Yehovanın Şahidləri arasında qadınlar dini xidmətçi olur?

Bəli, bütün dünyada Yehovanın Şahidləri arasında milyonlarla qadın dini xidmətçi kimi fəaliyyət göstərir. Onlar Allahın Padşahlığı haqqındakı müjdəni hər yerdə təbliğ edirlər. Zəbur 68:11 ayəsində onlar haqda peyğəmbərlik edilmişdi: «Buyruq Yehovadan gəlir; müjdəni bəyan edən qadınlar böyük ordudur».

Amma bu dini xidmətçiləri digər dinlərdəki qadın din xadimlərinin işi ilə bir tutmaq olmaz. Onların arasında çox böyük fərq var. İndi bu suala yaxından baxacağıq.

İlk növbədə onların xidməti ayrı-ayrı qrup insanlarla bağlıdır. Qadın din xadimləri, ələlxüsus da Xristian dinlərində fəaliyyət göstərən qadınlar, öz icmalarında rəhbər vəzifələr tutur, təlim verdikləri kütlə kilsələrinə gələn insanlardır. Yehovanın Şahidlərində qadın dini xidmətçilər isə yığıncaqdan kənarda, ictimai yerlərdə, yəni ev-ev və digər yerdə xidmət edərkən rastlaşdıqları insanlara təbliğ edirlər.

Bundan başqa, Yehovanın Şahidlərində qadın dini xidmətçilərin yığıncaqdakı fəaliyyəti də digər dinlərdəki qadın din xadimlərinin fəaliyyətindən fərqlənir. Xristian dinlərində qadın xadimlər icma üzvlərinə rəhbərlik edir və onlara dinlərinin ehkamlarını vəz edirlər. Yehovanın qadın xidmətçiləri isə vəftiz olunmuş kişilər olan yerdə yığıncağa təlim vermirlər. Yığıncağa təlim verməyə yalnız kişilər təyin olunur (1 Timutiyə 3:2; Yaqub 3:1).

Müqəddəs Kitaba əsasən, yığıncağa ancaq kişilər rəhbərlik edə bilərlər. Görün həvari Bulus məsləkdaşı və nəzarətçi yoldaşı Titusa nə yazmışdı: «Mən səni Kritdə ona görə qoydum ki,.. şəhərlərdə ağsaqqallar təyin edəsən». Bulus əlavə etdi ki, təyin olunmuş kişilər «qüsursuz və tək bir qadınla evli» olmalıdırlar (Titusa 1:5, 6). Bulus eyni göstərişi Timutiyə yazdığı məktubunda da vermişdi: «Nəzarətçi olmağa can atan yaxşı şey arzulayır. Elə isə nəzarətçi qüsursuz, tək bir qadınla evli,.. təlim verməkdə səriştəli» olmalıdır (1 Timutiyə 3:1, 2).

Nə üçün nəzarətçi məsuliyyəti təkcə kişilərə həvalə olunub? Bulus belə yazmışdı: «Qadının təlim verməsinə, yaxud kişi üzərində başçılıq etməsinə icazə vermirəm. O susub qulaq asmalıdır. Çünki əvvəl Adəm yaradıldı, sonra Həvva» (1 Timutiyə 2:12, 13). Beləliklə, Adəmi ilk növbədə yaratmaqla Yaradan göstərdi ki, Onun məqsədinə uyğun olaraq, ruhani təlim vermək və rəhbərlik etmək məsuliyyətini kişi daşımalıdır.

Yehovanın xidmətçiləri rəhbərləri İsa Məsihi örnək alırlar. Müjdəçi Luka İsanın xidməti haqda belə yazmışdı: «İsa şəhərbəşəhər, kəndbəkənd gəzərək Allahın Padşahlığı haqqında müjdəni təbliğ edirdi». Bir qədər sonra İsa şagirdlərini də bu vəz işinə yolladı: «Şagirdlər yola çıxdılar. Onlar bütün o ərazini kəndbəkənd gəzib müjdəni təbliğ edir»dilər (Luka 8:1; 9:2—6).

Bu gün Yehovanın həm kişi, həm qadın xidmətçiləri İsanın tapşırığını həvəslə yerinə yetirirlər. İsa bizim günlər haqda demişdi: «Padşahlıq haqqındakı bu müjdə xalqların hamısına şəhadət olsun deyə, bütün yer üzündə təbliğ ediləcək və son o vaxt gələcək» (Mətta 24:14).