Mban sɔ̃na sa ra mɛnnɔ bakasu ko?

A yɛ̃ yen dera tɔn be ba wãa foto yini sɔɔ ba nuku doo bakabu mɔ? Yen sɔ̃ ba bɛsɛn mɛnnɔ bɔkɔ gagu nawa. Nge mɛ Gusunɔ u win yerukon sãobu sɔ̃ɔwa ba n da mɛnnɛ nɔn ita wɔ̃ɔ baagere, mɛya bɛsɛn tii sa ra n bɛkɛ barɔ su mɛnna wuunu bakanu sɔɔ. (Sɔ̃ɔsiru 16:16) Wɔ̃ɔ baagere wɔrusu itawa sa mɔ: sɔ̃ɔ tiaguu, nɔn yiruwa sa ra ye ko; sa wɔru ge sɔkumɔ tem kãa bɔnun mɛnnɔ bɔkɔ. Sa maa teu mɔ sɔ̃ɔ itaguu, sa ge sɔkumɔ tem bɔnun mɛnnɔ bɔkɔ. Arufaani yirà sa ra wa mɛnnɔ si sɔɔ?

Mɛnnɔ si, su ra kĩru kpɛ̃asie bɛsɛn suunu sɔɔ. Nge mɛ Isireli ba ra n daa nuku dobu mɔ bà n Yehofa tɔmamɔ ‘mi win tomba mɛnnɛ,’ mɛya bɛsɛn tii sa ra n nuku dobu mɔ sà n Wi sãamɔ wɔru si sɔɔ. (Womu 26:12; 111:10) Wɔru sin bwesenu su ra sun saa kɛ̃ su ka waana kpa su mɛnna ka Seeda Dio be ba wee yigbɛnu ganun di, wuu marosu gasun di, gasɔ mam saa tem gam di. Sɔ̃ɔ sɔɔ, ka nuku doba sa ra mɛnnɛ kpa su dĩanu di sannu, mɛnnɔ yee ten mi; ya maa bɛsɛn bɔrɔnu tãsisiamɔ ya sosimɔ sanam mɛ sa tɔ̃ɔ baka te dimɔ. (Gɔrobun kookoosu 2:42) Mɛya, bɛsɛn baawure u ra ka nɔɔ tia ye sa mɔɔsinɛ handunia gira kpuro sɔɔn arufaani di.—1 Piɛɛ 2:17.

Mɛnnɔ si, su ra sun somi su ka wuswaa da bɛsɛn naanɛ dokebu sɔɔ. Isireliba ba ra raa maa arufaani wa Gusunɔn woodan tubusia ni ba ra be nɔɔsie sɔɔ. (Nɛɛmi 8:8, 12) Sa ra maa Bibelin sɔ̃ɔsinu nɔɔbu kã bɛsɛn mɛnnɔ baka si sɔɔ. Mɛnnɔ bɔkɔn kpunaa baayere ya ra n weewa saa Bibelin di. Samaan gari dori yi sa ra nɔ, ka “a koowo a sɔ̃ɔsiba,” yi sa ra wa kpuro, yi ra sun sɔ̃ɔsi mɛ sa ko ka Gusunɔn kĩru ko bɛsɛn wãaru sɔɔ. Sa ra maa dam wa ma sa nua mɛsum bɛsɛn kĩnasibu ba ka nɔni swãa ni ba waamɔ ben naanɛ dokebun sɔ̃ kamiamɔ, saa kɔ̃si yi sɔɔ. Tem bɔnun mɛnnɔ bakasu sɔɔ, sa ra dwee kobu mɛɛri bi ba yara saa Bibelin sɔ̃ɔsinun di, dwee bi, bu ra sun bwisi kɛ̃ too. Mɛnnɔ bɔkɔ baagere sɔɔ, be ba tii wɛ̃ bu ka Gusunɔn kĩru ko ba ra batɛmu ko.

• Mban sɔ̃na bɛsɛn mɛnnɔ bakasu su ra n sãa nuku dobun saa?

• Arufaani yirà kaa wa à n mɛnnɔ bɔkɔ gen teu da?