Yeremi u Yehofan gari nɔɔsia saa kpuro sɔɔ

Gasɔ, tɔn ba ra sun yaakoru ko ǹ kun mɛ bu mɔru bɛsira, sà n be Yehofan gari sɔ̃ɔmɔ. Yen bwesera koo de sa n kĩ su Gusunɔn gari nɔɔ marisi. Gãanu nge mɛ ya nun deemare ro?— Bibeli ya sun aruwaasi goon gari sɔ̃ɔwa wi u raa Yehofa kĩ adama, n tie fiiko, u koo raa Gusunɔn gari nɔɔ marisi. Win yĩsira Yeremi. A de su gia su sosi wi sɔɔ.

Sanam mɛ Yeremi u sãa aruwaasi, Yehofa u nùn labaari gaa nɔɔsia ye u koo kpara: Ukoo tɔmbu kirɔ ko bu ka kɔ̃san koobu deri. Yeni ya Yeremi sɛ̃sia too ma bɛrum mu kpam wi mwa. U Yehofa sɔ̃ɔwa u nɛɛ: ‘Na ǹ yɛ̃ mba kon gere. Domi nɛ biiwa.’ Adama, Yehofa u nùn wisa u nɛɛ: ‘A ku bɛrum ko, kon nun somi.’

Yen sɔ̃ Yeremi u torua u tɔmbu kirɔ mɔ̀, u bu sɔ̃ɔwa ma Yehofa u koo be sɛɛyasia bà kun kɔsa. Wunɛn bwisikunu sɔɔ, tɔn be ba kua ye Yeremi u gerua ro?— Aawo, gaba wi yɛ̃ɛmɔwa ma gaba ka wi mɔru bara. Gaba mam kasu bu wi go! Wunɛn waaru sɔɔ, amɔsunwa Yeremi ko n sãa?— Bɛrum mu wi mwa sere u nɛɛ: ‘Na ǹ maa Yehofan gari gerumɔ pai!’ Adama, u ye deri ka gem ro?— Aawo, u ǹ deri. U Yehofa kĩa too sere u kpana u Win gari nɔɔ marisi. Yèn sɔ̃ Yeremi kun mari, Yehofa u wi kɔ̃su.

Wee sɔ̃ɔ teeru, tɔn kɔ̃soba Yeremi kare dɔkɔ ye ya pɔtɔkɔ yiba sɔɔ. Dĩanu sari, nim maa sari. Tɔn be ba kĩ bu Yeremi deri dɔkɔ ye sɔɔ kpa u gbiisi. Adama, ka Yehofan somiru u faaba wa!

Sɔ̃ɔsi terà kaa kpĩ a sua saa Yeremin kom n di?— Baa mɛ bɛrum mu raa wi gasɔ mwa, u ǹ Yehofan gari nɔɔ marisi. Sanam mɛ a Yehofan gari kparamɔ, tɔmba koo nun yɛ̃ɛ ǹ kun mɛ bu mɔru bɛsira. Ya koo de a biti soora ǹ kun mɛ bɛrum mu nun mwa. Adama, a ku Yehofan gari nɔɔ marisi pai! U koo nun somi baadomma, nge mɛ u Yeremi somi.