdirdi. Nəyə görə bunu belə demək olar?

Yehovanın İbrahimə dediyi sözlərə diqqət yetirək: «Sevdiyin yeganə oğlunu — İshaqı götürüb... yandırma qurbanı olaraq təqdim et» (Yaradılış 22:2). Fikir verin: Yehova burada İshaqı İbrahimin sevimli oğlu adlandırır. O, İshaqın İbrahimə nə qədər əziz olduğunu bilirdi. Allah da Öz Oğlu İsaya eyni hissləri bəsləyirdi. Yehova İsanı o dərəcədə sevirdi ki, göylərdən iki dəfə onu «Mənim sevimli Oğlum» deyə adlandırmışdı (Mark 1:11; 9:7).

Bir şeyi də nəzərə alaq ki, Yehova İbrahimdən tələb yox, xahiş edirdi. Bir Müqəddəs Kitab aliminin fikrincə, orijinal mətndə həmin ayədə xahiş mənasını bildirən söz ona işarə edir ki, «Allah Onun xahişinin İbrahim üçün necə böyük itki olduğunu başa düşürdü». Təsəvvür edə bilərsiniz, bu xahiş İbrahimi necə də böyük kədərə qərq etmişdi? Eynilə, Yehovanın sevimli Oğlunun əzabını və ölümünü gözlərilə görməsinin Ona necə ürəkağrısı verdiyini, çətin ki, sonadək başa düşək. Şübhə yoxdur ki, Yehova hələ belə ürəkağrısı keçirməmişdi və keçirməyəcək də.

Yehovanın İbrahimdən etdiyi xahişi bizə nə qədər müəmmalı görünsə də, bir şeyi unutmayaq: Yehova sadiq tayfa başçısının bu qurbanı gətirməsinə yol vermədi. O, İshaqın ölümünün qarşısını alaraq övlad itkisinin ağrısını İbrahimə çəkdirmədi. Lakin Yehova Öz «Oğlunu əsirgəməyib hamımızın uğrunda qurban» verdi (Romalılara 8:32). Bəs nəyə görə Yehovanın Özü bu əzabı çəkməyə razı oldu? O, bunu bizim həyata qovuşmağımız üçün etdi (1 Yəhya 4:9). Bu, Allahın bizə olan məhəbbətinin möhtəşəm təzahürüdür! Bu, bizi Allahı sevməyə təşviq etmirmi?b

[Haşiyələr]