2 Samuel
1 Dung ditaluhon si Daud halak Amalek, mulak ma ibana tu Ziklag+ jala tinggal ma ibana disi saleleng dua ari. Tikki i, nungnga mate si Saul. 2 Di ari na patoluhon tikki si Daud di Ziklag, ro ma sahalak bawa sian perkemahan ni si Saul mandapotton ibana. Marsomba ma ibana tu si Daud. Maribak do abitna jala martano-tano do uluna.
3 Disukkun si Daud ma ibana, “Sian dia do ho ro?” Dialusi ibana ma, “Na lari do au sian perkemahan ni halak Israel.” 4 Didok si Daud ma, “Boha do parporangan i? Paboa ma jo tu au.” Didok ibana ma, “Godang do na mate di parporangan i. Si Saul dohot si Jonatan anakna i pe mate do.+ Jala marlarian do akka tentara ni halak Israel.” 5 Disukkun si Daud ma tu bawa na poso na paboahon barita i, “Sian dia diboto ho naung mate si Saul dohot si Jonatan anakna i?” 6 Didok bawa i ma, “Di tikki i, di Dolok Gilboa+ do au. Huida do si Saul mangussande tu tombakna.* Hape, nungnga jonok tentara ni musu na markareta porang dohot na marhoda naeng manakkup ibana.+ 7 Tikki diida si Saul tu au, dijou ibana ma au, hudok ma, ‘Aha i tuan?’ 8 Disukkun ibana ma, ‘Ise do ho?’ Hualusi ma, ‘Halak Amalek do au.’+ 9 Dung i didok si Saul ma, ‘Nungnga haccit hian huhilala, hape mangolu dope au. Ro ma ho tuson. Pamate ma au.’ 10 Hupajonok ma tu ibana jala hupamate ma ibana.+ Ai huida, nungnga naeng mate ibana ala godang do lukkana. Dung i, hubuat ma mahkota na di uluna dohot golangna* jala huboan do i lao hulehon tu tuan.”
11 Mambege i, diribak si Daud dohot akka tentarana ma abit ni nasida. 12 Tangis ma nasida, mangandungi, jala marpuasa+ sahat tu borngin. Ai nungnga mate si Saul, si Jonatan anakna i, akka naposo ni Jahowa, dohot godang halak Israel.+ Dipamate do nasida mamakke podang.
13 Disukkun si Daud ma bawa na poso na mamboan barita i, “Didia do hutam?” Didok ibana ma, “Anak ni halak Amalek do au na manoppang di huta ni halak Israel.” 14 Didok si Daud ma, “Barani nai ho mambunu ibana! Ai halak na pinillit* ni Jahowa do i.”+ 15 Dijou si Daud ma sahalak tentarana jala ninna ma, “Ro jo ho. Pamate ibana.” Gabe dibunu ma bawa i jala mate ma ibana.+ 16 Didok si Daud ma, “Alani na binahenmu do mate ho.* Ai ho do na mandok, ‘Au do na pamatehon halak na pinillit* ni Jahowa.’”+
17 Dung i marende ma si Daud lao patuduhon na lungun rohana di parmate ni si Saul dohot anakna si Jonatan.+ 18 Jala didok si Daud ma asa diparsiajari halak Juda ende i, na marjudul “Panah”. Jala disurat do ende i di bukku Yasar.+ Songon on ma ende i:
19 “Ale Israel, nungnga dipamate be akka na sangapmu di akka inganan na timbo.*+
Ida ma, nungnga mate be akka tentara na gogo i di parporangan!
20 Unang ma paboa i di Gat,+
Unang ma baritahon i di akka dalan na di Askelon,
Asa unang marlas ni roha akka boru ni halak Palistim,
Asa unang marlas ni roha akka boru ni halak na so marsunat i.
21 Ale akka Dolok Gilboa,+
Sai unang ma ro udan manang ombun tu ho,
Dang adong be parbue ni ladangmu na lao dipelehon tu Debata,+
Ai disi do mardabuan perisai ni akka tentaram na gogo jala nungnga tasikon,
Nungnga tasikon perisai ni si Saul, ala dang dimiahi be.
22 Sai hona do panah ni si Jonatan tu akka musu,+
Jala sai marhasil do podang ni si Saul pamatehon akka musu,+
Mate do akka tentara na jago dibahen panah dohot podang ni nasida, jala use do mudar ni akka musu.
23 Dihaholongi do si Saul dohot si Jonatan+ jala lomo do roha ni halak tu nasida saleleng mangolu nasida,
Sahat tu na mate pe, sai rap do nasida.+
24 Ale akka boru ni Israel, andungi hamu ma si Saul,
Ibana do na mambahen abit na merah dohot na arga di hamu,
Jala ibana do na mambahen mas tu abitmuna asa lam bagak.
25 Nungnga mate akka tentara na gogo i di parporangan!
Nungnga dipamate be si Jonatan di akka inganan na timbo* di Israel!+
26 Massai lungun do rohakku alani ho Jonatan ale-alekku,
Ai holong hian do rohakku tu ho.+
Umbalga do holong ni roham tu au sian holong ni sahalak borua.+
27 Dang marguna be sude sinjata porang i,
Ai nungnga mate be akka tentara na gogo i!”