Hesekiel

20 Di ari na pasappuluhon, di bulan na palimahon, di taon na papituhon, ro ma piga-piga pangituai* ni Israel. Hundul ma nasida di jolokku lao manukkun lomo ni roha ni Jahowa. 2 Dung i didok Jahowa ma tu au, 3 “Ale anak ni jolma, makkatai ma ho tu akka pangituai ni Israel i. Dok ma tu nasida, ‘Songon on do hata ni Jahowa Tuan Natumimbul i, “Na lao manukkun lomo ni rohakku do umbahen na ro hamu? ‘Songon pastina Au Debata na mangolu,* dang alusakku hamuna,’+ ninna Jahowa Tuan Natumimbul i.”’

4 “Ale anak ni jolma, nungnga rade be ho mangadili nasida? Nungnga rade be ho paboahon panguhuman tu nasida? Paboa ma tu nasida akka ulaon na huhagigihon na niulahon ni akka ompu ni nasida.+ 5 Paboa ma tu nasida, ‘Songon on do hata ni Jahowa Tuan Natumimbul i, “Di ari tikki hupillit halak Israel,+ marsumpa do Au tu pinoppar ni si Jakkob. Jala hupaboa do ise Au tu nasida tikki di Mesir.+ Tutu, marsumpa do Au* tu nasida, jala hudok do, ‘Au do Jahowa Debatamuna i.’ 6 Di ari i, marsumpa do Au na lao boanokku nasida kaluar sian Mesir tu luat naung hupillit lao di nasida. Godang do susu dohot madu+ di luat i jala luat i do na dumenggan sian sude luat. 7 Dung i hudok ma tu nasida, ‘Ikkon dibolokkon hamu do sude barangmuna na huhagigihon na adong di jolomuna. Unang bahen hamu ramun* dirimuna marhite patung na sian Mesir.+ Ai magigi* do Au mangida i. Au do Jahowa Debatamuna.’+

8 “‘“Alai mangalo do nasida tu Au, dang olo nasida manangihon Au. Dang dibolokkon nasida akka barang-barang ni nasida na huhagigihon na adong di jolo ni nasida. Jala dang ditadikkon nasida akka patung ni nasida na sian Mesir+ na huhagigihon i. Alani i, marjanji ma Au usehonokku ma murukku tu nasida. Usehonokku ma sudena rimashu tu nasida di Mesir. 9 Alai hubahen pe songon i asa unang marlea do goarhu di jolo ni akka bangso na di sakaliling ni inganan ni nasida.+ Ai tikki huboan nasida* kaluar sian Mesir,+ nungnga hupaboa ise Au tu nasida* di jolo ni sude bangso i. 10 Songon i ma Au mamboan nasida kaluar sian Mesir jala hutogu-togu do nasida borhat tu gurun.+

11 “‘“Dung i hupaboa ma akka aturanku jala hupatandahon ma patik naung hutottuhon tu nasida.+ Marhite songon i manang ise na mangulahon i, boi ma toktong mangolu.+ 12 Hulehon do muse tu nasida ari Sabat+ gabe tanda tu parjanjian na hubahen tu nasida.+ Marhite songon i, botoon ni nasida ma na Au do Jahowa na pabadiahon nasida.

13 “‘“Alai mangalo do halak Israel i tu Au tikki di gurun.+ Dang diulahon nasida akka aturanki jala dang olo nasida manjalo patik naung hutottuhon i. Hape molo diulahon nasida i, boi do nasida toktong mangolu. Dibahen nasida do ramun Sabat i. Alani i, marjanji ma Au lao mangusehon sude rimashu tu nasida di gurun lao pamatehon nasida.+ 14 Alai hubahen pe songon i asa unang marlea do goarhu di jolo ni akka bangso na asing, i ma akka bangso na mangida tikki huboan nasida* kaluar sian Mesir.+ 15 Marsumpa do Au muse tu nasida tikki di gurun, na so boanokku nasida tu luat naung hulehon i tu nasida,+ i ma luat na godang susu dohot madu.+ Jala luat i do luat na dumenggan sian sude luat. 16 Ai dang olo nasida manjalo patik naung hutottuhon i, dang diulahon nasida akka aturanku. Dibahen nasida do ramun Sabat i. Unlomo do roha ni nasida mangihutton akka patung na huhagigihon i.+

