Jeremia

34 Tikki marporang si Nebukadnesar* raja ni Babel rap dohot sude tentarana, dohot sude harajaon na dirajai ibana di tano on, dohot sude bangso mangalo Jerusalem dohot sude kotana,+ makkatai ma muse Jahowa tu si Jeremia,

2 “Songon on ma hata ni Jahowa Debata ni Israel, ‘Dokkon ma tu si Sedekia+ raja ni Juda songon on, “On ma hata ni Jahowa, ‘Pasahatonku nama kota on tu tangan ni raja ni Babel, jala tutungon+ ni ibana nama kota on. 3 Dang na lao malua ho sian tanganna, pasti ditakkup do ho jala dipasahat tu tanganna.+ Ikkon lao do ho tu Babel.+ Pasti pajuppang bohi do ho dohot raja ni Babel jala langsung makkatai dohot ibana.’ 4 Alai tangihon ma hata ni Jahowa, ale Sedekia raja ni Juda, ‘Songon on do hata ni Jahowa taringot tu ho, “Dang na lao mate ho dibahen podang. 5 Na lao sonang do parmatem,+ bahenon ni halak do upacara lao manutung ho mamakke dupa, dos songon na diulahon nasida tu akka ompum, tu akka raja andorang so ho. Andungan ni nasida ma ho jala didok ma, ‘Amango tuannami!’ ai ‘Au do naung mandok i,’ ninna Jahowa.”’”’”

6 Dung i dipaboa Panurirang* Jeremia ma sudena on tu si Sedekia raja ni Juda di Jerusalem, 7 i ma tikki ro tentara ni raja Babel marporang mangalo Jerusalem dohot sude akka kota na di Juda na adong dope,+ i ma kota Lakis+ dohot kota Azeka.+ Ai holan kota i nama na tinggal sian sude kota na marbenteng di Juda.

8 Makkatai ma Jahowa tu si Jeremia dung na dibahen si Sedekia parjanjian dohot sude halak di Jerusalem paboahon na so gabe hatoban be nasida.+ 9 Ikkon paluaon ni ganup halak ma hatobanna halak Heber, bawa nang borua. Jala dang adong be sian nasida na mambahen donganna halak Jahudi gabe hatoban. 10 Dioloi sude pamimpin dohot sude bangso i do paretta taringot tu parjanjian i. Setuju do nasida lao paluahon sude hatoban bawa dohot hatoban borua, jala dang mambahen nasida be gabe hatoban. Dioloi bangso i do i jala dipasombu nasida do lao hatoban i. 11 Alai di pudian ni ari, diboan nasida do muse mulak hatoban bawa dohot hatoban borua i. Dipaksa nasida do akka hatoban i karejo muse. 12 Dung i makkatai ma muse Jahowa tu si Jeremia, songon on ma hata ni Jahowa,

13 “Songon on ma hata ni Jahowa Debata ni Israel, ‘Nungnga hubahen be parjanjian tu akka ompumuna+ di ari tikki huboan nasida kaluar sian Mesir, sian inganan ni nasida tikki gabe hatoban.*+ Hudok do tu nasida, 14 “Molo dijual tu hamu donganmuna halak Heber lao gabe hatoban, ikkon paluaonmuna do ibana molo dung karejo ibana saleleng onom taon. Ikkon paluaonmuna do ibana di taon na papituhon.”+ Alai dang diparrohahon jala dang ditangihon akka ompumuna i Au. 15 Baru* dope hamu muba jala mangulahon na sittong di jolokku. Baru dope dipalua hamu akka donganmuna naung dibahen hamu gabe hatoban. Jala baru dope dibahen hamu parjanjian di jolokku di jabu na hupillit lao pasangappon goarhi. 16 Alai pittor muba do hamu jala dibahen hamu do marlea goarhu.+ Diboan hamu do muse mulak hatoban bawa dohot hatoban borua naung dipaloas hamu lao tu inganan na dihalomohon nasida. Dipaksa hamu do muse nasida karejo jala gabe hatobanmuna.’

17 “Alani i, songon on ma hata ni Jahowa, ‘Ala dang dioloi hamu hatakku di tikki hudok asa dipalua hamu akka donganmuna na gabe hatobanmuna i,+ Au ma na parohon haluaon,’ ninna Jahowa. ‘Tutu, paluaokku ma hamu di tikki dipamate hamu mamakke podang, sahit na masa di godang inganan, dohot haraparon.+ Bahenokku ma sude harajaon na di tano on mabiar mangida aha na masa tu hamu.+ 18 Songon on ma na lao masa tu akka halak na mangalanggar parjanjian na hubahen i. Nang pe nungnga dibola dua nasida sada anak ni lombu, jala mardalan nasida sian holang-kolang ni lombu na dibola dua i,*+ alai dang diulahon nasida isi ni parjanjian na dibahen nasida di jolokki. 19 Tutu, nungnga lewat sian holang-kolang ni lombu na dibola dua i akka pamimpin ni Juda, akka pamimpin ni Jerusalem, akka pejabat ni istana, malim, dohot sude penduduk ni luat on. 20 Pasahatonku ma nasida tu tangan ni musu ni nasida, tu tangan ni akka halak na naeng pamatehon nasida. Bahenokku ma bakke ni nasida gabe siallangon ni akka pidong na di langit dohot akka binatang liar na di tano on.+ 21 Pasahatonku ma si Sedekia raja ni Juda dohot akka pejabatna tu tangan ni musu ni nasida, tu tangan ni akka halak na naeng mambunu nasida jala tu tangan ni tentara ni raja ni Babel+ naung mundur sian hamu.’+

22 “Didok Jahowa ma, ‘Bahenokku ma paretta, jala boanokku ma muse nasida mulak tu kota on. Aloon ni nasida ma kota on, taluhononna, jala tutungonna.+ Bahenokku ma akka kota na di Juda gabe tarulang jala dang adong na mangingani.’”+