BƆNU 9
Wunɛ ka wunɛn yɛnugibu i nɔɔ tia koowo Yehofan sãaru sɔɔ
“I nùn sãawɔ wi u wɔllu ka tem taka kua.”—Kãsiru 14:7
Nge mɛ a wa tire teni sɔɔ, Bibeli ya gee kpɛɛkpɛɛkugii dabinu mɔ yi yi koo nun somi ka wunɛn yɛnugibu sannu. Yehofa u kĩ i n nuku dobu mɔ. U nɔɔ mwɛɛru kua u nɛɛ ma i win sãaru gbiisia “yen biru u koo bɛɛ wɛ̃ ye ya tie.” (Mateu 6:33) Gusunɔ kĩwa gem gem a ko win bɔrɔ. A saa baayere dendio a ka wunɛn bɔrɔnu yewe ka Gusunɔ sannu. Durom gam maa sari mɛ mu mɛ tura tɔnun wãaru sɔɔ.—Mateu 22:37, 38.
1 I BƐƐN BƆRƆNU KA YEHOFA DAM SOSIO
YE BIBELI YA GERUMƆ: “Kon ko bɛɛn Baaba. Bɛɛ maa kpa i ko nɛn bii tɔn durɔbu ka tɔn kurɔbu. Yeya Yinni dam kpurogii u gerua.” (2 Korinti 6:18) Gusunɔ u kĩ a gɔsia win bɔrɔ naanɛgii. Kanara koo kpĩ tu nun somi swaa ye sɔɔ. Yehofa u nun kanamɔ a n “da n kanaru mɔ̀ saa baayere.” (1 Tɛsalonika 5:17) U ra kã u wunɛn tii tiin bwisikunu ka ye n nun nɛni nɔ. (Filipi 4:6) Ma a kanamɔ ka wunɛn yɛnugibu sannu, ba koo wa ma Yehofa u nun sãawe Goo wi u wãa.
Ma a ka Gusunɔ gari mɔ̀, n weenε a maa wi swaa daki. Kaa kpĩ a ye ko à n win Gari ka maa tire ni nu Bibelin gari sɔ̃ɔsimɔn keu mɔ̀. (Womu 1:1, 2) A bwisikuo sãa sãa ye a garimɔ sɔɔ. (Womu 77:12, 13) A maa ka Gusunɔ swaa daki, n weenε a n da Kirisigibun mεnnɔsu de baadomma.—Womu 122:1-4.
À n gabu Yehofan Gari sɔ̃ɔmɔ, swaa giri gaa maa mi a ka wunεn bɔrɔnu dam sosi ka Wi. Mε n nɔɔ a ye mɔ̀, mε n nɔra kaa maa ka tubu ma a Wi susimɔ.—Mateu 28:19, 20.
YE KAA KPĨ A KO:
A saa yio ye sɔɔ tɔ̃ɔ baatere kaa n da Bibeli gari kpa a kanaru ko
Wunε ka wunεn yεnugibu i de Yehofan sãaru ta n wɛ̃raru ka dweebu gbiiye bεεn wãaru sɔɔ
2 I N NUKU DOBU MƆ BƐƐN YƐNU SÃARU SƆƆ
YE BIBELI YA GERUMƆ: “I Gusunɔ susio, u koo maa bεε susi.” (Yakɔbu 4:8) N weenε i kpunaa yi bεεn yεnu sãarun sɔ̃ kpa i kookari ko i ka baadomma kpunaa ye swĩi. (Torubu 18:19) Adama, ye tɔna ya ǹ tura. N weenε Gusunɔ u n win baa mɔ bεεn baadomman wãaru sɔɔ. Ma i Yehofan gari gerumɔ “yεnuɔ ka swaaɔ ì n wuu dɔɔ ka saa ye i ko i kpuna ka saa ye i seewa” bεεn yεnun bɔrɔnu ka Gusunɔ nu koo dam ko. (Sɔ̃ɔsiru 6:6, 7) I de ye i naa gire bεεn wãaru sɔɔ ya n sãa nge ye Yosue u raa naa gira u ka nεε: “nε ka nεn yεnugibu, Yinni Gusunɔwa sa ko sã.”—Yosue 24:15.
YE I KO I KPĨ I KO:
I de i bεεn sãarun kpunaa swĩi baadomma kpa ya n bεεn baawuren bukata ye u mɔ yibiamɔ