Hesekiel

46 “Songon on ma hata ni Jahowa Tuan Natumimbul i, ‘Gerbang ni alaman na di bagasan na menghadap tu timur,+ ikkon torus do ditutup+ saleleng onom ari,+ i ma ari mula-ulaon. Alai di ari Sabat dohot di ari perayaan bulan baru ikkon dibukka do gerbang i. 2 Masuk ma pamimpin i sian alaman na di luar tu terras ni gerbang i.+ Jongjong ma ibana di labbung ni tiang ni pintu na di gerbang i. Dipelehon akka malim ma pelean situtungon dohot pelean pardamean* ni ibana. Dung i marsinggang ma ibana di labbung ni pintu masuk jala kaluar. Alai anggo gerbang i dang boi ditutup sappe borngin. 3 Dohot do muse sude rakyat ni luat i marsinggang di jolo ni Jahowa, di pintu masuk ni gerbang i ganup ari Sabat dohot di tikki perayaan bulan baru.+

4 “‘Di tikki ari Sabat ikkon boanon ni pamimpin i do pelean situtungonna. Ikkon diboan ibana do tu Jahowa onom anak ni biru-biru. Ikkon jantan do i sude jala sehat. Dung i diboan ibana ma sada biru-biru jantan na sehat.+ 5 Dongan ni biru-biru jantan i, ikkon dilehon ibana do sada epa* topung lao gabe pelean sipanganon.* Jala dongan ni akka anak ni biru-biru na jantan i, ikkon lehononna do aha na tolap dilehon ibana. Ikkon dilehon ibana do sada hin* miak dongan ni sada epa topung.+ 6 Akka on ma na ikkon dilehon ibana tikki perayaan bulan baru i: sada lombu jantan na poso jala na sehat, onom anak ni biru-biru jantan, dohot sada biru-biru jantan. Ikkon sehat do sudena i.+ 7 Dongan ni lombu jantan na poso i, ikkon dilehon ibana do sada epa topung lao gabe pelean sipanganon. Dongan ni biru-biru jantan i ikkon lehononna do sada epa topung. Jala dongan ni akka anak ni biru-biru na jantan i, ikkon lehononna do aha na tolap dilehon ibana. Ikkon dilehon ibana do sada hin miak dongan ni sada epa topung.

8 “‘Molo naeng masuk sahalak pamimpin ikkon lewat ma ibana sian terras ni gerbang i, jala ikkon sian i do muse ibana kaluar.+ 9 Di tikki perayaan i+ molo ro halak na di luat i naeng manomba Jahowa, jala masuk ma ibana sian gerbang na di utara,+ ikkon sian gerbang na di selatan ma ibana kaluar. Jala halak na masuk sian gerbang na di sabola selatan,+ ikkon kaluar sian gerbang na di sabola utara. Dang adong na boi kaluar sian gerbang ingananna masuk i. Ikkon sian gerbang na di baribana i do nasida kaluar. 10 Jala taringot tu pamimpin na di tonga-tonga ni nasida, ikkon dohot do ibana masuk tikki masuk nasida. Jala ikkon kaluar do ibana tikki kaluar nasida. 11 Saleleng masa akka perayaan,* ikkon dilehon do pelean sipanganon. Dongan ni lombu jantan na poso, ikkon dilehon ibana do sada epa topung. Dongan ni biru-biru jantan ikkon lehononna do sada epa topung. Jala dongan ni akka anak ni biru-biru na jantan, ikkon lehononna do aha na tolap dilehon ibana. Ikkon dilehon ibana do sada hin miak dongan ni sada epa topung.+

12 “‘Molo diparade pamimpin i pelean situtungon+ manang pelean pardamean na gabe pelean sian na nionjar ni rohana tu Jahowa, ikkon dibukka do gerbang na menghadap tu sabola timur i di ibana. Ikkon paradeonna do pelean situtungon dohot pelean pardamean i dos songon na dibahen ibana di ari Sabat.+ Dung kaluar ibana, ikkon ditutup do muse gerbang i.+

13 “‘Ikkon paradeonmu do ganup ari sada anak ni biru-biru jantan na sehat jala na marumur sataon tu toru lao gabe pelean situtungon tu Jahowa.+ Ulahon ma i ganup manogot. 14 Asing ni i, ikkon paradeonmu do ganup manogot saparonom epa topung pelean sipanganon jala sapartolu hin miak lao dipispisson tu topung na halus i. On ma na gabe pelean sipanganon na dipelehon ganup manogot tu Jahowa. Marlakku do peraturan on saleleng ni lelengna. 15 Ikkon diparade nasida do anak ni biru-biru jantan, pelean sipanganon, dohot miak ganup manogot lao gabe pelean situtungon na dipelehon ganup ari.’

16 “Songon on ma hata ni Jahowa Tuan Natumimbul i, ‘Molo dilehon pamimpin hadiah tu ganup anakna, lao gabe warisan ni anakna i, gabe appuna ni anakna i ma tano na dijalo nasida i. Tutu, arta na dijalo nasida i ma na gabe warisan ni nasida. 17 Alai molo dilehon pamimpin i parbagiananna gabe hadiah tu parkarejona, gabe appuna ni parkarejona i ma i sappe taon haluaon.+ Dung i ikkon paulakonna do i muse tu pamimpin i. Ai holan akka anakna bawa do na boi nappuna warisan ni nasida saleleng ni lelengna. 18 Dang boi rampason ni pamimpin i tano warisan ni bangsokki. Dang boi usironna bangso i sian tano ni nasida. Ikkon tanona sandiri do na boi dilehon ibana gabe warisan tu akka anakna. Alani i dang adong sian bangsokki na boi diusir sian tanona.’”

19 Dung i diboan ibana ma au muse masuk lewat sian dalan masuk+ na di sapping ni gerbang na lao tu ruang makan* na badia appuna ni malim i, i ma gerbang na menghadap tu utara.+ Disi huida ma adong sada inganan na adong di pudi di sabola barat. 20 Didok ibana ma tu au, “On ma inganan ni akka malim lao mangarobus pelean hasalaan, pelean hasesaan ni dosa, jala on ma inganan ni nasida mamanggang pelean sipanganon.+ Dison do diulahon nasida i asa unang pola be diboan nasida manang aha tu alaman na di luar. Jala asa unang dibahen nasida gabe badia akka halak na disi.”+

21 Dung i diboan ibana ma au tu alaman na di luar. Diboan ibana ma au tu ganup suhi-suhi ni alaman i. Huida ma adong do alaman di ganup suhi-suhi ni alaman na di luar i. 22 Di opat suhi ni alaman i adong do akka alaman na gelleng, 40 asta* ma ganjangna jala 30 asta ma bidangna. Sarupa do ukkuran ni alaman na opat i. 23 Di sakaliling ni alaman na opat i adong do tembok na pendek. Jala di bagian toruna adong do akka inganan lao mangarobus pelean. 24 Dung i didok ibana ma tu au, “On ma dapur ni akka halak na karejo di bagas joro lao mangarobus pelean na nilehon ni akka bangso i.”+