1 Kronika
14 Disuru Raja Hiram+ na sian Tirus ma halak mandapotton si Daud. Dilehon ibana do muse hau ares, akka parkarejo na malo pajongjokkon tembok, dohot akka tukkang hau lao pajongjokkon istana ni si Daud.+ 2 Gabe diboto si Daud ma naung hot ibana dibahen Jahowa gabe raja ni halak Israel.+ Jala diboto ibana ma, Debata do na mambahen lam marhuaso harajaonna lao mangurupi bangso Israel.+
3 Lam godang ma dibuat si Daud akka borua na di Jerusalem gabe istrina.+ Gabe lam godang ma anak dohot boruna.+ 4 On ma goar ni akka gellengna na tubu di Jerusalem:+ si Samua, si Sobab, si Natan,+ si Salomo,+ 5 si Ibar, si Elisua, si Elpelet, 6 si Noga, si Nepeg, si Japia, 7 si Elisama, si Beliada, dohot si Elipelet.
8 Dung dibege halak Palistim naung tarpillit* si Daud gabe raja ni halak Israel,+ sude ma halak Palistim ro mangalului si Daud.+ Dung dibege si Daud i, lao ma ibana mangalo nasida. 9 Sahat ma halak Palistim di Rura Repaim+ jala dihaliangi nasida ma rura i. 10 Disukkun si Daud ma tu Debata, “Lao do au mangalo halak Palistim? Pasahatonmu do nasida tu au?” Dialusi Jahowa ma, “Lao ma ho. Ai pasahatonku do halak Palistim tu ho.”+ 11 Lao ma si Daud tu Baal-perazim,+ jala ditaluhon ibana ma halak Palistim disi. Didok ibana ma, “Marhite au, ditaluhon Debata na sittong do akka musukku songon tembok na maruppak alani aek.” Alani i ma digoari ibana inganan i Baal-perazim.* 12 Ditinggalhon halak Palistim do disi akka patung na disomba nasida. Dung i disuru si Daud ma asa ditutung i sude.+
13 Di pudian ni ari, dihaliangi halak Palistim ma muse rura i.+ 14 Disukkun si Daud ma muse Debata. Alai didok Debata na sittong i ma, “Unang ma maju ho. Alai mamutar ma ho sian pudi ni nasida jala taluhon ma nasida di jolo ni ramba* na marsuga i.+ 15 Molo dibege ho soara sian ginjang ni ramba na marsuga i songon soara ni halak na marbaris, pittor alo ma nasida. Ai nungnga mardalan Debata na sittong di jolomuna lao manaluhon tentara ni halak Palistim.”+ 16 Dibahen si Daud ma songon na nidok ni Debata na sittong i,+ jala ditaluhon nasida ma tentara ni halak Palistim mulai sian Gibeon sahat tu Gezer.+ 17 Gabe tarbarita ma si Daud di sude luat. Jala dibahen Jahowa do akka bangso i mabiar tu ibana.+