Amɔsunwa Bibelin gem mu ka kpam waara?

Bibelin sɔmɔra raa gerua ma Kirisin gɔɔn biru, sɔ̃ɔsio weesugiba koo se Kirisigii gbiikobun wuuru sɔɔn di, kpa bu Bibelin gem gɔsia weesu. (Gɔrobun kookoosu 20:29, 30) Yen saa sɔɔ, ya maa koora mam mam. Ba Yesun sɔ̃ɔsinu burina ka sãa weesuginun bwisikunu, ma ba sãa te Kirisi u swĩi sĩiya weesu sɔɔ. (2 Timɔte 4:3, 4) Ǹ n mɛn na, amɔsunwa sa yɛ̃ kam kam ma sa Bibelin sɔ̃ɔsi gee nin yɛ̃ru mɔ gisɔ?

Saa ya tura ye sɔɔ Yehofa u koo gem tubusia. Yehofa gerua u nɛɛ sanam dãakim sɔɔwa, yɛ̃ru ta koo kpɛ̃a tu sosi. (Daniɛli 12:4) Wɔ̃ɔ 1870 sɔɔ tɔn wuuru piibu gaga raa gem kasu, ma ga wa ma sãa dabinun sɔ̃ɔsinu kun swaa swĩi, nu ǹ nin nuuru mɔ Yori Dɛɛri sɔɔ. Min diya ba torua ba Bibelin sɔ̃ɔsi geenun tubusianun kaso wɔri, ma Yehofa u be domaru kua ma u be Win laakari kã.

Tɔn gɔ̃ru tiagibu ba ka laakari Bibelin keu kua. Bibelin Keu Kowo be, ba nɔni doke ye ba mɔ̀ sɔɔ, ba sãawa bɛsɛn swaa gbiiyobu. Swaa ye ba swĩi ben keu ye sɔɔ, yera bɛsɛn tii sa loo mɔ̀ gisɔ. Ba ra raa wesianɛ Bibelin gari sɔɔ kpunaa ka kpunaa. Bà n tura Bibelin naa si su tubum sɛ̃ gɛɛ sɔɔ, ba ra Bibelin naasu gasu mɛɛriwa, su ka siɔnɔ tubusia. Bà n wa ma ben tubusia ni, nu mwaana ka Yori Dɛɛrin naa si su tie, ba ra ni yorewa. Nge mɛ ba dera Bibeli ya yen tii tubusiamɔ, ba kpĩa ba kpam gem kamɛ Gusunɔn yĩsiru sɔɔ, ka Win Bandu sɔɔ, Win himba tɔmbu ka tem sɔɔ, ye ya ra tɔmbu deemɛ bà n gu, ka yĩiyɔ gɔribun seebu sɔɔ. Ben kaso ya be yara saa naanɛ dokebu ka kom weesugim di.—Yohanu 8:31, 32.

Saa 1879 n di, Bibelin Keu Kowo ba tuba ma saa ya tura, bu ka gem mɛ mu raa berua nɔɔsia baama kpuro. Wɔ̃ɔ ge sɔɔwa, ba tire te ba mɔ̀ ka faransem La Tour de Garde annonce le Royaume de Jéhovah kparabu torua suru ka suru. Sa tie sa tire te kparamɔ. Gisɔn tɔ̃ru, sa Bibelin gem mɛ nɔɔsiamɔ tem 240 ka barum nge 750 ka sɔndiru sɔɔ. Bibelin gem mu ǹ da handunia pusi n tura saa yeni!

• Kirisin gɔɔn biru mba n Bibelin gem mɛ deema?

• Mba ya dera sa kpam ka gem mɛ mu wee saa Gusunɔn Garin di kamɛ?