SƆ̃ƆSIRU 4
Mɛ Kaa Ko A Ka Gia Gusunɔ Sɔɔ
Kaa kpĩ a mɛɛri Yehofa sɔɔ Bibelin garibu sɔɔ. Saa tɛɛbun di Gusunɔ u tɔn gabu gɔsa bu ka win bwisikunu yore. Ba yori yi sokumɔ Bibeli. Gisɔ sa Gusunɔn giabu mɛɛrimɔ sà n Bibeli garimɔ. Bibeli ya Yehofan gari mɔ, ǹ kun mɛ win nɔɔ mɔrisianu, yen sɔ̃na ba maa ye sokumɔ Gusunɔn Gari. Sa ko kpĩ su ye Bibeli gerua naanɛ doke domi Yehofa kun weesu koore. “Gusunɔ kun kpɛ̃ u weesu ko.” (Heberu 6:18) Gusunɔn Gari ya gem mɔ.—Yohanu 17:17.
Bibeli ya sãawa kɛ̃ru teeru te ta buram kere te Gusunɔ u kua bɛsɛn sɔ̃. Ya sãawa nge tire te tundo kĩrugii u win bibu mɔrisia. Ya sun Gusunɔn nɔɔ mwɛɛru sɔ̃ɔmɔ nge mɛ u koo tem gɔsia mu ko wãa bura n yeru — alusanna. Ya sun geruamɛ ye Gusunɔ u kua yellu, ye u mɔ ka tɛ̃, ka ye u koo ko sia win bii naanɛgibun sɔ̃. Ya maa sun somimɔ su ka bɛsɛn wahalaba yakia kpa su ka doo nɔɔru wa.—2 Timɔte 3:16, 17.
Yehofan Seeda diobu ba sãawa Gusunɔn bɔrɔba; ba koo nun somi a ka ye Bibeli ya gerumɔ tubu. Ya faara sãawa, a be sɔ̃ɔwo ma a Bibelin mɛɛribu kĩ. Ba ǹ gobi kĩ yen sɔ̃. (Mateu 10:8) Kaa kpĩ a maa Kirisigibun mɛnnɔsu da. Ba si mɔ̀ sãa yenu sɔɔ ni ba sokumɔ Bandun Yenu. À n ra Kirisigibun mɛnnɔsu de, wunɛn Gusunɔn yɛ̃ru ta koo kpɛ̃a.
Kaa kpĩ a Gusunɔ gia saa gãa ni u kuan di. Nde mɛ wee mi, Bibeli ya nɛɛ : “Gusunɔ u . . . wɔllu ka tem taka kua.” (Torubu 1:1) Sanam mɛ Gusunɔ u “wɔllu” taka kua, u sɔ̃ɔ kua. Tɛ̃ɛ mba ya sun sɔ̃ɔsimɔ Gusunɔ sɔɔ? Ya sun sɔ̃ɔsimɔ ma Yehofa u dam bakam mɔ. Wi turowa u kpĩa u gãanu kua ni nu dam mɔ nge sɔ̃ɔ. Ya maa sun sɔ̃ɔsimɔ ma Yehofa u sãawa bwisiigii, domi u bwisin bukata mɔ u ka sɔ̃ɔ kua, sɔ̃ɔ wi sun sundu ka yam buram kɛ̃mɔ ma win dɔ̃ɔ ku ra kpe.
Yehofan taka koora ya sɔ̃ɔsimɔ ma u sun kĩ. A dãa binu bwese dabinu ni nu wãa tem sɔɔ mɛɛrio kpa a laakari kowo ye sɔɔ. Yehofa u koo raa kpĩ u sun dãa binu bwese teeru tɔna kua, ǹ kun mɛ u ku ko. Adama Yehofa u ǹ kue mɛ, ma u sun dãa binu bwese bweseka dabinu kã ni nu nɔni mɔ, kpa nin weenasii, nin bɔɔrum, ka nin nuburu nu dabia. Ya sun sɔ̃ɔsimɔ ma Yehofa u sãa Gusunɔ kĩrugii yen biru u maa sãawa kɛ̃ru kowo boko ka laakarigii ka nuku tiagii.—Womu 104:24.