Jeremia
38 Tikki makkatai si Jeremia tu bangso i, dibege si Sepatia anak ni si Matan, si Gedalia anak ni si Pashur, si Jukhal+ anak ni si Selemia, dohot si Pashur+ anak ni si Malkia do hatana i. Didok si Jeremia do, 2 “Songon on ma hata ni Jahowa, ‘Halak na toktong tinggal di kota on, na lao mate ma dibahen podang, haraparon, dohot sahit na masa di godang inganan.+ Alai manang ise na menyerah tu halak Kasdim, toktong ma ibana mangolu jala malua ma hosana.’+ 3 Ai songon on do didok Jahowa, ‘Pasti dipasahat do kota on tu tangan ni tentara ni raja ni Babel, jala taluhonon ni raja i do kota on.’”+
4 Didok akka pejabat i ma tu raja i, “Pamate ma bawa on.+ Ai gabe gale do roha* ni akka tentara na tinggal dope di kota on dohot sude jolma na dison mambege hatana i. Ai dang lomo rohana dame ngolu ni halak di kota on. Ninna rohana, marjea ma bangso on.” 5 Didok Raja Sedekia ma, “Terserah hamuna ma! Bahen hamu ma lomo ni rohamuna tu ibana. Anggo raja do, dang boi mangulahon manang aha lao mangabbati hamu.”
6 Diboan nasida ma si Jeremia, jala disappatton ma ibana tu lubang panampungan ni aek na di Alaman ni Panjaga+ appuna ni si Malkia anak ni raja i. Dipaturun nasida ma si Jeremia mamakke tali. Dang adong be aek di panampungan ni aek i, holan gambo nama na adong disi. Lonong ma si Jeremia di bagasan gambo i.
7 Dibege si Ebedmelek+ sahalak pejabat istana* na sian Etiopia ma naung dipamasuk nasida si Jeremia tu panampungan ni aek. Di tikki i, hundul do raja di Gerbang ni Benjamin.+ 8 Alani i, kaluar ma si Ebedmelek sian istana ni raja jala makkatai ma ibana tu raja. Didok ma, 9 “Ale raja tuannami, ulaon na jahat do na dibahen tu Panurirang* Jeremia i. Nungnga disappatton nasida ibana tu inganan panampungan ni aek. Mate nama ibana disi alani haraparon, ai dang adong be roti di kota on.”+
10 Dung i didok raja i ma tu si Ebedmelek halak Etiopia i, “Boan ma 30 halak bawa sian on. Angkat ma Panurirang Jeremia i sian lubang inganan panampungan ni aek i andorang so mate dope ibana.” 11 Dung i diboan si Ebedmelek ma akka bawa i mandongani ibana. Lao ma nasida tu inganan na di toru ni ruangan panimpanan ni arta na di istana.+ Dibuat nasida ma sian i akka kain naung buruk dohot akka kain naung maribak. Dipaturun nasida ma sudena i mamakke tali tu si Jeremia na adong di inganan panampungan ni aek i. 12 Dung i didok si Ebedmelek halak Etiopia i ma tu si Jeremia, “Bahen ma akka kain na buruk i dohot kain na maribak i di toru ni gedek-gedekmu, asa unang haccitan ho dibahen tali i.” Dung i diulahon si Jeremia ma songon i. 13 Diangkat nasida ma si Jeremia mamakke tali jala ditarik ma ibana kaluar sian inganan panampungan ni aek i. Mulai sian i, toktong ma si Jeremia tinggal di Alaman ni Panjaga.+
14 Dung i disuru Raja Sedekia ma halak lao mamboan Panurirang Jeremia manjuppangi ibana di dalan masuk na patoluhon na adong di jabu ni Jahowa. Didok raja i ma tu si Jeremia, “Adong naeng sukkunokku tu ho. Unang tabunihon manang aha pe sian au.” 15 Dung i didok si Jeremia ma tu si Sedekia, “Molo hupaboa pe tu ho ale tuan, pasti pamateonmu do au. Jala molo hupodai pe ho, dang na lao tangihononmu au.” 16 Alani i, sipsip ma Raja Sedekia marsumpa tu si Jeremia. Didok ma, “Songon pastina Jahowa mangolu,* Debata na mangalehon ngolu tu hita, dang pamateonku ho jala dang pasahatonku ho tu tangan ni akka halak na naeng pamatehon ho.”
17 Dung i didok si Jeremia ma tu si Sedekia, “Songon on do hata ni Jahowa, Debata Pamimpin ni Akka Tentara,* Debata ni Israel, ‘Molo olo ho tuan menyerah tu akka pejabat ni raja ni Babel, toktong ma ho mangolu jala dang na lao ditutung kota on. Toktong ma ho mangolu+ rap dohot keluargam. 18 Alai molo dang olo tuan menyerah tu akka pejabat ni raja ni Babel, dipasahat ma kota on tu tangan ni halak Kasdim jala ditutung nasida ma kota on.+ Dang na lao boi ho malua sian tangan ni nasida.’”+
19 Dung i didok Raja Sedekia ma tu si Jeremia, “Mabiar do au tu halak Jahudi naung marpihak tu halak Kasdim i. Ai molo dipasahat au tu nasida, bahenon ni nasida nama ulaon na massai kejam tu au.” 20 Alai didok si Jeremia ma, “Ale tuan, dang na lao dipasahat ho tu tangan ni nasida. Tolong ma jo oloi hata ni Jahowa naung hupaboa tu ho, asa na denggan na masa tu ho jala toktong ma ho mangolu. 21 Ai nungnga dipatuduhon Jahowa be aha na lao masa. Molo dang olo tuan menyerah tu nasida, songon on ma na lao masa: 22 Diboan nama sude akka borua na adong dope di istana ni raja ni Juda tu jolo ni akka pejabat ni raja ni Babel.+ Dokkonon ni nasida ma,
‘Nungnga lilu hamu dibahen akka halak na dihaporseai hamu* jala nungnga ditaluhon be hamu.+
Dibahen nasida do patmuna lonong di bagasan gambo.
Jala saonari nungnga marbalik be nasida jala mundur.’
23 Diboan ma sude istrim dohot akka anakmu tu jolo ni halak Kasdim. Dang na lao malua ho sian tangan ni nasida, ditakkup raja ni Babel ma ho.+ Jala alani ho, ditutung ma kota on.”+
24 Didok si Sedekia ma tu si Jeremia, “Unang ma sappe adong halak na mamboto na tahatai on, asa unang mate ho. 25 Molo dibege akka pejabat naung makkatai au dohot ho, jala ro nasida mandapotton ho lao mandok, ‘Paboa ma jo tu hami aha na didokkon ho tu raja i. Unang tabunihon sian hami manang aha pe, asa unang dipamate hami ho.+ Jala paboa ma aha na didok raja i tu ho.’ 26 Alusi ma nasida songon on, ‘Na hupangido do tu raja i asa unang dipaulak au muse tu jabu ni si Jehonatan asa unang mate au disi.’”+
27 Di pudian ni ari, ro do akka pejabat i manukkun si Jeremia. Dialusi si Jeremia ma nasida songon paretta ni raja i. Alani i, dang disukkuni akka pejabat i be ibana, ai dang adong nanggo sahalak pe na mamboto aha na dihatai nasida. 28 Sahat tu ari na ditaluhon Jerusalem, toktong do si Jeremia di Alaman ni Panjaga.+ Disi dope ibana tikki ditaluhon Jerusalem.+