Jeremia
13 Didok Jahowa ma tu au, “Lao ma ho tuhor ma ikat pinggang na sian linen jala pakke ma i, alai unang hona aek bahen.” 2 Dung i hutuhor ma ikat pinggang i songon na nidok ni Jahowa tu au, jala hupakke ma i. 3 Makkatai ma muse Jahowa tu au, 4 “Boan ma ikat pinggang na dituhormi jala na dipakkemi. Lao ma ho tu Sunge Euprat, tabunihon ma i di sada lubang na di dolok batu.” 5 Dung i, lao ma au jala hutabunihon ma ikat pinggang i di labbung ni Sunge Euprat songon na didok ni Jahowa tu au.
6 Dung manang na piga-piga leleng didok Jahowa ma tu au, “Lao ma ho tu Sunge Euprat, buat ma ikat pinggang na husuru tabunihononmu disi.” 7 Lao ma au tu Sunge Euprat, hugali ma inganan ni ikat pinggang na hutabunihon i. Huida ma nungnga sega be ikat pinggang i jala dang tarpakke be.
8 Dung i didok Jahowa ma tu au, 9 “Songon on ma didok Jahowa, ‘Dos songon ikat pinggang i, songon i ma bahenokku manghancurhon ginjang ni roha ni Juda dohot Jerusalem.+ 10 Dang olo bangso na jahat on mangoloi hatakku,+ marjugul do nasida lao mangihutton lomo ni roha ni nasida sandiri.+ Diihutton nasida do akka debata na asing, disomba nasida do i, jala marsinggang do nasida tusi. Alani i, bahenokku ma bangso on gabe songon ikat pinggang na so tarpakke i.’ 11 Didok Jahowa ma, ‘Ai dos songon ikat pinggang na gomos diikkat tu pinggang ni sasahalak, songon i ma solhot ni halak Israel dohot sude halak Juda tu Au. Hubahen do nasida gabe bangsokku,+ hubahen do nasida gabe dalan lao mambahen Au tarbarita,+ hubahen do nasida mamuji Au, jala hubahen do nasida pasangappon Au. Alai dang dioloi nasida Au.’+
12 “Dung i, ikkon dokkononmu do songon on tu nasida, ‘Songon on do hata ni Jahowa Debata ni Israel i, “Ikkon isionmuna do anggur tu gucci na balga i sappe gok.”’ Dung i didok nasida ma, ‘Huboto hami do na ikkon ision anggur tu gucci na balga i.’ 13 Dokkon ma tu nasida, ‘Songon on do hata ni Jahowa, “Dos songon mangisi anggur tu gucci na balga i, isiokku ma anggur tu sude penduduk ni luat on sappe mabuk nasida.+ Songon i ma bahenokku tu akka raja na hundul di tahta ni si Daud, tu akka malim, tu panurirang, dohot tu sude penduduk ni Jerusalem. 14 Dung i marsiattukan ma nasida bahenokku, bapakna tu anakna,” ninna Jahowa.+ “Dang na lao asi rohakku mangida nasida, manang na lungun rohakku, manang na marsak rohakku. Pamateonku do nasida sude, jala dang adong na boi mangabbati Au.”’+
15 Tangihon ma jala parrohahon.
Unang ginjang rohamuna, ai Jahowa do naung makkatai.
16 Pasangap ma Jahowa Debatamuna i
Andorang so diparo Ibana haholomon
Andorang so tartuktuk patmuna di dolok di tikki botari.
17 Molo dang olo hamu manangihon,
Tangis ma au di sihabunian alani ginjang ni rohamuna.
18 Dokkon ma tu raja dohot tu omak ni raja,+ ‘Turun ma hamu sian tahtamuna i,
Ai na lao madabu nama mahkota na uli sian ulumuna i.’
19 Akka gerbang ni kota na di selatan nungnga ditutup* be, dang adong be halak na lao mambukka i.
Nungnga diboan sude halak Juda tu luat ni musu.+
20 Tatap ma jala ida ma, nungnga ro be akka halak sian utara.+
Nungnga didia be biru-biru na bagak naung dilehon i tu ho?+
21 Molo halak na saleleng on dirippu ho ale-alem, hape ro lao manghukum ho+
Boha ma pakkilalaanmu?
Tottu haccit ma pakkilalaanmu, dos songon borua na naeng partus.+
22 Jala molo didok ho di bagasan roham, ‘Boasa ma masa on sude tu au?’+
Boto ma, alani hasalaanmu na massai balga i do umbahen na dipalua bajum,+
Jala massai haccit dihilala ho di tumitmu.
23 Tung boi ma halak Kus* paubahon warna ni kulitna?
Manang tung boi ma macan tutul paubahon kulitna na marbolang-bolang?+
Molo boi, hamu pe boi ma gabe mangulahon na denggan,
Hamu akka naung somal mangulahon na jahat.
24 Alani i, bahenokku ma nasida marserak dos songon durame na dihabangkon alogo na sian gurun.+
25 Songon i ma na lao masa tu ho, jala i ma parbagianan na hulehon tu ho,” ninna Jahowa.
“Ai nungnga dilupahon ho Au+ jala porsea do ho tu akka hata na so tutu.+
26 Alani i, bukkaokku ma bajum
Jala dipaila ma ho di jolo ni sude jolma,+
27 Alani ulaonmu na mangalakkup i+ dohot nafsum na marsigorgor i.
Jala so diboto ho ila tikki mangulahon ulaon ni boru-boru na so hasea i.
Papataronna ma sudena i, nungnga huida sude.+
Diulahon ho do sude ulaon na huhagigihon i di akka dolok dohot di akka dalan.
Marjea ma ho ale Jerusalem!