Amɔsunwa sa ra ka bɛsɛn mɛnnɔsu sɔɔru ko ya n wã?

À n ka Yehofan Seeda Dio goo Bibelin keu mɔ̀, sika sari kaa n da yèn keu i ko i ko n sɔɔru ko u sere na. Mɛya, ma a kĩ a mɛnnɔsun arufaani baka wa, n weenɛ a yen sɔɔru ko a sere da. Yà n sãa wunɛn dɔɔnɛ, kaa yen are baka di.

A kasuo domma ka magia kaa sɔɔru ye ko. Domma kaa n laakari kpindu mɔ? Buru buru yella, a sere bururun sɔma torewa, nge wɔ̃kura, sanam mɛ biba do? Baa yà kun koorɔ a saa dɛndɛna yi, baa ǹ n saa fiiko na, a ye swĩiyɔ, kpa a ku de gãanu nu nun yam ganɛ. A kasuo mi wɔkinu sari, a wunɛn laadio ka tele ka wunɛn kãnkarasi marisio. À n kanaru kua a sere keu ye ko, ya koo nun somi a n kun ka wurure gãanun sɔ̃, wunɛn bwisikunu kpuro yi n ka wãa Gusunɔn Gari sɔɔ.—Filipi 4:6, 7.

A yĩreru dokeo mi wisiba wãa kpa a ra ka kpĩ a wisi. A gina kasuo a tubu mban gariya ba mɔ̀ sɔ̃ɔsi te sɔɔ. A bwisikuo gari koo te sɔɔ, ǹ kun mɛ gari wii te sɔɔ, a mɛɛrio mɛ garin bɔnu baayere ya ka swɛɛnɛ, mɛ yi kpuro yi ka swaa swĩi; kpa a fotoba ka bikia bi bu sɔ̃ɔsi te dɛɛrasiamɔ kpuro mɛɛri. Yen biru, a garibun bɔnu baayere gario kpa a gari yi ba bikian wisibu kasu. A Bibelin naasi ba sia mi kasuo a gari, kpa a bwisiku mɛ ya ka sɔ̃ɔsi te kpakianamɔ sɔɔ. (Gɔrobun kookoosu 17:11) Sanam mɛ a gari yi ba bikian wisibu kamɛ garibun bɔnu ye sɔɔ, a yĩreru koowo bin gari yari ǹ kun mɛ gari dɔki sɔɔ, yeya ya koo ra nun somi a ka wisi bi yaaya. Sanam mɛ a wãa mɛnnɔ sɔɔ, à n kĩ, kaa kpĩ a nɔma sua wɔllɔ, a wisibu wɛ̃ ka wunɛn tiin gari dɔki.

Ma a mɛnnɔ sin sɔ̃ɔsi baanire wɛ̃ɛrimɔ arusuma baayere, a yɛ̃ru sosimɔ wunɛn Bibelin dukia beru yeru sɔɔwa mi.—Mateu 13:51, 52.

• Dɔɔnɛ yerà n weenɛ a n mɔ mɛnnɔsun sɔɔrun sɔ̃?

• Amɔsunwa kaa kpĩ a sɔɔru ko a ka gari wisi mɛnnɔ sɔɔ?