Hesekiel
31 Di ari na parjolo, di bulan na patoluhon di taon na pasappulu sadahon makkatai ma muse Jahowa tu au. Didok ma, 2 “Ale anak ni jolma, makkatai ma ho tu si Firaun raja ni Mesir i dohot tu akka tentarana.+ Dokkon ma,
‘Tu ise ma patudoson balga ni huasom?
3 Songon halak Asiria do ho, songon hau ares na di Libanon,
Massai timbo do ho, bagak do akka dakkam jala lomak do akka bulungmu,
Pola do sahat akka pussuna i tu ombun.
4 Lam balga ma i alani mata mualna, jala lam timbo ma i alani aek na bagas.
Adong do akka sunge di sakaliling ni hau i,
Akka sunge na gabe dalan ni aek lao tu akka hau na di ladang.
5 Alani i do gabe untimbo ibana sian akka hau na asing na adong di ladang.
Lam godang ma akka rattingna, jala lam godang ma akka dakkana,
Ai godang situtu do aek di akka sungena i.
6 Di akka dakkana i ma marasar akka pidong,
Di toru ni akka dakkana i ma maranak sude binatang liar,
Jala di toru ni hau i ma maringanan sude bangso na balga.
7 Massai uli do hau i jala ganjang situtu do akka dakkana,
Ai bagas do uratna manjirir tu inganan na godang aekna.
8 Dang adong hau ares di taman ni Debata+ na boi dipatudos tusi.
Dang adong hau juniper na marratting songon i,
Jala dang adong nanggo sada pe hau platanus na songon i dakkana.
Dang adong hau di porlak ni Debata na ubbagak sian i.
9 Hubahen do ibana massai uli, jala lomak situtu do akka bulungna,
Sude akka hau na di Eden, di taman ni Debata na sittong i cemburu do mangida ibana.’
10 “Alani i, songon on ma hata ni Jahowa Tuan Natumimbul i, ‘Ala nungnga massai timbo ibana,* pola do sahat akka pussuna i tu ombun, jala ala nungnga gabe ginjang rohana, 11 pasahatonku ma ibana tu parhuaso na gogo, na mamaretta akka bangso.+ Hukumon ni parhuaso i ma ibana, jala dang olo be Au manjalo ibana alani hajahatonna i. 12 Tabaon ni akka halak na sian bangso na asing ma ibana. Tabaon ni akka bangso na ukkejam. Dung i marurus ma akka bulungna di sude rura. Marponggolan ma akka dakkana jala marserak di sude sunge na di luat i.+ Lao ma sude bangso na di tano on maninggalhon ibana, i ma akka bangso na hea marlinggom tu ibana. 13 Maringanan ma sude pidong di bonana naung maruppak i. Jala tinggal ma di akka dakkana i sude binatang liar.+ 14 Dibahen do songon i asa unang gabe patimbohu akka hau na jonok tu aek. Manang asa unang gabe sahat akka pussu ni hau i tu ombun. Tutu, asa unang gabe patimbohu akka hau nang pe godang aek dapotna. Ai nungnga dipasahat nasida sude tu hamatean, tu toru ni tano rap dohot akka jolma na lao turun tu kuburan.’
15 “Songon on do hata ni Jahowa Tuan Natumimbul i, ‘Di ari tikki na turun i ibana tu kuburan, bahenokku ma sude halak mangandungi. Alani i, tutupokku ma mata mual. Tutupokku ma dalan ni aek na di sunge asa unang mardalan be aek na godang i. Bahenokku ma golap Libanon alani i. Jala gabe malos ma sude hau na di ladang. 16 Boanokku ma hau i turun tu Kuburan* rap dohot akka halak na turun tu kuburan. Begeon ni akka bangso ma soarana tikki na maruppak i ibana. Gabe makkahitir ma nasida. Sude hau na di Taman Eden,+ sude hau na ubbagak jala na dumenggan na sian Libanon, tutu sude hau na mandapot godang aek, marlas ni roha ma di toru ni tano. 17 Nungnga turun be nasida tu Kuburan* rap dohot ibana, rap dohot sude halak na mate alani podang,+ rap dohot halak na mangurupi ibana na marlinggom tu ibana di tonga-tonga ni akka bangso.’+
18 “‘Na dia ma sian akka hau na di Eden i na tarpatudos tu hamuliaon dohot tu huasona?+ Alai diboan nama ho turun tu toru ni tano dohot akka hau na di Eden i. Peak nama ho di tonga-tonga ni akka halak na so marsunat naung mate dibahen podang. Masa ma i tu si Firaun dohot tu sude tentarana,’ ninna Jahowa Tuan Natumimbul i.”