SƆ̃ƆSIRU 6

Yĩiyɔbu Birà Gɔribu Ba Mɔ?

1. Labaari gea yera ya wãa gɔribu sɔɔ?

Maata ka Maari ba ben sesu Lasaa dam koosiamɔ saa ye ba nùn seeya gɔrin di

Saa ye Yesu u na Betaniɔ, Yerusalemun bɔkuɔ, win bɔrɔ Lasaa u raa gu kɔ yen sɔ̃ɔ nnε wee. Yesu u da sikirɔ ka Maata ka maa Maari, gɔri win sesubu. Ye n sosi, tɔn wɔrusu ba mεnna. A bwisikuo nuku dobu bi Maata ka Maari ba nua saa ye Yesu u Lasaa seeya wãaru sɔɔ ro?—A Yohanu 11:21-24, 38-44 gario.

Maata u raa labaari gea gɔribu sɔɔ yɛ̃ kɔ. U raa yɛ̃ ma Yehofa koo gɔribu seeya ba n ka maa wãa tem sɔɔ.—A Yoobu 14:14, 15 gario.

2. Mba n da koore tɔnu ù n gu?

Saa ye ba Adamu taka kua, yen biru saa ye u gu — Gusunɔ u Adamu sɔ̃ɔwa u nεε: “Tema na ka nun kua. Kaa maa wura a ko tem mε.”—TORUBU 3:19.

Ba tɔmbu kuawa saa tuan di. (Torubu 2:7; 3:19) Sa ǹ sãa hundeba yi yi wãa tɔn wasi sɔɔ. Sa sãawa tem minin taka koora, yen sɔ̃ gɔɔn biru, baa gãanu bεsε sɔɔ ku ra n maa tie ya n wasi. Sà n gu, bεsεn wii kɔndun tii ta ra gbi, ma bεsεn himba yi ra kam ko. Mεna, Lasaa kun gãanu gerua win gɔɔ sɔɔ domi gɔribu ba ǹ gãanu yɛ̃.—A Womu 146:4; Waasu kowo 9:5, 6, 10 gario.

Gɔɔn biru Gusunɔ u ra tɔmbu nɔni sɔ̃ dɔ̃ɔ sɔɔ ro? Saa min di Bibeli ya sɔ̃ɔsimɔ ma gɔribu ba ǹ gãanu yɛ̃, kiaman dɔ̃ɔ dokebu ya sãawa sɔ̃ɔsi weesugiru te ta Gusunɔ durum manimɔ. U ǹ mam gɔ̃ru dokere u tɔnu nɔni sɔ̃ dɔ̃ɔ sɔɔ, pai.—A Yeremi 7:31 gario.

A fideo ye ba mɔ̀ Mba n da tɔnu deemɛ ù n gu? mɛɛrio

3. Gɔribu ba ko kpĩ bu ka sun gari ko ro?

Gɔribu ba ǹ kpɛ̃ bu gari ko. Mɛna ba ǹ maa kpɛ̃ bu nɔ. (Womu 115:17) Adama maleeka gabu ba gɔsia kɔ̃sobu ba ra ka tɔmbu gari ko. Ba ra ko tɔn be ba n tamaa sãa ma ba sãa gɔribu. (2 Piɛɛ 2:4) Yehofa ra yinε su gɔribu soku.—A Sɔ̃ɔsiru 18:10, 11 gario.

4. Wara koo wurama wãaru sɔɔ?

Durɔ goo wi ba seeya gɔrin di ba nùn keu mɔ̀ Gusunɔ sɔɔ. Yen biru u maa gabu keu mɔ̀, be ba seeya gɔrin di.

Gɔribu tusurum tusurum be ba wãa sikirɔ ba koo wurama wãaru sɔɔ temɔ. Baa tɔn gabu be ba ǹ daa Gusunɔ yɛ̃ ma ba gãa kɔ̃sunu kua bu sere gbi, ba koo sikura.—A Luku 23:43, NW; Gɔrobun kookoosu 24:15 gario.

Be ba sikura ba koo kpĩ bu gem mεεri Gusunɔ sɔɔ kpa bu Yesu naanε doke, ba n wi mεm nɔɔwamε. (Kãsiru 20:11-13) Be ba wurama wãaru sɔɔ ma ba gãa geenu mɔ̀, ba koo kpĩ bu wãaru di tem sɔɔ sere ka baadomma.—A Yohanu 5:28, 29 gario.

5. Mba sikurabu bu sun sɔ̃ɔsimɔ Yehofa sɔɔ?

Gusunɔ u dera gɔribun yĩiyɔbu bu koora saa u win Bii gɔrima u gu bεsεn sɔ̃. N mεn na sikurabu bu sun Yehofan kĩru ka win durom mε mu ǹ sãa bεsεn kookoosun are, sɔ̃ɔsimɔ. Sanam mε gɔribu ba koo wurama wãaru sɔɔ, ben wara ya nun nεni kam kam a wa?—A Yohanu 3:16; Romu 6:23 gario.

À n kĩ a yɛ̃ru sosi, a tire te ba mɔ̀ Qu’enseigne réellement la Bible? ten wiru 6se, 7se ka 10se mεεrio.