SƆ̃ƆSIRU 7
A tii bwisikure a sãare wi kun goo mɔ ma bɛrum mu nun mɔ̀?
A bii yãkabu wi mɛɛrio foto ye sɔɔ. U sãare wi kun goo mɔ ma bɛrum mu wi mɔ̀, nge n ǹ mɛ ro? Yen bwesera nun deemare ro?— Sari wi yen bwesera kun deemare. Bibeli ya Yehofan bɔrɔ gabun gari kua, ba raa tii wa be tɔna, ma bɛrum be mwa. Ben turowa, Eli. A de su gia wi sɔɔ.
Yesabɛli u raa kĩ u Eli go
Eli u raa wãa Isireliɔ, saa yellun di ba sere Yesu mara. Isirelin sunɔ Akabu u ǹ daa Gusunɔ geo Yehofa sãamɔ. Akabu ka win kurɔ Yesabɛli ba raa bũu ge ba mɔ̀ Baali sãamɔ. Yen sɔ̃ tɔn dabi dabinu Isireliɔ ba Baali sãabu wɔri. Sunɔn kurɔ Yesabɛli wi u sãawa bwisi kɔ̃sagii ma u kĩ u be ba Yehofa sãamɔ kpuro go, baa Elin tii u wãa be u kĩ u go ba sɔɔ! A yɛ̃ mba Eli u kua?—
Eli u duka sua! U da min toma ma u kuku yeru kasu kpee wɔru sɔɔ. Wunɛn waaru sɔɔ, mban sɔ̃na u kua mɛ?— Geema, bɛruma mu raa wi mɔ̀. Adama, n ǹ weenɛ Eli u bɛrum ko. Mban sɔ̃? Yen sɔ̃, u yɛ̃ ma Yehofa u koo raa kpĩ u wi somi. Yehofa u raa Eli Win dam sɔ̃ɔsi kɔ. Sɔ̃ɔ teeru, Yehofa u raa Elin kanaru nua ma u dɔ̃ɔ kɔ̃ɔma saa wɔllun di. Yen sɔ̃na, sika sari Yehofa u koo raa kpĩ u Eli somi!
Amɔsunwa Yehofa u Eli somi?
Sanam mɛ Eli u wãa kpee wɔru ge sɔɔ, Yehofa ka wi gari kua u wi bikia u nɛɛ: ‘Mba a mɔ̀ mini?’ Eli u wisa u nɛɛ: ‘Nɛna na tie na maa nun sãamɔ. Nɛ turowa na tie, bɛrum man mɔ̀ domi ba kasu bu man go!’ Eli u tamaa sãa ma ba Yehofan sãɔbu kpuro go kɔ. Adama, Yehofa u Eli sɔ̃ɔwa u nɛɛ: ‘Aawo, ya ǹ mɛ. Tɔmbu nge nɔrɔbun suba nɔɔba yiru (7000) ba tie ba man sãamɔ. A de a n sãa wɔrugɔ. Sɔma maa tie ni kaa man kua.’ Eli u ko n nuku dobu mɔ u ka gari yi nɔɔ ro?—
Sɔ̃ɔsi terà sa koo kpĩ su sua saa ye ya Eli deeman di?— A ku tii bwisiku a sãa wunɛ tɔna pai, a ku maa bɛrum ko. A bɔrɔba mɔ be ba Yehofa kĩ ma ba maa nun kĩ. Yehofa maa dam bakam mɔ, u koo maa nun somi! Yèn sɔ̃ a yɛ̃ ka gem ma a ǹ sãa wunɛ tɔna! Ya nun dore ro?—
A NAA SINI GARIO WUNƐN BIBELI SƆƆ
1 Sinambu 19:3-18
Womu 145:18
1 Piɛɛ 5:9