Jeremia
3 Didok halak ma, “Molo adong sahalak bawa palaohon istrina, dung i lao ma istrina i jala muli tu bawa na asing, boi dope mulak bawa i tu istrina i muse?”
“Diulahon ho do ulaon ni boru-boru na so hasea dohot godang halletmu,+
Tama dope ho naeng mulak tu Au saonari?” ninna Jahowa.
2 “Ida ma pussu ni akka dolok.
Adong dope sian inganan i na so hea gabe ingananmu modom dohot akka halletmi?
Hundul do ho paimahon nasida di akka dalan,
Dos songon halak* na tinggal di gurun.
Torus do dibahen ho ramun luat on,
Marhite ulaon ni boru-boru na so hasea na diulahon ho dohot pangalahom na jahat i.+
Diulahon ho do ulaon na so umboto ila, dos songon istri ni sahalak bawa na gabe boru-boru na so hasea,
Dang diboto ho ila.+
4 Alai saonari didok ho ma,
‘Bapa, Ho do ale-alekku mulai sian na poso au!+
5 Na torus do Ho muruk sahat tu saleleng ni lelengna?
Manang na sai torus do sogo roham?’
Didok ho do songon i,
Alai torus do sai diulahon ho na jahat sian nasa gogom.”+
6 Di tikki pamarettaon ni Raja Josia,+ didok Jahowa do tu au, “‘Nungnga diida ho be na diulahon halak Israel na so setia on? Lao do nasida tu sude dolok na timbo dohot tu toru ni hau na balga jala na lomak lao mangulahon ulaon ni boru-boru na so hasea.+ 7 Nang pe diulahon ibana songon i, torus do husuru ibana mulak tu Au.+ Alai dang olo ibana mulak. Torus do diparrohahon Juda pangalaho ni kakakna na so setia i.+ 8 Tikki huida i, hupalao ma Israel na so setia i jala hulehon ma tu ibana surat sirang.+ Ai nungnga mangalakkup ibana.+ Alai dang gabe mabiar Juda anggina na berhianat i. Lao do ibana gabe boru-boru na so hasea.+ 9 Leas do rohana tu ulaonna gabe boru-boru na so hasea i. Torus do dibahen ibana gabe ramun luat i jala mangalakkup do ibana marhite manomba batu dohot hau.+ 10 Alai nang pe songon i, dang olo si Juda anggina na so setia i mulak tu Au sian nasa rohana. Holan hatana do i,’ ninna Jahowa.”
11 Dung i didok Jahowa ma tu au, “Undenggan dope pangalaho ni Israel na so setia i sian apala pangalaho ni Juda na berhianat i.+ 12 Lao ma ho jala paboa ma songon on tu utara:+
“‘“Mulak ma ho ale Israel naung manimbil,” ninna Jahowa.’+ ‘“Dang na lao muruk be Au tu ho,+ ai setia do Au,” ninna Jahowa.’ “‘Dang na pasombuonku sogo rohakku tu ho saleleng ni lelengna. 13 Alai akkui hamu ma salamuna. Ai nungnga mangalo hamu tu Jahowa Debatamuna. Torus do mangulahon seks hamu dohot halak na so ditanda hamu* di toru ni sude hau na lomak. Alai anggo hatakku dang dioloi hamu,” ninna Jahowa.’”
14 “Mulak ma hamu, akka pinoppar na manimbil,” ninna Jahowa. Ai Au nama na gabe tuanmuna* na sah. Buatokku ma sada sian ganup kota, jala dua sian ganup keluarga. Jala boanokku ma hamu tu Sion.+ 15 Lehonokku ma tu hamu akka parmahan na mangulahon lomo ni rohakku.+ Lehonon ni nasida ma tu hamu parbinotoan jala urupan ni nasida ma hamu mangattusi. 16 Di tikki i lam torop ma hamu jala lam godang ma hamu di luat i,” ninna Jahowa.+ Dang na lao dihatai hamu be taringot tu poti parpadanan ni Jahowa! Dang na lao dipikkiri hamu be taringot tusi manang diingot hamu manang masihol rohamuna. Ai dang na lao dibahen be poti parpadanan i. 17 Di tikki i, dohononmuna ma Jerusalem i do tahta ni Jahowa.+ Dipapungu ma sude bangso lao pasangappon goar ni Jahowa di Jerusalem.+ Dang na lao marjugul be hamu lao mangihutton lomo ni rohamuna na jahat i.”
18 “Tikki i rap mardalan ma hamu, halak Juda rap dohot halak Israel.+ Rap kaluar ma hamu sian luat na di sabola utara tu luat na hulehon tu akka ompumuna gabe warisanmuna.+ 19 Najolo ninna rohakku do, ‘Las situtu nama rohakku. Ai nungnga hubahen be ho di tonga-tonga ni anakku. Lehonokku ma luat na undenggan sian sude luat di tonga-tonga ni sude bangso lao gabe warisanmuna!’*+ Hurippu do jouonmuna Au bapakmuna, jala dang na lao marbalik hamu sian Au, jala torus nama diihutton hamu Au. 20 ‘Alai dos songon sahalak istri na so setia tu suamina* jala na maninggalhon ibana, songon i ma hamu ale halak Israel. Dang setia hamu tu Au,’+ ninna Jahowa.”
21 Bege ma soara di akka dolok,
Soara ni na tangis dohot soara ni halak Israel na mangelek-elek,
Ai nungnga manirpang nasida sian dalan ni nasida,
Nungnga lupa nasida tu Jahowa Debata ni nasida.+
22 “Mulak ma hamu ale akka pinoppar na manimbil.
Pamalumokku ma hamu asa unang manimbil be.”+
Didok hamu ma, “Dison do hami! Ro do hami tu Ho,
Ai Ho do Debatanami ale Jahowa.+
23 Dang sittong ulaon na dibahen hami di sude akka dolok i.+
Tutu holan Ho do Jahowa Debatanami, na boi paluahon Israel.+
24 Mulai sian dakdanak hami, habis do sude dibahen debata na pailahon i hasil ni halojaon ni akka ompunami,+
Habis do hambing, biru-biru, dohot lombu,
Anak ni nasida dohot boru ni nasida.
25 Lok ma dipaila hami,
Lok ma marlea hami,
Ai mulai sian dakdanak sahat tu saonari,+
Nungnga diulahon hami dohot akka ompunami dosa tu Jahowa Debatanami,+
Dang dioloi hami hata ni Jahowa Debatanami.”