17 “‘“Alai asi do rohakku mangida nasida. Dang hupamate nasida sude tikki di gurun. 18 Tikki di gurun,+ hudok do tu akka pinoppar ni nasida, ‘Unang ihutton hamu akka aturan na binahen ni akka ompumuna.+ Manang unang oloi hamu akka patik naung ditottuhon nasida. Jala unang bahen hamu ramun dirimuna marhite akka patung ni nasida na huhagigihon i. 19 Au do Jahowa Debatamuna. Ihutton hamu ma aturanku, oloi hamu ma patik na hutottuhon. Jala ulahon hamu ma sudena i.+ 20 Bahen hamu ma badia ari Sabat i.+ Ai i do na gabe tanda tu parjanjian naung hubahen dohot hamu. Marhite i botoonmuna ma na Au do Jahowa Debatamuna.’+

21 “‘“Alai mulai ma akka pinoppar ni nasida i mangalo tu Au.+ Dang diulahon nasida akka aturanku, dang dioloi, jala dang diulahon nasida akka patik naung hutottuhon. Hape molo dioloi nasida i, boi ma nasida toktong mangolu. Dibahen nasida do muse ramun akka ari Sabat naung hutottuhon. Alani i, marjanji ma Au, usehonokku ma murukki tu nasida. Usehonokku ma sudena rimashu tu nasida di gurun.+ 22 Alai hutahan do dirikku.+ Hubahen pe songon i, asa unang marlea do goarhu+ di jolo ni akka bangso na asing na mangida tikki huboan nasida* kaluar sian Mesir. 23 Marsumpa do Au muse tu nasida tikki di gurun. Marsumpa do Au na lao bahenokku nasida marserak tu akka luat di tonga-tonga ni akka bangso na asing.+ 24 Ai dang diulahon nasida akka patik naung hutottuhon i, jala dang olo nasida manjalo akka aturanku.+ Dibahen nasida do ramun akka ari Sabat na hutottuhon. Jala marsomba do nasida* tu akka patung na huhagigihon na disomba akka ompu ni nasida.+ 25 Hupasombu do nasida mangihutton akka patik naung ditottuhon dohot aturan na so denggan, na so boi mambahen nasida toktong mangolu.+ 26 Hupasombu do ditutung nasida akka anak siakkangan ni nasida lao gabe pelean.+ Hupasombu do nasida gabe ramun alani peleanna i, asa mate nasida sude. Sian i botoon ni nasida ma na Au do Jahowa.”’

27 “Alani i, ale anak ni jolma, paboa ma tu halak Israel, ‘Songon on do hata ni Jahowa Tuan Natumimbul i, “Songon i do diulahon akka ompumuna tikki dang setia nasida tu Au, dibahen nasida do Au marlea. 28 Huboan ma nasida tu luat naung hujanjihon mardongan sumpa i.+ Tikki diida nasida sude dolok na timbo dohot hau na lomak,+ mulai ma dipelehon nasida pelean dohot akka pelean na asing na mambahen haccit rohakku. Ditutung nasida do pelean na angur uapna, jala diusehon nasida do disi pelean siinumon. 29 Jadi husukkun ma tu nasida, ‘Ai na marhua do hamu lao tu inganan na timbo* i? (Sahat tu saonari, digoari dope inganan i Inganan na Timbo.*)’”’+

30 “Saonari dokkon ma tu halak Israel i, ‘Songon on do hata ni Jahowa Tuan Natumimbul i, “Na gabe dibahen hamu do dirimuna songon akka ompumuna i? Na gabe songon ompumuna i do hamu dang setia tu Au,* jala manomba akka patung na huhagigihon i?+ 31 Dibahen hamu dope ramun dirimuna sahat tu sadari on. Dilehon hamu do pelean tu akka Debata na huhagigihon i, jala ditutung hamu do akka anakmuna gabe pelean.+ Ale Israel, saonari nungnga diulahon hamu songon i, alusakku dope hamu?”’+

“‘Songon pastina Au Debata na mangolu,’ ninna Jahowa Tuan Natumimbul i, ‘dang alusakku sukkun-sukkunmuna i.+ 32 Dang na lao saut na di rohamuna i tikki didok hamu, “Beta, songon bangso na asing an ma hita, songon akka keluarga na sian bangso na asing, na manomba hau dohot batu.”’+

