Jeremia
4 Didok Jahowa ma, “Ale Israel, molo olo ho mulak,
Molo olo ho mulak tu Au,
Jala molo dibolokkon ho akka patung na huhagigihon i sian jolokku,
Dang gabe buronan be ho.+
2 Jala molo marsumpa ho,
‘Songon pastina Jahowa mangolu!’*
Diulahon ho na sittong, na denggan, dohot na tigor,
Jaloon ni akka bangso ma pasu-pasu sian Ibana,*
Jala dipuji-puji nasida ma Ibana.”+
3 Ai songon on do hata ni Jahowa tu Juda dohot tu Jerusalem,
“Ula hamu ma tano na subur,
Unang be sabur hamu boni di tonga-tonga ni tano na marsuga-suga.+
4 Ale halak Juda dohot akka penduduk ni Jerusalem,
Dos songon halak na disunat na paiasson dirina sian na kotor
Paias hamu ma rohamuna di jolo ni Jahowa sian ulaon na kotor,+
Asa unang marsigorgor murukku tu hamu songon api.
Ai molo toktong diulahon hamu na jahat,+
Marsigorgor ma rimashi jala dang adong na boi mangittopi.”
5 Paboa ma i tu Juda jala pasahat ma i tu Jerusalem.
Marsurak ma ho jala ombus ma tarompet na sian tanduk di sude luat.+
Gogo ma dokkon, “Marpungu ma hamu sude,
Beta ma hita lari tu akka kota na marbenteng.+
6 Pasang ma sada tiang lao patuduhon dalan tu Sion.
Lului ma inganan parlinggoman, unang ma sai so hamu,”
Ai na lao parookku ma hasusaan sian utara,+ hasusaan na massai borat.
7 Nungnga kaluar be musu songon singa na kaluar sian ramba-ramba,+
Nungnga borhat be na lao manghancurhon akka bangso.+
Nungnga lao be ibana sian ingananna lao mambahen luatmuna i gabe inganan na massai ngeri.
Maruppak ma akka kotamuna jala dang adong be na mangingani.+
8 Alani i, pakke hamu ma abit goni,+
Mangandungi ma hamu* jala tangis ma hamu sagogo ni gogona,
Ai toktong dope marsigorgor muruk ni Jahowa tu hita.
9 Didok Jahowa ma, “Di ari i, mago ma habaranion ni akka raja,+
Songon i nang akka pejabatna.
10 Dung i hudok ma, “Ale Jahowa Tuan Natumimbul! Nungnga tung dioto-otoi Ho be halak Juda+ dohot Jerusalem. Didok Ho do, ‘Dame nama ngolumuna,’+ hape nungnga di rukkungnami be podang.”
11 Di ari i, dohonon ni halak Juda dohot Jerusalem ma,
“Ro ma alogo na mohop sian dolok tu gurun,
Mangullus ma i doppak bangsokki.*
Dang na lao mamurpur manang paiasson alogo i.
12 Marhite parettakku, ro do alogo na massai gogo sian akka inganan i.
Saonari, paboaokku ma aha hukuman na lao hubahen tu nasida.
13 Ida ma! Nungnga ro be musu songon ombun na golap,
Akka kareta hodana songon alogo na massai gogo.+
Ukkatop do akka hodana sian lali.+
‘Marjea ma hita, ai hancur nama hita!
14 Ale Jerusalem, paias ma rohamuna sian na jahat asa selamat hamu.+
Ai sadia leleng nai sai disippan hamu pikkiranmuna na jahat i?
15 Adong do soara na paboahon barita taringot tu Dan,+
Jala paboahon hasusaan di luat na di Dolok Epraim.
16 Paboa ma i tu akka bangso.
Paboa ma i tu Jerusalem.”
“Ro ma akka panjaga* sian luat na dao.
Jala gogo ma soara ni nasida mandok lao marporang tu akka kota na di Juda.
17 Ro ma nasida mangalo Jerusalem sian sude inganan, dos songon panjaga na di ladang,+
Ai nungnga mangalo ibana tu Au,”+ ninna Jahowa.
18 “Hilalaonmu ma akibat ni pambahenanmu dohot pangalahomi.+
Massai haccit do hukuman na lao dibahen tu ho,
Ai nungnga bagas marurat di roham pangalahom na mangalo i!”
19 Haccitna i, dangolna i!
Massai haccit do ate-atekku.
Taroktokon do au.
Dang boi au so,
Ai sai hubege do soara ni tarompet na sian tanduk i,
20 Marroan do torus barita taringot tu hasusaan na masa,
Ai nungnga hancur sude luat i.
Toppu do hancur akka kemah appunakki,
Jala di bagasan satokkin hancur do kain kemah+ appunakki.
21 Ikkon sadia leleng nai idaokku tanda* ni dalan i?
Jala sadia leleng ikkon begeokku torus soara ni tarompet na sian tanduk i?+
22 “Ai oto+ do bangsokki,
Dang diparrohahon nasida Au.
Akka anak na oto do nasida, dang diattusi manang aha.
Malo do nasida mangulahon na jahat.
Alai tung so diboto nasida do cara mangulahon na denggan.”
23 Huida ma luat on, nungnga kosong be jala nungnga tarulang.+
Huida ma tu langit, ida ma, dang tiur be.+
24 Huida ma akka dolok, nungnga hutur-hutur be,
Jala akka dolok-dolok pe nungnga morot-orot.+
25 Huida ma muse jala ida ma, dang adong be manang ise pe
Jala akka pidong na di langit pe, nungnga dao marhabangan.+
26 Dung i huida ma nungnga harsang songon gurun be luat na subur i,
Nungnga maruppak be sude kotana.+
Sudena i alani Jahowa,
Alani murukna na marsigorgor i.
27 Ai songon on do didok Jahowa, “Na lao tarulang+ do sude luat i.
Alai dang na lao hancur sude bahenokku.
Au sandiri do naung mandok i jala na manottuhon i,
Jala dang muba pikkiranku* taringot i, manang gabe sundat bahenokku.+
29 Tikki tarbege soara ni tentara na hundul di atas ni hoda dohot akka pemanah,
Lari ma sude halak na di kota.+
Masuk ma nasida tu ramba-ramba,
Nakkok ma nasida tu akka dolok batu.+
Ditadikkon nasida ma sude kota,
Jala dang adong be na tinggal disi.”
30 Saonari nungnga hancur be ho, aha nama na lao ulahononmu?
Somalna mamakke baju na merah do ho,
Mamakke perhiasan na sian mas,
Mamakke celak na birong asa songon na balga idaon matam.
Marisuang do sude haulionmi,+
Akka halak na marlomo ni roha tu ho dang olo be manjalo ho,
Saonari dilului nasida ma dalan lao pamatehon ho.+
31 Hubege ma soara songon soara ni borua na haccitan,
Na haccitan songon na dihilala borua na lao manubuhon anak siakkanganna,
Soara ni boru Sion na sada-sada hosana.
Dipatoltol ibana ma tanganna,+ huhut didok:
“Marjea ma au, ai nungnga loja be au dibahen akka pambunu i!”