Josua

10 Nungnga dibege Raja Adoni-zedek na sian Jerusalem naung ditaluhon si Josua huta Ai. Dibege ibana do muse naung dibahen si Josua tu huta Ai dohot tu rajana+ songon na binahenna tu huta Jeriko dohot tu rajana.+ Jala dibege ibana do naung mardame halak Gibeon tu halak Israel+ jala maringanan di tonga-tonga ni nasida. 2 Gabe mabiar+ ma Raja Adoni-zedek. Alana kota na balga do Gibeon, songon sada kota na diparetta ni sahalak raja. Umbalga do kota i sian kota Ai.+ Jala tentara na gogo do sude bawa na disi. 3 Alani i, disuru Raja Adoni-zedek ma halak manjuppangi Raja Hoham na sian Hebron,+ Raja Piram na sian Jarmut, Raja Japia na sian Lakis, dohot Raja Debir na sian Eglon.+ Ninna ma, 4 “Urupi ma au manaluhon halak Gibeon. Ai nungnga mardame nasida tu si Josua dohot tu bangso Israel.”+ 5 Alani i, marpungu ma lima raja ni halak Amori,+ i ma raja ni Jerusalem, raja ni Hebron, raja ni Jarmut, raja ni Lakis, dohot raja ni Eglon. Marpungu ma nasida dohot akka tentara ni nasida. Dung i lao ma nasida naeng mangalo halak Gibeon.

6 Disuru halak Gibeon ma halak manjuppangi si Josua di perkemahan na di Gilgal.+ Ninna ma, “Unang ma lupa ho tu akka hatobanmon.+ Hatop ma ho ro! Urupi ma hami! Ai nungnga marpungu sude raja ni halak Amori na maringanan di dolok-dolok lao mangalo hami.” 7 Dung i borhat ma si Josua sian Gilgal dohot akka tentarana na gogo.+

8 Didok Jahowa ma tu si Josua, “Unang ma mabiar ho tu nasida.+ Ai nungnga hulehon nasida tu ho.+ Dang adong sian nasida na tolap mangalo ho.”+ 9 Dung mardalan nasida saborngin sian Gilgal, toppu ma ro si Josua dohot akka tentarana marporang mangalo halak Amori. 10 Dibahen Jahowa ma halak Amori i gaor di jolo ni halak Israel.+ Gabe godang ma nasida na dipamate halak Israel di Gibeon. Dilele jala dibunu nasida do muse halak na nakkok tu Bet-horon, tu Azeka, dohot tu Makkedah. 11 Dung i, turun ma nasida sian Bet-horon ala dilele halak Israel nasida. Tikki na turun i nasida, dibahen Jahowa ma turun udan batu es na balga sahat tu Azeka. Gabe marmatean ma nasida. Unggodang do na mate alani udan i sian na mate dibunu tentara ni Israel.

12 Dibahen Jahowa do gaor halak Amori di jolo ni tentara ni Israel. Tikki masa i, didok si Josua ma tu Jahowa di jolo ni tentara ni Israel,

13 Alani i, so ma mataniari jala dang mardalan bulan sahat tu na ditaluhon bangso i musuna. Tarsurat do i di bukku Yasar.+ So ma mataniari i di tonga-tonga ni langit, jala hira-hira sadari ma lelengna dang bonom mataniari. 14 Dang hea dope masa na songon i. Jala dukkon i, dang hea be masa na songon i. Ditangihon Jahowa do pangidoan ni sahalak jolma,+ ai Jahowa do na marporang mangurupi halak Israel.+

15 Dukkon i, mulak ma si Josua rap dohot akka tentarana tu perkemahan na di Gilgal.+

16 Alai lari do lima raja ni halak Amori, jala martabuni do nasida di sada gua di Makkedah.+ 17 Dung i adong ma na paboahon tu si Josua. Ninna ma, “Martabuni do lima raja ni halak Amori i di sada gua di Makkedah.”+ 18 Didok si Josua ma, “Tutup ma gua i mamakke akka batu na balga, jala suru ma asa dijaga gua i. 19 Alai na asing, unang ma sai so disi. Torusson hamu ma mangalele musumuna jala pamate ma nasida.+ Unang pasombu nasida masuk tu kota ni nasida. Ai nungnga dilehon Jahowa Debatamuna nasida tu hamu.”

