Amɔsunwa bɛsɛn Sina Asakpɔra sɔmburu mɔ̀ gisɔn tɔ̃ru?

Wɔ̃ɔ wunɔbu gbiika sɔɔ, tɔn wuuru piibu gagu, ‘gɔrobu ka guro gurobu Yerusalemuɔ,’ ba raa sɔmburu mɔ̀ kirisigibun sina asakpɔru sɔɔ bu ka gari giri gɛɛ wunana ka Kirisigii be ba sawe kpuron yĩsiru. (Gɔrobun kookoosu 15:2) Nge mɛ ba ra raa wesianɛ ka Bibelin gere, ma ba dera Gusunɔn hunde ya be kpare, ba ra nɔɔ tia ko bu ka wɛ̃ɛ nɔɔ wa gari gɛɛ sɔɔ. (Gɔrobun Kookoosu 15:25) Yera bɛsɛn Yigbɛrun Sina Asakpɔra maa mɔ̀ gisɔ.

Gusunɔwa u Sina Asakpɔru loo mɔ̀ tu ka Win kĩru ko. Kĩnasi be ba sawe, ben gaba ba sɔmburu mɔ̀ Sina Asakpɔrɔ, ba ra Gusunɔn Gari kã too ma ba yɛ̃ru mɔ Bibelin gari sɔɔ ka maa mɛsum sa ko ka Gusunɔn Gari mɛm nɔɔwa sɔɔ. Ba ra mɛnnɛ arusuma baayere bu ka kĩnasibun bukata wɛ̃ɛri handunia gira kpuro sɔɔ. Nge mɛ ba ra raa ko Gɔrobun saa sɔɔ, ba ra Bibelin sɔ̃ɔsinu yigbɛnu mɔrisie tirenu sɔɔ; ba koo maa kpĩ bu sɔ̃ɔsi ni mɔrisia ka tem kãa bɔnun kparobu ǹ kun mɛ ka maa swɛɛ gɛɛ. Yeni ya ra de nɔɔ tia ya n wãa kom sɔɔ, Gusunɔn tɔmbu kpuron suunuɔ. (Gɔrobun kookoosu 16:4, 5) Sina Asakpɔra ra n maa hunden dĩanun sɔɔrun nɔni do, ma ta tɔmbu dam kɛ̃mɔ bu ka Gusunɔn Bandun kparabu wuswaa daasia, ta ra maa kĩnasi be ba koo yi sɔmburu ganun wɔllɔ kpare.

Sina Asakpɔru ta ra tii deri Gusunɔn hunde yu te kpara. Sina Asakpɔru ta ra de Sina Wɔrukoo, Yehofa, ka yigbɛrun Wirugii, Yesu, bu tu swaa sɔ̃ɔsi. (1 Korinti 11:3; Efesu 5:23) Sina Asakpɔ ten tɔmba ku ra tii garisi ma bera ba sãa Gusunɔn tɔmbun wirugibu. Be, ka Kirisigii be ba sawe kpuro, ba “Yãa kinɛ kpɛm te [Yesu] swĩiwa baama kpuro mi ta dɔɔ.” (Kãsiru 14:4) Sina Asakpɔ ta ra bɛsɛn kananu siare ni sa mɔ̀ ten sɔ̃.

• Berà ba raa sãa sina asakpɔ ten tɔmbu wɔ̃ɔ wunɔbu gbiika sɔɔ?

• Amɔsunwa bɛsɛn Sina Asakpɔra ra ka Gusunɔn kparabu kasu gisɔn tɔ̃ru?