Amɔsunwa guro gurobu ba ra ka yigbɛru somisinɛ?

Sa ǹ paadiriba ǹ kun mɛ pasitɛɛba mɔ be ba ra kɔsie bɛsɛn yigbɛru sɔɔ. Nge mɛ ya raa sãa saa ye ba Kirisigibun yigbɛru swĩi, kparo be ba yewa ba ra gɔsi bu ka ‘Gusunɔn gɔ̃ɔ kpara.’ (Gɔrobun kookoosu 20:28) Guro gurobu ben naanɛ dokebu bu dam mɔ, bera ba ra gbi yigbɛnu sɔɔ bu ka ni kpara, “n ǹ mɔ ka tirasi. N ǹ mɔ yen sɔ̃ . . . [ba] gãanun binɛ mɔ,” adama, ka tii wɛ̃ɛbu ben sɔmburu sɔɔ. (1 Piɛɛ 5:1-3 VB) Sɔmbu terà ba ra sun kue?

Ba ra n bɛsɛn laakari mɔ kpa ba n sun kɔ̃su. Guro guro be, ba yigbɛru kparamɔ ma ba te somimɔ tu ka ten bɔrɔnu ka Gusunɔ tãsisia. Ba yɛ̃ ma Gusunɔwa u be sɔmbu baka ten bweseru yiire, yen sɔ̃, ba ku ra Gusunɔn tɔmbu dam dɔre adama, ba ra be somiwa ba n ka nuku dobu ka bɔri yɛndu mɔ. (2 Korinti 1:24) Nge mɛ yãa kparo u ra n win yãaru baateren nɔni do, nge mɛya guro guro baawure u ra n kookari mɔ̀ u ka yigbɛrun tɔnu baawure gia.—Mɔnnu 27:23.

Ba ra sun sɔ̃ɔsinu wɛ̃ su ka Gusunɔn kĩru ko. Arusuma baayere, guro guro be, ba ra swaa gbi yigbɛnun mɛnnɔsu sɔɔ bu ka bɛsɛn naanɛ dokebu dam sosi. (Gɔrobun kookoosu 15:32) Tɔn nuku tiagii be, ba ra maa sun gbiiye waasu kobun sɔmburu sɔɔ, ba ra ka sun sɔmburu ko kpa bu sun dera waasun swɛɛ kpuro sɔɔ.

Ba ra baawure dam mɛn bukata u mɔ kɛ̃. Bu ka baawure somi kpa u win bɔrɔnu ka Yehofa dam sosi, yigbɛ baateren guro gurobu ba ra ten tɔmbu bere ben yɛnusɔ ǹ kun mɛ Bandu yerɔ; bà n mɔ̀ mɛ, ba be somiru ka gɔ̃ru yɛmiabu kɛ̃mɔ saa Gusunɔn Garin diwa.—Yakɔbu 5:14, 15.

Sɔmbu te ba mɔ yigbɛru sɔɔ baasi, guro guro ben dabina ben sɔmburu mɔ te ta be somimɔ bu ka ben bukata yibia. Ben dabina maa kurɔ ka bibu mɔ be n weenɛ bu nɔɔri, bu be ben saa wɛ̃ kpa ba n ben laakari mɔ. Sɔmbu baka te kĩnasi be ba sun kuamɛn sɔ̃, ya tura su be bɛɛrɛ wɛ̃.—1 Tɛsalonika 5:12,13.

• Mba n da n guro gurobun sɔmburu yigbɛrun sɔɔ?

• Swɛɛ yirà sɔɔwa guro guro be, ba sɔ̃ɔsimɔ ma ba bɛsɛn baawuren arufaani kasu?