33 “‘Songon pastina Au Debata na mangolu,’ ninna Jahowa Tuan Natumimbul i, ‘Mamaretta ma Au gabe Raja di hamu. Angkatokku ma tanganku na gogo i dohot huasokku na balga i lao manghukum hamu. Jala usehonokku ma tu hamu sude rimashi.+ 34 Boanokku ma hamu kaluar sian tonga-tonga ni akka bangso jala papunguokku ma hamu sian akka luat ingananmuna marserak i. Ai alani rimashu, nungnga hubahen hamu marserak marhite tanganku na gogo i, dohot marhite huasokku na balga i.+ 35 Dung i boanokku ma hamu tu gurun ni akka bangso, jala disi ma Au dohot hamu paadop-adop bohi lao manguhumi hamu.+

36 “‘Huadili ma hamu dos songon di tikki Au mangadili ompumuna di gurun na di Mesir,’ ninna Jahowa Tuan Natumimbul i. 37 ‘Bahenokku ma hamu dos songon biru-biru na lewat sian toru ni tukkot ni parmahan+ jala bahenokku ma hamu ikkon mangihutton sada parjanjian. 38 Alai palaookku ma sian tonga-tongamuna akka halak na mangalo dohot na mangalanggar patikku.+ Pakaluarokku ma nasida sian luat ingananmuna gabe halak panoppang i. Alai dang boi nasida masuk tu luat ni halak Israel.+ Sian i botoonmuna ma na Au do Jahowa.’

39 “Ale halak Israel, songon on ma hata ni Jahowa Tuan Natumimbul i, ‘Lao ma ganup sian hamu manomba akka patung na huhagigihon i.+ Alai molo dang ditangihon hamu Au dung diulahon hamuna i, boto hamu ma, na lao ro ma tikkina dang na lao boi be bahenonmuna ramun goarhu na badia i. Dang boi be bahenonmuna Au ramun marhite akka peleanmuna dohot akka patungmuna na huhagigihon i.’+

40 “Didok Jahowa Tuan Natumimbul i ma, ‘Sombaon ni sude halak Israel i ma Au di luat i.+ Sombaon ni nasida ma Au di dolokku na badia i, di dolok na timbo na adong di Israel.+ Disi, las ma rohakku mangida nasida, jala pangidookku ma tu hamu asa lehononmuna sumbangan dohot peleanmuna na dumenggan, i ma akka appunamuna na badia i.+ 41 Tikki huboan hamu sian akka luat ni akka bangso, jala tikki hupapungu hamu sian luat ingananmuna tikki hubahen marserak,+ dilehon hamu do pelean na parohon uap na palashon roha. Alani i, gabe las ma rohakku tu hamu jala gabe dipabadia ma Au di tonga-tongamuna di jolo ni akka bangso.’+

42 “‘Tikki huboan hamu tu luat ni Israel,+ tu luat naung hulehon mardongan sumpa tu akka ompumuna, botoonmuna ma na Au do Jahowa.+ 43 Dung sahat hamu disi, ingotonmuna ma pangalaho dohot sude pambahenanmuna na mambahen hamu gabe ramun.+ Magigi ma hamu tu dirimuna sandiri alani sude ulaon na jahat na diulahon hamu.+ 44 Dung i botoonmuna ma na Au do Jahowa. Ai alani goarhu+ do umbahen na huulahon songon i tu hamu. Dang hubaloshon tu hamu hombar tu hajahatonmuna i, manang hombar tu pambahenanmuna na so denggan i,’ ninna Jahowa Tuan Natumimbul i.”

45 Dung i didok Jahowa ma muse tu au, 46 “Ale anak ni jolma, ida ma doppak selatan jala baritahon ma doppak selatan. Paboa ma tu tombak na di sabola selatan i aha na lao masa di ari na naeng ro. 47 Dokkon ma tu tombak na di sabola selatan, ‘Tangihon ma hata ni Jahowa. Songon on do hata ni Jahowa Tuan Natumimbul i, “Tutungokku ma ho dohot api.+ Habis ma tutungonna sude hau na lomak dohot hau na koring. Dang na olo mittop apina i.+ Jala mohopan ma sude halak alani api i mulai sian selatan sahat tu utara. 48 Jala sude ma halak mangida. Botoon ni nasida ma Au do Jahowa na mambahen api i. Alani i do dang mittop api i.”’”+

49 Dung i hudok ma, “Ale Jahowa Tuan Natumimbul, dohonon ni nasida ma taringot tu au, ‘Holan na marteka-teki* do ibana molo makkatai.’”