Asiri ye sa ko tubu ka nuku dobu

Goo nun asiri gaa sɔ̃ɔre ro?—a Bibeli ya asiri giri gaan gari gerumɔ. Ba ye soka “asiri ye ya dɛɛre.” Ya dɛɛre yèn sɔ̃ ya weewa saa Gusunɔn min di. Ba maa ye soka asiri, yèn sɔ̃ tɔmba kun daa gãanu yɛ̃ ye sɔɔ. Baa maleekaban tii, ba kĩ bu maa yɛ̃ru sosi asiri ye sɔɔ. A kĩ a asiri ye tubu?—

Yee yellun diya, Gusunɔ u tɔn durɔ ka tɔn kurɔ gbiikobu taka kua. Ben yĩsira Adamu ka Efa. Gusunɔ u be wãa yee buraru kã; ba te soka Edɛnin gbaaru. Adamu ka Efa bà n daa Gusunɔ mɛm nɔɔwa, be ka ben bibu, ba koo raa de tem gira kpuro mu ko alusanna, nge mɛ gbaa te ta raa sãa. Ba koo maa kpĩ ba n wãa alusanna sɔɔ sere ka baadommaɔ. Adama, a yaaye ye Adamu ka Efa ba kua?—

Adamu ka Efa ba ǹ Gusunɔ mɛm nɔɔwɛ, yen sɔ̃na sa ǹ maa wãa alusanna sɔɔ gisɔ. Adama, Gusunɔ u gerua u nɛɛ u koo ko tem gira kpuro mu ko buram, kpa baawure u wãaru di sɔɔ sere ka baadomma nuku dobu sɔɔ. Amɔsunwa Gusunɔ u koo ye koosina? Saa tɛɛbun di tɔmbu ba ǹ daa ye yɛ̃. Ya raa sãawa asiri.

Sanam mɛ Yesu u na temɔ, u tɔmbu asiri yen gari sɔ̃ɔsi u sosi. U gerua ma Gusunɔn Banda ta ka yã. Yesu u tɔmbu sɔ̃ɔwa bu kanaru ko kpa ban te tu na. Ban te ta koo de tem mu ko alusanna bura.

A sɛnde a ka asiri ye tubu?— A yaayo ma tɔn be ba Yehofa mɛm nɔɔwammɛ tɔnawa ba koo wãaru di alusanna sɔɔ. Bibeli ya sun faagi dabinu diiya, tɔn durɔbu ka tɔn kurɔbu be ba Yehofa mɛm nɔɔwa sɔɔ. A kĩ a gia tɔn be sɔɔ?— Su ben gabun wãaru mɛɛri kpa su wa amɔsunwa sa koo ka be saari.