Hesekiel

44 Dung i diboan ibana ma au muse lewat sian gerbang luar na menghadap tu sabola timur+ na di inganan na badia i. Ditutup do gerbang i.+ 2 Dung i didok Jahowa ma tu au, “Ikkon tutup do torus gerbang on jala dang boi dibukka. Dang boi nanggo sahalak pe lewat sian i. Ai nungnga lewat sian i Jahowa Debata ni Israel.+ Alani i, ikkon ditutup do torus gerbang i. 3 Alai boi do hundul pamimpin disi lao mangallang roti di jolo ni Jahowa.+ Ai pamimpin do ibana. Ikkon masuk sian terras ni gerbang i do ibana jala kaluar sian i.”+

4 Dung i diboan ibana ma au lewat sian gerbang na di sabola utara lao tu jolo ni bagas joro. Huida ma sinondang ni hasangapon ni Jahowa manggohi bagas joro ni Jahowa.+ Gabe manukkap ma au tu tano lao marsomba.+ 5 Dung i didok Jahowa ma muse tu au, “Ale anak ni jolma, parrohahon ma, ida ma, jala denggan ma tangihon sude na hudok tu ho. Denggan ma tangihon sude aturan dohot patik taringot tu bagas joro ni Jahowa. Manat ma parrohahon dalan lao masuk na tu bagas joro i dohot sude dalan lao kaluar sian inganan na badia i.+ 6 Dokkon ma songon on tu bangso Israel pangalo i, ‘Songon on ma hata ni Jahowa Tuan Natumimbul i, “Ale halak Israel, nungnga tung massai godang be diulahon hamu ulaon na huhagigihon i. Paso hamu ma ulaonmuna i. 7 Tikki diboan hamu akka halak na sian bangso na asing na so marsunat, jala na jahat rohana tu inganakku na badia i, dibahen nasida ma ramun* bagas jorokki. Dipelehon hamu do roti, tabo-tabo dohot mudar, alai laos di tikki i diulahon hamu do ulaon na mambahen Au magigi, na mambahen hamu mangalanggar parjanjiakki. 8 Dang diurus hamu akka barangku na badia i.+ Gariada, disuru hamu do halak na asing mangulahon akka tugasmuna di inganakku na badia i.”’

9 “‘Songon on do hata ni Jahowa Tuan Natumimbul i, “Dang boi be halak na sian bangso na asing na tinggal di Israel masuk tu inganakku na badia i. Dang boi be masuk tusi akka na so marsunat dohot na jahat rohana.”’

10 “‘Tikki mandao halak Israel sian Au+ lao mangihutton akka patung na huhagigihon* i, dohot do halak Lepi manadikkon Au. Alani i, ikkon martanggung jawab do halak Lepi tu hasalaan ni nasida. 11 Dung i ikkon karejo ma nasida di inganakku na badia i lao mangawasi akka gerbang na di bagas joro+ jala marhobas di bagas joro. Ikkon diseat nasida do pelean situtungon dohot akka pelean na asing lao tu bangso i. Ikkon jongjong do malim i di jolo ni bangso i lao marhobas tu nasida. 12 Ai nungnga marhobas nasida tu bangso i di jolo ni akka patung na huhagigihon, jala dibahen nasida do gabe mardosa halak Israel.+ Alani i, angkatokku ma tanganku lao mangalo nasida. Jala marsumpa ma Au na ikkon taonon ni nasida do akibat ni hasalaan ni nasida,’ ninna Jahowa Tuan Natumimbul i. 13 ‘Dang boi be nasida marhobas gabe malim di jolokku. Dang boi be nasida manjama akka barangku na badia i dohot na massai badia i. Ikkon dipaila do nasida ala nungnga mangulahon ulaon na mambahen Au magigi. 14 Alai, suruokku ma nasida karejo di bagas joro lao mangulahon sude tugas jala martanggung jawab tu sude ulaon na diulahon disi.’+

