2 Samuel
24 Muruk ma sahali nai Jahowa tu halak Israel.+ Ai dioloi si Daud do hata ni halak na mandok, “Lao ma ho. Etong ma+ sude godang ni halak Israel dohot halak Juda.”+ 2 Dung i didok raja ma tu si Joab+ pamimpin ni tentara na mandongani raja, “Lao ma ho tu sude huta ni halak Israel, mulai sian Dan sahat tu Ber-seba.+ Daftar ma akka halak* na disi, asa huboto godang ni nasida.” 3 Alai didok si Joab ma tu raja, “Anggiat ma dibahen Jahowa Debatam lam godang nasida sappe 100 hali loppit. Jala sai anggiat ma boi idaonmu i. Alai boasa ma ikkon etongon ni tuanku godang ni nasida?”
4 Alai dang olo raja i manangihon hata ni si Joab dohot hata ni sude pamimpin ni tentara i. Alani i, lao ma si Joab dohot akka pamimpin ni tentara i mandaftar halak Israel.+ 5 Menyeberang ma nasida sian Sunge Jordan jala markemah di Aroer,+ na adong di sabola kanan* ni sada kota na di tonga-tonga ni sada rura.* Dung i, lao ma muse nasida tu huta ni halak Gad jala sian i lao ma nasida tu Jaser.+ 6 Lao ma nasida muse tu Gilead+ dohot tu luat Tahtim-hodsyi. Sian i, lao ma nasida tu Dan-yaan jala mamutar ma nasida tu Sidon.+ 7 Lao ma nasida muse tu kota Tirus na marbenteng.+ Sian i lao ma nasida tu sude kota ni halak Hevi+ dohot halak Kanaan. Ujungna, sahat ma nasida di Ber-seba+ na di Negeb+ huta ni halak Juda. 8 Saleleng 9 bulan 20 ari ma nasida mandalani sude huta ni halak Israel. Dung i, mulak ma nasida tu Jerusalem. 9 Dipaboa si Joab ma tu raja godang ni halak na didaftar. Adong 800.000 tentara ni Israel na marsinjata podang jala 500.000 halak Juda.+
10 Manolsoli*+ ma si Daud dung dietong ibana bangso i. Didok ibana ma tu Jahowa, “Nungnga balga dosakku+ ala hubahen songon on! Sesa ma dosa ni naposomon, ale Jahowa.+ Ai haotoon do na hubahen i.”+ 11 Dung dungo si Daud manogotna i, makkatai ma Jahowa tu Panurirang* Gad,+ halak na pasahatton parnidaan tu si Daud i. Didok ma, 12 “Lao ma ho mandapotton si Daud, jala dokkon ma tu ibana, ‘Songon on ma hata ni Jahowa, “Nungnga hubahen tolu sipillitonmu. Manang na dia na dipillit ho, i do bahenokku tu ho.”’”+ 13 Dung i, dijuppangi si Gad ma si Daud, jala didok ma tu ibana, “Dia ma pillitonmu? Masa pitu taon haraparon di luatmon,+ manang tolu bulan ho sai dilelei musum,+ manang tolu ari masa sahit di godang inganan di luatmon?+ Manat ma pikkiri na dia lao sipillitonmu, asa hupaboa tu Debata na manuru au.” 14 Didok si Daud ma tu si Gad, “Marsak hian do au mamikkiri on. Dumenggan ma Jahowa manghukum hita,+ ai parasi roha do Ibana.+ Unang ma loas jolma manghukum au.”+
15 Dibahen Jahowa ma masa sahit di godang luat+ ni halak Israel. Masa ma i mulai sian na manogot i sahat tu tikki naung ditottuhon. Mate+ ma 70.000 halak Israel, mulai sian Dan sahat tu Ber-seba.+ 16 Dung i, dibahen suru-suruan ma tanganna tu sabola Jerusalem lao pamatehon pangisi ni kota i. Alai lungun* ma roha ni Jahowa dung diparo Ibana sahit i.+ Didok Ibana ma tu suru-suruan na pamatehon bangso i, “Nga sae be i. Paturun ma tanganmi.” Tikki i, di labbung ni inganan pardegean ni si Arauna+ halak Jebus i+ do suru-suruan ni Jahowa i.
17 Tikki diida si Daud suru-suruan na pamatehon bangso i, didok ibana ma tu Jahowa, “Au do na mardosa, jala au do na marsala. Alani i, au dohot keluarga ni bapakku ma hukum.+ Alai anggo bangso na songon biru-biru on,+ dang marsala nasida.”
18 Laos di ari i, didapotton si Gad ma si Daud jala didok ma, “Lao ma ho tu inganan pardegean ni si Arauna halak Jebus i,+ jala pajongjong ma sada langgatan tu Jahowa disi.” 19 Dung i diulahon si Daud ma paretta ni Jahowa na dipasahat marhite Panurirang Gad jala lao ma ibana. 20 Diida si Arauna ma ro raja dohot akka parkarejona mandapotton ibana. Pittor lao ma ibana mandapotton raja i jala marsinggang ma ibana di jolo ni raja i. 21 Disukkun si Arauna ma raja i, “Ale rajanami, aha do na mambahen raja i ro tu inganan ni naposomon?” Didok si Daud ma, “Naeng manuhor inganan pardegeanmi do au. Ai naeng pajongjongokku do disi sada langgatan di Jahowa, asa so sahit na posi na masa tu bangso on.”+ 22 Didok si Arauna ma tu si Daud, “Unang pola tuhor inganan pardegean i tuan. Pelehon ma manang aha lomo ni roham disi. Adong do dison akka lombu na boi bahenonmu gabe pelean situtungon. Jala pakke ma papan* dohot akka hau na dipasang tu lombu i gabe soban. 23 Hulehon pe sudena on tu ho, ale rajanami.” Didok si Arauna ma muse, “Sai anggiat ma lomo roha ni Jahowa Debatam mangida ho.”
24 Didok raja i ma tu si Arauna, “Dang boi songon i. Ikkon tuhorokku do i. Molo dang, dang olo au mamelehon i gabe pelean situtungon tu Jahowa Debatakku.” Gabe dilehon si Daud ma 50 sekel* perak garar ni inganan pardegean i dohot akka lombu i.+ 25 Dipajongjong si Daud ma disi sada langgatan+ tu Jahowa. Dipelehon ibana ma pelean situtungon dohot pelean pardamean.* Dung i, ditangihon Jahowa ma pangidoan ni si Daud i+ jala gabe so ma sahit na posi na masa tu halak Israel i.