Wara sãa Yesu Kirisi?

1. Amɔsunwa Yesun wãaru ta torua?

Tɔmbu kpuro baasi, Yesu raa wãawa nge hunde wɔllɔ ba sere nùn mara temɔ. (Yohanu 8:23) U raa sãa Gusunɔn taka koora gbiikaa, u win baa nɔma kã bu ka gãa ni nu tie kpuro taka ko. Wi tɔnawa Yehofan tii tii u taka kua somiru sari, yen sɔ̃na deedeera ba wi sokumɔ Gusunɔn “Bii teereru.” (Yohanu 1:14) Yesu raa sɔmburu kua nge Gusunɔn gari nɔɔsio, yen sɔ̃na ba maa wi soka “Gari.”​—A Mɔnnu 8:22, 23, 30; Kolose 1:15, 16 gario.

2. Mban sɔ̃na Yesu u na temɔ?

Gusunɔ u win Bii gɔrima temɔ saa wɔllun di, u win wãaru mɔrisiama tɔn kurɔ Yuu goo wi kun durɔ yɛ̃n nukurɔ, kurɔ wiya ba mɔ̀ Maari. N mεn na Yesun tundo kun sãa tɔnu. (Luku 1:30-35) Yesu na temɔ (1) u ka gem sɔ̃ɔsi Gusunɔ sɔɔ (2) u ka sun sɔ̃ɔsi mεsum sa ko kpĩ su Gusunɔn kĩru ko baa sà n wãa nɔni swãanu sɔɔ (3) u ka sun win wãaru yiburo kɛ̃ nge “kɔsia yakiatiru.”​—A Mateu 20:28, NW gario.

3. Mban sɔ̃na sa “kɔsia yakiatirun” bukata mɔ?

Ye ba mɔ̀ “kɔsia yakiatiru” ya sãawa kɔsiaru bu ka tɔnu yakia saa gɔɔn nɔni sɔ̃ɔbun di. (Yaribu 21:29, 30) Saa toren di, Gusunɔ kun kĩ tɔnu u tɔkɔ ko kpa u gbi. Mban sɔ̃na sa ye gerua? Gusunɔ u raa tɔn durɔ gbiiko, Adamu sɔ̃ɔwa, u nεε ù n ye Bibeli mɔ̀ “durum” kua u koo gbiwa. N mεn na Adamu ù n kun daa durum kue u ǹ daa gbimɔ pai. (Torubu 2:16, 17; 5:5) Nge mε Bibeli ya gerua, gɔɔ “dua” tɔmbun handunia sɔɔ saa Adamun min di. Yen sɔ̃, Adamu win bibu kpuro durum tia ka yen swaa gawabu, gɔɔ. Sa kɔsia yakiatirun bukata mɔ tu ka sun yakia saa gɔɔn swaa gawabun di, tubi ye sa di saa Adamun min di.​—A Romu 5:12; 6:23 gario.

Wara koo kpĩ u kɔsia yakiati te kɔsia u ka sun yakia saa gɔɔn di? Bεsεn durum tɔnawa sa ra kɔsie, sà n gu. Tɔn durumgii goo kun kpɛ̃ u win tɔnusin durum kɔsia.​—A Womu 49:8-10 gario.

4. Mban sɔ̃na Yesu u gu?

Yesu kun daa sãa nge bεsε, u raa sãawa toraru sarirugii. Baa durum tia u ǹ koore, yen sɔ̃ ya ǹ weenε u gbi win durumban sɔ̃. Adama turobun toranun sɔ̃na Yesu u gu. Gusunɔ win kĩru handunia sɔ̃ɔsi n banda, ma u win Bii gɔrima u gbi bεsεn sɔ̃. Yesu maa sun kĩru sɔ̃ɔsi u win Tundo mεm nɔɔwa ma u win wãaru wɛ̃ bεsεn toranun sɔ̃.​—A Yohanu 3:16; Romu 5:18, 19 gario.

A fideo ye ba mɔ̀ Mban sɔ̃na Yesu u gu? mɛɛrio

5. Mba Yesu u mɔ̀ tɛ̃?

Sanam mε u raa wãa temɔ, Yesu u barɔbu bεkia, u gɔribu seeya ma u tɔn be ba wãa wahala sɔɔ faaba kua. N mεn na u sɔ̃ɔsi ye u koo tɔn be ba wi mεm nɔɔwamε ba kpuro kua sia. (Mateu 15:30, 31; Yohanu 5:28) Yesun gɔɔn biru, Gusunɔ u wi seeyama wãaru sɔɔ nge hunde. (1 Piɛɛ 3:18) Yera Yesu mara Gusunɔn nɔm geuɔ sere Yehofa u ka wi dam kã nge sunɔ u ka bandu di tem giran wɔllɔ. (Heberu 10:12, 13) Tɛ̃ Yesu u bandu dimɔ nge sunɔ wɔllɔ, ma win bwãabu ba labaari gea ye nɔɔsiamɔ handunia gira sɔɔ.​—A Daniɛli 7:13, 14; Mateu 24:14 gario.

N tie fiiko, Yesu koo win sinandu loo ko u ka nɔni swãanu kpuro ka ben min di nu wee kpeesia. Be ba Yesu naanε dokemɔ kpuro saa ba wi mεm nɔɔwamε, ba koo wãaru di alusanna sɔɔ temɔ.​—A Womu 37:9-11 gario.