15 “‘Di tikki mandao halak Israel sian Au,+ akka malim Lepi na sian pinoppar ni si Sadok+ do na martanggung jawab di inganakku na badia i. Nasida ma na marhobas jala na jongjong di jolokku lao mamelehon tabo-tabo+ dohot mudar,’+ ninna Jahowa Tuan Natumimbul i. 16 ‘Nasida ma na boi masuk tu inganakku na badia i jala na boi jonok tu langgatanku lao marhobas tu Au.+ Ulahonon ni nasida ma sude tugas na hulehon tu nasida.+

17 “‘Tikki masuk nasida tu akka gerbang na di alaman na di bagasan, ikkon dipakke nasida do baju linen.+ Dang boi dipakke nasida pakkean na sian kain wol tikki martugas di akka gerbang na di alaman na di bagasan i, manang di akka inganan na disi. 18 Ikkon dipakke nasida do sorban na sian kain linen dohot celana pendek na sian linen.+ Dang boi dipakke nasida manang aha pe na boi mambahen nasida karingat. 19 Molo naeng kaluar nasida tu alaman na di luar, tu inganan ni akka bangso i marpungu, ikkon dibukka nasida do pakkean ni nasida na dipakke tikki martugas i.+ Dipeakkon nasida ma i di akka ruang makan na badia i.+ Dung i dipakke nasida ma baju na asing asa unang dibahen nasida bangso i gabe badia alani pakkean i. Ai badia do pakkean ni nasida i. 20 Ikkon rapi do dipangkas obuk ni nasida.+ Dang boi dicukkur nasida obukna i sappe habis manang dipasombu gabe ganjang. 21 Dang boi manginum anggur malim tikki masuk ibana tu alaman na di bagasan i.+ 22 Dang boi buaton ni nasida borua na mabalu manang borua naung sirang gabe istri ni nasida.+ Alai boi do nasida mambuat anak boru na sian pinoppar ni halak Israel gabe istri ni nasida, manang istri ni malim naung mabalu.’+

23 “‘Ikkon dipaboa nasida do tu bangsokki aha imbar ni akka na badia dohot na so badia. Ikkon diajarhon nasida do aha imbar ni akka na ramun dohot na ias.+ 24 Molo adong parsoalan,+ nasida ma na gabe hakim. Keputusan ni nasida di pengadilan ikkon mangihutton aturan naung hutottuhon.+ Ikkon diihutton nasida do sude aturan dohot patik naung hutottuhon taringot tu sude perayaan.+ Jala ikkon dipabadia nasida do ari Sabat na hubahen i. 25 Dang boi nasida jonok tu bakke ni halak naung mate. Ai boi do i mambahen nasida gabe ramun. Alai boi do dibahen nasida gabe ramun diri ni nasida molo bakke ni na mate i bakke ni bapakna, omakna, anakna, boruna, haha anggina, manang ibotona na so muli dope.+ 26 Molo dung dipabadia sahalak malim, ikkon dipaima ibana dope sappe pitu ari nai. Dung i pe asa boi ibana martugas muse. 27 Di ari tikki masuk ibana tu inganan na badia, i ma tu alaman na di bagasan i lao mangulahon tugasna di inganan na badia i, ikkon dilehon ibana do pelean hasesaan ni dosana,’+ ninna Jahowa Tuan Natumimbul i.

28 “‘Mandapot parbagianan do nasida: Au ma na gabe parbagianan ni nasida.+ Dang boi dilehon hamu tano parbagiananmuna gabe tano appuna ni nasida. Ai Au do parbagianan ni nasida. 29 Nasida ma na mangallang pelean sipanganon,*+ pelean hasesaan ni dosa, dohot pelean hasalaan.+ Sude na di Israel na naung dilehon tu Debata, gabe bagian ni nasida ma i sude.+ 30 Gabe bagian ni malim+ ma akka na dumenggan sian sude hasil panenmuna na parjolo dohot sude sumbangan na dilehon hamu. Ikkon dilehon hamu do hasil ni topung kasar na parjolo.+ Molo diulahon hamu songon i, dipasu-pasu ma keluargamuna.+ 31 Dang boi diallang akka malim sude ragam ni pidong manang binatang manang aha pe na mate sandiri manang na mate diharat binatang buas.’+