Hesekiel
19 “Endehon hamu ma ende andung-andung taringot tu akka pamimpin ni Israel. 2 Jala dokkon ma,
‘Ise do inangmuna? Singa boru-boru na di tonga-tonga ni akka singa i do inangmuna.
Peak do ibana di tonga-tonga ni akka singa na poso jala na gogo, laos disi do ibana pagodang-godangkon akka anakna.
3 Dipagodang-godang ibana ma sada sian akka anakna i, gabe singa na poso jala na gogo ma anakna i.+
Marsiajar ma ibana marburu
Jala diparsiajari ibana do songon dia mamboddut jolma.
4 Dibege akka bangso ma taringot tu ibana jala ditakkup ma ibana di bagasan sada lubang,
Dung i disarat ma ibana tu Mesir mamakke hait-hait.+
5 Sai dipaima inangna ma ibana jala ujungna diboto ma dang na lao mulak be anakna i.
Dung i dibuat inangna i ma muse anakna na asing jala dilatik ma i muse gabe singa na poso jala na gogo.
6 Mardalan ma singa na poso i di tonga-tonga ni akka singa, gabe singa na poso jala na gogo ma ibana.
Marsiajar ma ibana songon dia marburu, jala songon dia mamboddut jolma.+
7 Mardalani do ibana torus di tonga-tonga ni akka menara ni jolma na marbenteng jala dihancurhon ibana do akka kota ni nasida.
Alani i tarbege do soarana na marauang i+ di sude luat na tarulang i.
8 Ro ma akka bangso na di sakalilingna lao mangalo ibana, jala disappatton ma jaring tu ibana.
Dung i tartakkup ma ibana di bagasan sada lubang.
9 Disarat nasida ma ibana mamakke hait-hait tu sada kandang jala diboan ma ibana tu raja ni Babel.
Dihurung nasida ma ibana disi, gabe dang tarbege be soarana di akka dolok ni Israel.
10 Songon hau anggur*+ do inangmu na disuan di labbung ni godang aek.
Marparbue ma i jala mardakkai dibahen godang ni aek i.
11 Gabe togu ma akka dakkana,* jala boi dibahen gabe tukkot ni akka pamaretta.
Gabe lam timbo ma i jala gabe untimbo sian akka hau na asing.
Takkas ma i tarida alani timbona dohot lomakna.
12 Alai di bagasan muruk, dicabut+ ma ibana jala disappatton tu tano on.
Dung i ro ma alogo na sian timur mambahen koring parbuena.
Maponggol ma dakkana na togu i jala gabe koring,+ dung i matutung ma i dibahen api.+
13 Saonari disuan ma ibana di gurun,
Di tano na koring jala na so adong aekna.+
14 Rarat ma api manutung hau i mulai sian dakkana* sahat tu tunasna sahat tu parbuena,
Dang adong be dakkana na togu jala dang adong be na boi dibahen gabe tukkot lao mamaretta.+
“‘On ma ende andung-andung, jala toktong ma i gabe ende andung-andung.’”