SƆ̃ƆSIRU 8

Mban Sɔ̃na Gusunɔ u ra Kɔ̃sa ka Nɔni Swãaru Deri?

1. Amɔsunwa kɔ̃sa ya torua?

1. Adamu u dãa buu ge ba nɛɛ bu ku di mi mɛɛra; 2. Handunian wirugibu bwese bweseka; 3. Tabu — Gusunɔ u tɔmbu deri bu ben tii kpara saa tεεbu sɔɔ, u ka sɔ̃ɔsi mε ba ǹ kpɛ̃ bu tɔmbun wunanɔsun wɛ̃ε nɔɔ wa

Kɔ̃sa ya torua tem sɔɔ sanam mε Setam u wee gbiikisu kua. Saa toren di, Setam raa sãawa maleeka durum sarirugii, adama “u ǹ maa gem swĩi.” (Yohanu 8:44) U win tiin sãarun binε ka kɔdε kpɛ̃asia, adama sa yɛ̃ ma Gusunɔ tɔna n weenɛ su sã. Setam u tɔn kurɔ gbiiko, Efa, weesu kua, ma u nùn kɔkura u ka wi mεm nɔɔwa, kpa u Gusunɔ deri. Efa u ǹ Gusunɔ mεm nɔɔwε, ma Adamu u win kurɔ swĩi swaa ye sɔɔ. Swaa ye Adamu u sua ya ka nɔni swãaru ka gɔɔ na.—A Torubu 3:1-6, 19 gario.

Sanam mε Setam u Efa bwisi kã, u ku Gusunɔ mεm nɔɔwa, sanam mεya u Gusunɔn sina wɔrukiru seesibu torua. Tɔn gabu baasi, be ba tie kpuro ba Setam swĩi ma ba yina Gusunɔ u be kpara. Mεna Setam u gɔsia “handunian wirugii.”—A Yohanu 14:30; 1 Yohanu 5:19 gario.

2. Gusunɔn taka koora ya raa toraru mɔ ro?

Ye Gusunɔ u ra ko kpuro, yi sãawa yiburo. Tɔmbu ka maleeka be Gusunɔ raa taka kua, ba koo raa kpĩ bu Gusunɔ mεm nɔɔwa dee dee. (Sɔ̃ɔsiru 32:4, 5) Gusunɔ u sun taka kua ma u sun deri su ka tii sua su kɔ̃sa n kun mε gea ko. Tii mɔɔ te ta dera sa bεsεn kĩru Gusunɔ sɔ̃ɔsimɔ.—A Yakɔbu 1:13-15; 1 Yohanu 5:3 gario.

3. Mban sɔ̃na Gusunɔ u nɔni swãaru deri sere ka tɛ̃?

Saa min di ba Gusunɔ seesi Edεnin gbaaru sɔɔ, Yehofa u dera ba win sina wɔrukiru siki. Mban sɔ̃? U ka sɔ̃ɔsi ma hania ye ba koo ko kpuro bu ka tɔmbu kpara wi baasi, kama. (Waasu kowo 7:29; 8:9) Wɔ̃ɔ nɔrɔbun suba nɔbaa tian (6 000) biru tɔmbun wãaru sɔɔ, sa ye tuba kpasasa. Tɔmbun wirugibu ba kam wɔri, ba ǹ kpĩa ba tabu, gɔba, taki n kun mε bararu wĩε.—A Yeremi 10:23; Romu 9:17 gario.

Gusunɔn sinandu ta ǹ sãa nge tɔmbun sinandu, yen sɔ̃ ta ra be ba te wura arufaani kɛ̃. (Esai 48:17, 18) N tie fiiko, Yehofa u koo tɔmbun bannu kpeesia. Tɔn be ba Gusunɔn kparabu wura, be tɔnawa, ba ko n wãa temɔ.—Esai 11: 9.—A Daniɛli 2:44 gario.

A fideo ye ba mɔ̀ Mban sɔ̃na Gusunɔ u nɔni swãaru deri? mɛɛrio

4. Mba Gusunɔn suuru ya dera sa mɔ̀?

Setam u gerua u nεε yen tɔnu sari wi u ko Yehofa sã ka win tiin gɔ̃ru kĩru. A kĩ a sɔ̃ɔsi ma gari yi weesa? Kaa kpĩ! Gusunɔn suuru ya bεsεn baawure kpuro saa deriamε su ka wa su sɔ̃ɔsi, sà n Gusunɔn sinandu wura n kun mε tɔmbun sinandu. Ye sa wura, sa ye sɔ̃ɔsimɔ saa bεsεn wãarun kookoosun di.—A Yoobu 1:8-12; Mɔnnu 27:11 gario.

5. Amɔsunwa sa ko kpĩ su Gusunɔ sua nge bεsεn Wirugii?

Tɔmba Bibelin keu mɔ̀ — Swaa ye sa suamɔ bεsεn wãaru sɔɔ ya tusiamɔ sà n Gusunɔ kĩ nge bεsεn Wirugii

Sa ko kpĩ su Gusunɔ sua nge bεsεn Wirugii, sà n hania mɔ̀ su ka sãa geeru te ta wee saa Bibeli, Gusunɔn Gari, sɔɔn di kasu kpa su ko. (Yohanu 4:23) Sa ko kpĩ su sɔ̃ɔsi ma sa ǹ Setam kĩ nge bεsεn wirugii, sà n tii nεnumɔ politiki ka tabun di, nge mε Yesu u kua.—A Yohanu 17:14 gario.

Setam u win dam loo mɔ̀, ba n ka tamaa sãa ma daa ka kookoo kɔ̃susu su wã. Sanam mε sa kookoo si tusa, bɔrɔ ka dusi gabu ba koo sun yaakoru ko n kun mε bu sun seeri. (1 Piɛɛ 4:3, 4) Yen sɔ̃, n weenε su mεεri swaa yera sa ko sua. Sa ko ka be ba Gusunɔn kĩru mɔ mεnna ro? Sa ko win woodaba bwisigii ka kĩrugii mεm nɔɔwa de? Sà n ye mɔ̀, sa sɔ̃ɔsimɔ ma Setam u weesu kua sanam mε u raa nεε, nɔni swãaru sɔɔ, yen tɔnu sari wi u koo ko nde mε Gusunɔ u gerua.—A 1 Korinti 6:9, 10; 15:33 gario.

Kĩru te Gusunɔ u tɔmbu mɔwε, ta sɔ̃ɔsimɔ ma kɔ̃sa ka nɔni swãaru nu koo kpe kam kam. Be ba sɔ̃ɔsimɔ ma ba Gusunɔ naanε doke, ba koo wãarun dobu nɔ temɔ ka baadomma.—A Yohanu 3:16 gario.

À n kĩ a yɛ̃ru sosi, a tire te ba mɔ̀ Qu’enseigne réellement la Bible? ten wiru 11se mεεrio.