2 Samuel
10 Mate ma raja ni halak Ammon+ jala si Hanun anakna i ma na manggattihon ibana gabe raja.+ 2 Didok si Daud ma, “Ikkon patuduokku do holong ni rohakku* tu si Hanun anak ni si Nahas i, songon holong ni roha naung pinatudu ni bapakna tu au.” Alani i, disuru si Daud ma akka parkarejona mangapuli si Hanun alani parmate ni bapakna i. Alai tikki sahat akka parkarejo ni si Daud di huta ni halak Ammon, 3 ro ma akka pamimpin ni halak Ammon i mandok tu si Hanun tuan ni nasida i, “Unang ma dirippu tuan na lao pasangappon bapakmu umbahen na disuru si Daud akka parkarejona i mangapuli ho. Ai na lao gabe mata-mata do nasida mamareso kota on, asa boi taluhonon ni si Daud hita.” 4 Gabe ditakkup si Hanun ma akka parkarejo ni si Daud i. Dicukkur ma janggut ni nasida satonga.+ Jala diribak dua ma abit ni nasida sahat tu gottingna. Dung i, disuru ma nasida lao. 5 Gabe maila situtu ma nasida. Dung dibege si Daud na masa i, disuru ma halak mandapotton nasida lao mandok, “Di Jeriko ma jo hamu tinggal+ sahat tu na tubu muse janggutmuna i, dung i pe asa mulak hamu.”
6 Di pudian ni ari, diboto halak Ammon ma na sogo hian roha ni si Daud tu nasida. Disuru nasida ma halak lao manggaji 20.000 tentara ni Siria na mardalan pat, na sian Bet-rehob+ dohot sian Zoba.+ Digaji nasida do muse Raja Maaka+ dohot 1.000 tentarana dohot 12.000 tentara na sian Tob.*+ 7 Dung dibege si Daud na masa i, disuru ibana ma tusi si Joab dohot sude tentarana, dohot ma i akka tentara na unjago.+ 8 Marpungu ma halak Ammon marbaris lao marporang di gerbang ni kota. Alai, di luar ni kota do halak Siria na sian Zoba, na sian Rehob, songon i nang halak Tob* dohot halak Maaka.
9 Diida si Joab ma naung marbaris akka tentara ni halak Ammon sian jolo dohot sian pudi lao mangalo nasida. Dipillit ibana ma tentara ni Israel na unjago lao marbaris mangalo halak Siria.+ 10 Jala dipasahat si Joab ma akka tentara na asing tu si Abisai+ abangna, asa ibana na mangatur nasida marbaris mangalo halak Ammon.+ 11 Didok si Joab ma, “Molo umgogo do halak Siria i sian au, ro ma ho mangurupi au. Alai molo umgogo do halak Ammon i sian ho, ro pe au mangurupi ho. 12 Pos ma rohatta jala barani ma hita!+ Marporang ma hita lao mampartahatton bangsotta dohot akka kota ni Debatanta. Sai pasauton ni Jahowa do lomo ni rohana.”+
13 Dung i maju ma si Joab dohot akka tentarana marporang mangalo halak Siria. Alai, lari ma halak Siria.+ 14 Dung diida halak Ammon naung lari halak Siria, gabe lari ma nasida sian si Abisai jala masuk tu kota. Dung marporang dohot halak Ammon, mulak ma si Joab tu Jerusalem.
15 Dung diida halak Siria naung ditaluhon halak Israel nasida, marpungu ma muse nasida.+ 16 Disuru si Hadadeser+ ma halak manjou halak Siria tu huta na jonok tu Sunge Euprat.+ Ro ma nasida tu kota Helam. Si Zoba pamimpin ni tentara ni si Hadadeser do na mamboan nasida tusi.
17 Dung diboto si Daud na masa i, pittor dipapungu ibana ma sude tentara ni Israel. Disuru ma nasida menyeberang sian Sunge Jordan jala lao tu kota Helam. Dung i, marbaris ma halak Siria lao marporang mangalo si Daud.+ 18 Alai lari ma halak Siria sian tentara ni Israel. Dipamate si Daud do 700 tentara ni Siria na markareta porang dohot 40.000 tentara na marhoda. Dibunu si Daud do si Zoba pamimpin ni tentara i jala mate disi do ibana.+ 19 Diboto akka raja na tunduk tu si Hadadeser ma naung talu nasida. Gabe dipangido ma asa mardame nasida tu halak Israel jala tunduk ma nasida tu bangso Israel.+ Gabe mabiar ma halak Siria mangurupi halak Ammon muse.