2 Samuel
17 Didok si Ahitopel ma tu si Absalom, “Paloas ma au mamillit 12.000 tentara lao mangalele si Daud borngin on. 2 Alookku ma ibana tikki loja jala gale.*+ Bahenokku ma ibana mabiar. Molo dung lari sude akka tentarana i, pamateonku ma raja i.+ 3 Dung i boanokku ma tu ho sude halak na mangihutton ibana. Ai molo dung mate bawa na niluluanmi, mulak do sude nasida tu ho jala dame ma ngolu ni nasida.” 4 Lomo do roha ni si Absalom dohot sude akka pangituai* ni Israel mambege pandapot ni si Ahitopel i.
5 Alai didok si Absalom ma, “Tajou ma jolo si Husai+ halak Arkhi i, asa tabege manang na songon dia pandapotna.” 6 Ro ma si Husai mandapotton si Absalom. Didok si Absalom ma tu ibana, “Songon on do poda ni si Ahitopel. Taulahon do na nidokna i? Molo dang, paboa ma aha na ikkon taulahon.” 7 Dialusi si Husai ma, “Anggo sahali on, dang denggan poda ni si Ahitopel i!”+
8 Didok si Husai ma muse, “Takkas do diboto ho, halak na barani do bapakmu dohot akka tentarana.+ Jala dos do nasida songon induk ni beruang na mangamuk tikki mago anakna di ladang.+ Asing ni i, tentara na jago do bapakmu.+ Dang rap marborngin ibana dohot akka na asing di sada inganan. 9 Ra, martabuni do ibana saonari di sada gua manang di inganan na asing.+ Molo ibana do na parjolo mangalo akka tentarami, begeon ni akka halak ma i jala dohonon ni nasida ma, ‘Nungnga ditaluhon be akka halak na mangihutton si Absalom!’ 10 Ai sude do halak Israel mamboto halak na gogo do bapakmu+ jala halak na barani do akka tentarana. Jadi molo tung pe barani sasahalak songon singa,+ mabiar do ibana mangida nasida. 11 Molo pandapottu, songon on ma bahen: Papungu ma sude tentara ni Israel mulai sian kota Dan sahat tu kota Ber-seba,+ na godangna songon pasir na di topi ni laut.+ Dung i, ho ma na mamimpin nasida marporang. 12 Manang didia pe ibana dapotta, ro ma hita mangalo ibana songon ombun na dabu tu tano. Molo tabahen songon i, dang adong na boi malua nanggo sada, dohot ma i si Daud nang akka tentarana. 13 Molo lari ibana tu sada kota, boanon ni bangso Israel ma akka tali asa diruppakkon kota i. Disarat ma kota i tu rura jala dang adong nanggo sada batu pe na tinggal disi.”
14 Didok si Absalom dohot sude halak Israel ma, “Dumenggan do poda ni si Husai halak Arkhi on sian poda ni si Ahitopel!”+ Ai Jahowa do na mambahen* asa unang diihutton nasida poda ni si Ahitopel na denggan i.+ Alani i, boi ma bahenon ni Jahowa marjea si Absalom.+
15 Dung i didok si Husai ma tu Malim Sadok dohot tu Malim Abiatar,+ “Songon on ma poda ni si Ahitopel tu si Absalom dohot tu akka pangituai ni Israel. Jala songon on ma podakku tu nasida. 16 Hatop ma suru halak mandok tu si Daud, ‘Menyeberang ma ho rajanami sian Sunge Jordan i. Unang be marborngin ho di inganan ni halak lao menyeberang sunge na di gurun i.* Molo dang menyeberang raja i, mate* nama ho dohot sude halak na mangihutton ho.’”+
17 Alani i, disuru ma sahalak parkarejo borua mandapotton si Jonatan+ dohot si Ahimas+ lao paboahon barita i. Tikki i, di En-rogel+ do si Jonatan dohot si Ahimas. Ai mabiar do nasida adong halak na mangida nasida masuk tu kota i. Dung i, lao ma si Jonatan dohot si Ahimas naeng paboahon i tu Raja Daud. 18 Alai adong ma sahalak doli-doli na mangida nasida jala dipaboa ma i tu si Absalom. Pittor lao ma nasida. Dung i, sahat ma nasida di jabu ni sahalak bawa di Bahurim.+ Adong do sumur ni bawa i di alamanna. Martabuni ma nasida di sumur i. 19 Ditutup istri ni bawa i ma sumur i mamakke kain jala dibahen ibana ma gandum naung digiling tu ginjang ni kain i. Dibahen ibana pe songon i, asa unang adong do halak na mamboto na martabuni nasida disi. 20 Ro ma akka parkarejo ni si Absalom tu jabu ni borua i. Disukkun nasida ma tu ibana, “Didia do si Ahimas dohot si Jonatan i?” Didok borua i ma, “Nungnga lao nasida tu arah ni sunge an.”+ Dung i dilului nasida ma, alai dang dapot. Gabe mulak ma nasida tu Jerusalem.
21 Dung lao akka parkarejo ni si Absalom i, kaluar ma nasida sian sumur i. Lao ma nasida manjuppangi Raja Daud, jala didok nasida ma, “Menyeberang ma ho. Ai songon on do poda ni si Ahitopel lao mangalo ho.”+ 22 Pittor lao ma si Daud dohot sude halak na mangihutton ibana menyeberang sian Sunge Jordan. Jala nungnga menyeberang nasida sude andorang so torang dope ari.
23 Dung diida si Ahitopel na so diihutton podana i, dipasang ibana ma palano ni halodena jala marhalode ma ibana mulak tu jabuna di hutana.+ Dung diatur ibana na rikkot di rumah tangga,+ digattukkon ibana ma dirina lao manikkot.+ Mate ma ibana jala dikubur di kuburan ni akka ompuna.
24 Di tikki i, borhat do si Daud tu Mahanaim+ jala lao ma si Absalom dohot sude tentara ni Israel menyeberang sian Sunge Jordan. 25 Dipillit si Absalom ma si Amasa+ gabe pamimpin ni tentarana lao manggattihon si Joab.+ Bapak ni si Amasa i ma si Jeter. Omakna i ma si Abigail,+ boru ni si Nahas, anggi ni si Seruya, omak ni si Joab. 26 Markemah ma si Absalom dohot sude tentara ni Israel di Gilead.+
27 Dung sahat si Daud di Mahanaim, ro ma si Sobi anak ni si Nahas sian Rabba+ huta ni halak Ammon, si Mahir+ anak ni si Ammiel sian Lo-debar, dohot si Barsilai+ halak Gilead sian Regolim. 28 Diboan nasida do podoman, baskom, hudon tano, gandum, barli,* topung, gandum na disaok,* dua macam kacang, gandum na dipakoring, 29 madu, mentega, biru-biru, dohot susu ni lombu. Ai didok nasida do, “Nungnga male be sude halak na di gurun i. Nungnga loja nasida jala mauas.”+ Alani i ma diboan nasida sipanganon i asa adong allangon+ ni si Daud dohot akka halak na rap dohot ibana.