20 Massai godang do tentara ni halak Amori na dipamate ni si Josua dohot tentara ni halak Israel. Holan piga-piga halak nama na mangolu, jala lari do nasida tu akka kota na martembok. 21 Sude do mangolu tentara ni Israel jala mulak ma nasida tu si Josua di perkemahan na di Makkedah. Dang adong nanggo sahalak pe na barani* mangalo halak Israel. 22 Dung i didok si Josua ma, “Bukka gua i jala boan ma tuson lima raja ni halak Amori i.” 23 Diboan nasida ma kaluar lima raja i sian gua, i ma raja ni Jerusalem, raja ni Hebron, raja ni Jarmut, raja ni Lakis, dohot raja ni Eglon.+ 24 Diboan ma akka raja i tu jolo ni si Josua. Dijou ibana ma sude tentara ni halak Israel. Dung i didok ibana ma tu akka komandan ni tentara na rap dohot ibana, “Ro ma hamu tuson. Dege ma rukkung ni akka raja on.” Ro ma nasida jala didege ma rukkung ni akka raja i.+ 25 Dung i didok si Josua ma tu nasida, “Unang mabiar hamu.+ Ikkon barani do hamu jala togu. Ai songon i do na lao bahenon ni Jahowa tu sude musumuna.”+

26 Dung i dipamate si Josua ma nasida jala digattung tu lima tiang* sahat tu botari. 27 Dung bonom mataniari, disuru si Josua ma asa dipaturun bakke ni nasida sian tiang i.+ Disappatton ma bakke i tu gua inganan ni nasida martabuni. Ditutup ma gua i dohot akka batu na balga jala disi dope i sahat tu saonari.

28 Laos di ari i, ditaluhon si Josua ma kota Makkedah+ jala dipamate ibana do sude pakke podang. Dang adong nanggo sahalak pe na mangolu,+ rajana manang pangisi ni kota i. Dibahen si Josua do tu raja ni Makkedah+ songon na binahenna tu raja ni Jeriko.

29 Dung i lao ma si Josua dohot sude tentarana sian Makkedah tu Libna. Marporang ma nasida mangalo akka halak di Libna.+ 30 Dilehon Jahowa do muse kota i dohot rajana+ tu halak Israel. Dipamate nasida ma sude jolma na di kota i pakke podang, jala dang adong nanggo sada pe na mangolu. Dibahen nasida do tu raja ni Libna songon na binahen ni nasida tu raja ni Jeriko.+

31 Dung i lao ma muse si Josua dohot tentarana sian Libna tu Lakis.+ Markemah ma nasida disi, jala marporang mangalo halak na disi. 32 Dilehon Jahowa do kota Lakis tu halak Israel. Ditaluhon nasida ma kota i di ari na paduahon. Dipamate nasida ma sude halak na di kota i pakke podang,+ songon na binahen ni nasida di kota Libna.

33 Ro do Raja Horam na sian Gezer+ mangurupi halak Lakis. Alai dipamate si Josua do ibana dohot sude tentarana. Dang adong nanggo sada pe na mangolu.

34 Dung i lao ma muse si Josua dohot tentarana sian Lakis tu Eglon.+ Markemah ma nasida disi jala marporang mangalo halak Eglon. 35 Di ari i, ditaluhon nasida ma kota i. Dipamate nasida ma sude pangisi ni kota i pakke podang, songon na binahen ni nasida tu kota Lakis.+

36 Dung i lao ma muse si Josua dohot akka tentarana sian Eglon tu Hebron.+ Jala marporang ma nasida mangalo halak na disi. 37 Ditaluhon nasida ma akka huta na di Hebron. Dipamate nasida do rajana dohot sude pangisi ni kota i pakke podang. Dang adong nanggo sada pe na dipasombu mangolu. Dibahen nasida do tu huta i songon na binahen ni nasida tu kota Eglon.

38 Ujungna lao ma si Josua dohot akka tentarana tu Debir.+ Jala marporang ma nasida mangalo halak na disi. 39 Ditaluhon nasida ma akka huta na di Debir. Dipamate nasida do rajana dohot sude pangisi ni kota i pakke podang.+ Dang adong nanggo sada pe na dipasombu mangolu.+ Dibahen nasida do tu kota i dohot tu rajana songon na binahen ni nasida tu kota Hebron, kota Libna, dohot tu rajana.

40 Ditaluhon si Josua do sude huta na di inganan na mardolok-dolok, di Negeb, di Syefela,+ dohot akka huta na di rura. Dipamate do sude pangisi ni huta i dohot rajana. Dang adong nanggo sahalak pe na dipasombu mangolu,+ songon paretta ni Jahowa Debata ni Israel.+ 41 Ditaluhon si Josua ma nasida mulai sian Kades-barnea+ sahat tu Gasa.+ Ditaluhon do muse sude huta na di Gosen+ sahat tu Gibeon.+ 42 Ditaluhon si Josua do sude akka huta i dohot raja ni nasida. Ai Jahowa Debata ni Israel do na marporang mangurupi nasida.+ 43 Dung i mulak ma si Josua dohot akka tentarana tu perkemahan na di Gilgal.+